AAP Gujarat ની એક સાંધે ત્યાં તેર તૂટે જેવી સ્થિતિ, ધારાસભ્ય ઉમેશ મકવાણા રાજીનામું આપે તેવી શકયતા

AAP Gujarat: વિસાવદર બેઠક પર AAP ના ગોપાલ ઈટાલિયાની પેટાચૂંટણીમાં જીતતા આપ ખુશી મનાવી રહ્યું છે. ત્યારે આ જીતની ખુશી વચ્ચે આપ પાર્ટીને મોટો આંચકો લાગી શકે છે. બોટાદના ધારાસભ્ય ઉમેશ મકવાણા પાર્ટીથી નારાજ હોવાના સમાચાર છે અને આજે બપોરે ગાંધીનગર ખાતે પ્રેસ કોન્ફરન્સ યોજીને તેઓ પોતાના ધારાસભ્ય પદેથી રાજીનામું આપવાની જાહેરાત કરી શકે છે.

પાર્ટીમાં અસંતોષના ભણકારા

સૂત્રોના જણાવ્યા અનુસાર, ઉમેશ મકવાણા લાંબા સમયથી પાર્ટીના કાર્યક્રમોમાં ભાગ લેતા નથી અને AAPના અન્ય ધારાસભ્યોના ફોન પણ ઉપાડતા નથી. આ ઉપરાંત, ગારીયાધારના ધારાસભ્ય સુધીર વાઘાણી પણ પાર્ટીથી નારાજ હોવાની ચર્ચા છે, જે AAPની અંદરની અશાંતિનો સંકેત આપે છે.

ઉમેશ મકવાણાની રાજકીય સફર

2022ની વિધાનસભા ચૂંટણીમાં AAPએ ઉમેશ મકવાણાને બોટાદ બેઠક પરથી ટિકિટ આપી હતી, જ્યાં તેમણે ભાજપના ઘનશ્યામ વિરાણી અને કોંગ્રેસના મનહર પટેલને હરાવીને જીત હાંસલ કરી હતી. જોકે, તાજેતરમાં ભાવનગર લોકસભા બેઠકથી તેઓ AAPના ઉમેદવાર તરીકે ચૂંટાયા હતા, પરંતુ તેઓ પરાજિત થયા હતા. આ નિષ્ફળતા અને પાર્ટીની અંદરના કેટલાક મુદ્દાઓને લઈને તેમની નારાજગી વધી હોવાનું મનાય છે.

વિવાદોમાં ફસાયેલા ઉ્મેશ મકવાણા

ઉમેશ મકવાણા અગાઉ પણ વિવાદોમાં રહ્યા છે. બોટાદમાં દારૂના ધંધા સામે રાજ્યની સ્ટેટ મોનિટરિંગ સેલની કાર્યવાહી દરમિયાન, મકવાણાએ તેમના એક સાથીને બચાવવા માટે બોટાદના એસપીને ધમકી આપી હોવાનો આરોપ મંત્રી જગદીશ વિશ્વકર્માએ વિધાનસભામાં લગાવ્યો હતો. આ ઉપરાંત, તેમના પૂર્વ PA અજય જમોડે લોકસભા ચૂંટણી દરમિયાન ખર્ચેલા 13 લાખ રૂપિયા પરત ન આપવા અને ધમકી આપવાની ફરિયાદ નોંધાવી હતી.

AAPના ધારાસભ્યોની સંખ્યા ઘટીને ચાર થઈ જશે

જો ઉમેશ મકવાણા રાજીનામું આપે છે, તો વિસાવદરમાં ગોપાલ ઈટાલિયાની જીત બાદ AAPના ધારાસભ્યોની સંખ્યા ઘટીને ચાર થઈ જશે. આજે બપોરે યોજાનારી પ્રેસ કોન્ફરન્સમાં તેઓ પોતાની નારાજગીના કારણો સ્પષ્ટ કરે તેવી શક્યતા છે. આ ઘટના ગુજરાતમાં AAPની સ્થિતિ પર કેવી અસર કરશે, તે જોવું રહ્યું.