Kirti Patel arrested : સોશિયલ મીડિયા પર ટિકટોક સ્ટાર અને ઈન્સ્ટા ગર્લ તરીકે જાણીતી કીર્તિ પટેલ ફરી એકવાર વિવાદના વમળમાં આવી છે. સુરત પોલીસે અમદાવાદમાંથી કીર્તિ પટેલની ધરપકડ કરી છે, જે 2024માં નોંધાયેલા 2 કરોડ રૂપિયાની ખંડણી કેસમાં ફરાર હતી. આ મામલે સુરતના જાણીતા બિલ્ડર વજુભાઈ કાત્રોડિયાએ કાપોદ્રા પોલીસ સ્ટેશનમાં ફરિયાદ નોંધાવી હતી, જે હવે ચર્ચાનું કેન્દ્ર બની છે.

શું છે સમગ્ર મામલો?

2024માં વજુભાઈ કાત્રોડિયાએ કીર્તિ પટેલ વિરુદ્ધ ફરિયાદ નોંધાવી હતી, જેમાં આરોપ હતો કે કીર્તિ પટેલે જમીન વિવાદને લઈને 2 કરોડ રૂપિયાની ખંડણી માગી હતી. ફરિયાદ મુજબ, ખંડણીની રકમ ન આપવા પર કીર્તિ પટેલે બિલ્ડરને હની ટ્રેપમાં ફસાવવાની ધમકી આપી હતી. આ ગંભીર આરોપો બાદ પોલીસે તપાસ શરૂ કરી, પરંતુ કીર્તિ પટેલ ઘટના બાદથી ફરાર હતી. લગભગ એક વર્ષ સુધી ફરાર રહ્યા બાદ સુરત પોલીસે તેને અમદાવાદથી ઝડપી લીધી છે

પોલીસે ધરપકડ બાદ કાયદેસરની કાર્યવાહી હાથ ધરી

સુરત પોલીસે કીર્તિ પટેલની ધરપકડ બાદ કાયદેસરની કાર્યવાહી શરૂ કરી છે. પોલીસ આ મામલે વધુ તપાસ કરી રહી છે, જેમાં ખંડણી માગવાની ઘટના અને હની ટ્રેપની ધમકીની વિગતોની ઊંડાણપૂર્વક ચકાસણી કરવામાં આવશે. પોલીસે જણાવ્યું કે આ કેસમાં અન્ય કોઈ સંડોવણી હોય તો તેની પણ તપાસ કરવામાં આવશે.

કીર્તિ પટેલ અગાઉ પણ આવી છે વિવાદમાં

કીર્તિ પટેલ અગાઉ પણ અનેક વિવાદોમાં રહી ચૂકી છે, જેના કારણે તે સતત ચર્ચામાં રહે છે. કીર્તિ પટેલની ધરપકડના સમાચાર સોશિયલ મીડિયા પર ઝડપથી ફેલાયા છે.