રાજ્યમાં 3 દિવસ સુધી છૂટાછવાયા વિસ્તારોમાં હળવાથી મધ્યમ એટલે કે, 2.5 મિમીથી માંડીને અઢી ઈંચ સુધીનો વરસાદ પડે તેવી આગાહી કરવામાં આવી છે. આ દરમિયાન પ્રતિકલાકે 30થી 40 કિલોમીટરની ઝડપે ભારે પવન ફૂંકાવાની પણ શક્યતા પણ વ્યક્ત કરવામાં આવી છે. આગાહી પ્રમાણે કમોસમી વરસાદની શક્યતા 51%થી 75% છે. ભરશિયાળે ચોમાસા જેવી સ્થિતિને પગલે લઘુતમ તાપમાન 2થી 4 ડિગ્રી વધશે, એટલે ઠંડીમાં ઘટાડો નોંધાશે.
તો વાત જાણે તેમ છે કે, ઉત્તર-પશ્ચિમ મધ્યપ્રદેશ પર સર્જાયેલી સાઈક્લોનિક સર્ક્યુલેશન સિસ્ટમ અને વેસ્ટર્ન ડિસ્ટર્બન્સને કારણે ભરશિયાળે ચોમાસું શરૂ થઈ શકે છે. 26, 27 અને 28 ડિસેમ્બરે રાજ્યમાં કડાકા-ભડાકા સાથે કમોસમી વરસાદનો રાઉન્ડ શરૂ થઇ શકે છે. જેમાં આવતી કાલે છોટાઉદેપુર, નર્મદા, તાપી, ડાંગમાં બરફના કરા વરસી શકે છે. તો અહીં વીજળીના લિસોટા જમીન ઉપર આવે તેવું ઓરેન્જ એલર્ટ આપવામાં આવ્યું છે.
આ આગાહીને પગલે શિયાળુ પાકને લઈને ખેડૂતોની મુશ્કેલી વધી ગઈ છે. વરસાદ આવે કે ન આવે પરંતુ ગાઢ ધુમ્મસને કારણે શિયાળા પાક પર અસર થઈ રહી છે, તેમાં જો કમોસમી વરસાદ પડશે તો જગતના તાતના આસું પૂછવા પણ કોઈ આવે તેવું છે નહીં. કેમ કે સરકાર તો માત્ર સર્વે કરવાની જાહેરાતો જ કરે છે. તેથી કુદરત ખેડૂતો ઉપર રહેમ કરે તો જ વધારે સારૂં રહેશે.
મુસ્લિમ સમાજમાં લગ્ન સિઝન ચાલતી હોવાના કારણે માંડવો બંધાયો હોય તેવા પરિવારો પણ ચિંતામાં મૂકાયા છે. તો બીજી તરફ ઇટો પાડનારા ભઠ્ઠાવાળા પણ કમોસમી વરસાદને લઈને ચિંતામાં મૂકાયા છે.
હવામાન વિભાગના ડાયરેક્ટર એ. કે. દાસે જણાવ્યું હતું કે, આજથી ત્રણ દિવસ ગુજરાતમાં ગાજવીજ સહિત વરસાદની સંભાવના છે. મધ્ય ગુજરાતને બાદ કરતા રાજ્યના વિવિધ જિલ્લાઓમાં હળવાથી મધ્યમ વરસાદની શક્યતાઓ છે. આ ઉપરાંત પવનની ગતિ પણ વધુ રહેશે. જે વિસ્તારમાં વરસાદની શક્યતાઓ છે, ત્યાં 30થી 40 કિલોમીટર પ્રતિ કલાકની ઝડપે પવન ફૂંકાવાની સાથે વીજળીના ચમકારાનો પણ અનુભવ થશે. આ ઉપરાંત આવતીકાલે 27 ડિસેમ્બરના રોજ ગુજરાતના છોટાઉદેપુર, નર્મદા, તાપી, ડાંગમાં બરફના કરા વરસી શકે છે. અહીં વીજળીના ચમકારાનું ઓરેન્જ એલર્ટ આપવામાં આવ્યું છે.
હવામાન નિષ્ણાંત પરેશ ગોસ્વામીએ જણાવ્યું છે કે, રાજ્યના અનેક જિલ્લાઓમાં તીવ્ર માવઠાની આગાહી છે. અમુક વિસ્તારમાં ભારે તો અમુક વિસ્તારોમાં સામાન્ય ઝાપટા પડે તેવી સંભાવના છે.
