- કર્ણાટકમાં સેમ પિત્રોડા સામે FIR: વન વિભાગની જમીન પર તેમના NGOની હોસ્પિટલ
રાહુલ ગાંધીના નજીકના સહયોગી અને ઈન્ડિયન ઓવરસીઝ કોંગ્રેસના પ્રમુખ સેમ પિત્રોડા વિરુદ્ધ સોમવારે કર્ણાટકમાં FIR નોંધવામાં આવી હતી. તેમના NGO ફાઉન્ડેશન ફોર રિવાઇટલાઇઝેશન ઓફ લોકલ હેલ્થ ટ્રેડિશન્સ (FRLHT) પર વન વિભાગની જમીન પર કબજો કરવાનો આરોપ છે.
ભાજપની ફરિયાદના આધારે પિત્રોડા તેમના NGOના એક સાથીદાર સહિત વન વિભાગના ચાર અધિકારીઓ અને એક નિવૃત્ત IAS અધિકારી સામે કેસ દાખલ કરવામાં આવ્યો છે. ભાજપના નેતા અને એન્ટી બેંગલુરુ કરપ્શન ફોરમના પ્રમુખ રમેશ એનઆરએ 24 ફેબ્રુઆરીએ આ મામલે ED અને લોકાયુક્તને ફરિયાદ કરી હતી. તપાસ બાદ આજે કેસ નોંધવામાં આવ્યો હતો.
ફરિયાદ દાખલ થયા પછી, પિત્રોડાએ 27 ફેબ્રુઆરીના રોજ X પર લખ્યું છે કે-
મારી પાસે ભારતમાં કોઈ જમીન, ઘર કે શેર નથી. 1980ના દાયકામાં રાજીવ ગાંધી સાથે અને 2004 થી 2014 સુધી ડૉ. મનમોહન સિંહ સાથે કામ કરતી વખતે મેં ક્યારેય કોઈ પગાર લીધો નથી. મેં ભારતમાં કે અન્ય કોઈ દેશમાં મારા 83 વર્ષના જીવનમાં ક્યારેય લાંચ આપી કે સ્વીકારી નથી. આરોપો ખોટા છે.
14 વર્ષ પહેલાં લીઝનો સમયગાળો ખત્મ થયો, પણ કબજો છોડવામાં આવ્યો નહીં
સેમ પિત્રોડાએ 1996માં મુંબઈમાં FRLHT નામની સંસ્થા નોંધાવી હતી. તે જ વર્ષે યેલહંકા નજીક જરકાબંદે કવલ ખાતે કર્ણાટકના વન વિભાગ પાસેથી 5 હેક્ટર (12.35 એકર) જંગલ જમીન 5 વર્ષ માટે લીઝ પર લેવામાં આવી હતી.
2001માં આ લીઝ વધુ 10 વર્ષ માટે લંબાવવામાં આવી હતી. લીઝ 2011 માં સમાપ્ત થઈ ગઈ હતી, છતાં તેઓ હજુ પણ આ જમીન પર કબજો ભોગવી રહ્યા છે. પિત્રોડા અને તેમના સહયોગીઓ આ જમીન પર આયુર્વેદ હોસ્પિટલ ચલાવી રહ્યા છે.
આ ઉપરાંત, વન વિભાગની આ જમીન પર પરવાનગી વિના એક મકાન પણ બનાવવામાં આવ્યું છે. આ જમીનની કિંમત 150 કરોડ રૂપિયાથી વધુ છે.
એફઆઈઆરમાં એક નિવૃત્ત આઈએએસ અધિકારીનું પણ નામ
જેમની સામે કેસ નોંધવામાં આવ્યો છે તેમાં સેમ પિત્રોડા, તેમના NGO FRLHT ભાગીદાર દર્શન શંકર, વન અને પર્યાવરણ વિભાગના ભૂતપૂર્વ અધિક મુખ્ય સચિવ, નિવૃત્ત IAS જાવેદ અખ્તર, મુખ્ય વન સંરક્ષકો આરકે સિંહ અને સંજય મોહન, બેંગલુરુ શહેરી વિભાગના નાયબ વન સંરક્ષકો એન રવિન્દ્ર કુમાર અને એસએસ રવિશંકરનો સમાવેશ થાય છે.
ઔષધિઓ પર સંશોધન કરવા માટે જમીન ભાડે લેવામાં આવી
ભાજપના નેતા રમેશે જણાવ્યું હતું કે FRLHT સંગઠને કર્ણાટક રાજ્ય વન વિભાગને ઔષધીય વનસ્પતિઓના સંરક્ષણ અને સંશોધન માટે અનામત વન વિસ્તાર ભાડે આપવા વિનંતી કરી હતી.
વિભાગે 1996માં બેંગલુરુમાં યેલહંકા નજીક જરકાબંદે કવલ ખાતે બી બ્લોકમાં 12.35 એકર આરક્ષિત વન જમીન લીઝ પર આપી હતી. આ લીઝ 2 ડિસેમ્બર 2011 ના રોજ સમાપ્ત થઈ ગઈ. આ વાત આગળ વધારવામાં આવી ન હતી.
જ્યારે લીઝ પૂરી થઈ ગઈ ત્યારે જમીન વન વિભાગને પરત કરી દેવી જોઈતી હતી. રમેશનો આરોપ છે કે વન વિભાગના અધિકારીઓએ છેલ્લા 14 વર્ષમાં આ જમીન પાછી મેળવવા માટે કોઈ પ્રયાસ કર્યો નથી.
