વડોદરા શહેરમાંથી પસાર થતી વિશ્વામિત્રી નદીના કિનારા પાસેથી આજે બે મહાકાય મગરોના મૃતદેહ મળી આવ્યા છે. જેથી મગરોની સુરક્ષાને લઈ સવાલો ઉઠ્યા છે. મગરોના મોત થતાં તંત્ર દોડતું થયું છે. જોકે મગરોના મોત અંગે કોઈ ચોક્કસ કારણ જાણવા મળ્યું નથી.
આજે સવારે વડોદરા શહેરના કીર્તિ મંદિર પાસેથી પસાર થતી વિશ્વામિત્રી નદીના કિનારા પર અંદાજે 8 ફૂટના મગરનો મૃતદેહ મળી આવ્યો હતો. ત્યાર બાદ રેસ્કયૂ ટીમને આ જ વિસ્તારમાં આરાધના ટોકિઝથી ખાસવાડી સ્મશાનની વચ્ચે પસાર થતી વિશ્વામિત્રી નદીના કિનારે પણ એક મૃત મગર પડેલો હોવાનો કોલ મળ્યો હતો. જેથી મગર રેસ્કયૂ કરતા જીવદયા પ્રેમી સંગઠન વાઈલ્ડ લાઈફ રેસ્ક્યૂ ટ્રસ્ટના અરવિંદ પવારની ટીમે જઈને જોતા લગભગ 10 ફૂટનો મહાકાય મગર મૃત હાલતમાં પડેલો જોવા મળ્યો હતો.
તેમણે કહ્યું કે, બે મહિનામાં 6 મગરોના મોત થયા છે. તેની પાછળનું ચોક્કસ કારણ તો જાણવા નથી, તેમણે આશંકા વ્યક્ત કરી છે કે ચોમાસામાં આવેલા પૂરના કારણે મગરો જ્યા તાપમાં બેસી રહેતાં હતા તે જગ્યાઓ ધોવાઈ ગઈ છે. જેથી આખી રાત પાણીમાં રહેતા મગરોને શરીરના તાપમાનને જાળવી રાખવા માટે સવારનો તડકો ખાવાની જગ્યા મળી રહી નથી અને શરીર વધારે પડતું ઠંડું પડવાથી તેમજ તડકાના અભાવે મગરોના મોત થયા છે કે કેમ તે એક તપાસનો વિષય છે. તેમણે કહ્યું હતું કે, મગરોના પોસ્ટમોર્ટમ બાદ જંગલ વિભાગે અને તંત્રએ તપાસ કરવી જોઈએ.
વિશ્વામિત્રી નદીમાં દર ચોમાસે પૂર આવી જતું હોવાથી તેને ઊંડી કરવામાં આવી રહી છે. જેથી મગરોને આરામ અને તડકો લેવાની જગ્યાઓમાં ઘટાડો થવાનો છે. જેથી મગરો માટે સંકટ સમાન સ્થિતિ સર્જાઈ શકે છે.
આ પણ વાંચોઃ સૈફ અલી ખાન પર હુમલો કરનાર ક્યાં છુપાયો હતો? સૈફની કેવી છે હાલત?
