Bihar election:બિહાર વિધાનસભાની ચૂંટણીઓ દરમિયાન EVMમાં ગરબડ કરી ‘મત લૂંટ’ થઈ હોવાના આક્ષેપ લાગી રહયા છે ત્યારે આ બધા વચ્ચે હવે આરજેડી નેતા જગદાનંદે દાવો કર્યો છે કે બિહાર વિધાનસભા ચૂંટણીઓ દરમિયાન EVMમાં ગરબડ કરવામાં આવી હતી અને દાવો કર્યો હતો કે દરેક EVMમાં 25,000 મત પહેલાથી જ પડી ગયા હતા!
આ નિવેદનથી ભારે સનસનાટી મચી ગઈ છે.
મહત્વનું છે કે બિહાર વિધાનસભા ચૂંટણીના પરિણામો બાદ આરજેડીએ સોમવારે (17 નવેમ્બર) પટનામાં તેની પ્રથમ મહત્વપૂર્ણ સમીક્ષા બેઠક યોજી હતી જેમાં તેજસ્વી યાદવને વિધાનસભા પક્ષના નેતા અને વિધાનસભામાં વિરોધ પક્ષના નેતા તરીકે ફરીથી ચૂંટવામાં આવ્યા હતા.
આ બેઠકમાં આરજેડી સુપ્રીમો લાલુ પ્રસાદ યાદવ, ભૂતપૂર્વ મુખ્યમંત્રી રાબડી દેવી, સાંસદ મીસા ભારતી અને અનેક વરિષ્ઠ નેતાઓ હાજર રહ્યા હતા. સમીક્ષા બેઠક બાદ, ભૂતપૂર્વ રાજ્ય પક્ષ પ્રમુખ જગદાનંદ સિંહે વિવાદાસ્પદ દાવો કર્યો હતો કે દરેક EVMમાં 25,000 મત પહેલાથી જ પડી ગયા હતા આ નિવેદન બાદ રાજકીય હોબાળો મચી ગયો છે.
મીડિયા સાથે વાત કરતા, જગદાનંદ સિંહે કહ્યું કે તેમને અપેક્ષા નહોતી કે ચૂંટણીમાં આરજેડીને આવી દુર્દશાનો સામનો કરવો પડશે.
તેમણે આરોપ લગાવ્યો કે દરેક EVMમાં આશરે 25,000 મત પ્રી-લોક કરવામાં આવ્યા હતા. આમ છતાં,અમારા 25 ધારાસભ્યોનો વિજય થયો છે જે અમારા માટે સૌભાગ્યની વાત છે. તેમના નિવેદનથી રાજકીય વાતાવરણ ગરમાયું છે, કારણ કે આ આક્ષેપ ચૂંટણી પ્રક્રિયાની વિશ્વસનીયતા પર સવાલો ઉઠાવે છે.
જગદાનંદે વધુમાં સવાલ ઉઠાવ્યો કે જો લોકશાહી પ્રક્રિયામાં આવી છેડછાડ કરવામાં આવશે તો દેશ કઈ દિશામાં જશે.તેમણે દાવો કર્યો કે શાસક પક્ષે પરિસ્થિતિ બદલવા માટે આવો વિશેષ ઉપાય શોધી કાઢ્યો છે. તેમણે સવાલ કર્યો કે શું લોકશાહી એક એવો વ્યવસાય છે જ્યાં છેતરપિંડી ચાલુ રહી શકે છે. બંધારણના રક્ષણ માટે હાકલ કરતા તેમણે તેમના દાવાને પુનરાવર્તિત કર્યો કે EVM સાથે છેડછાડ ચૂંટણી પરિણામોને પ્રભાવિત કરવામાં મહત્વપૂર્ણ ભૂમિકા ભજવી શકે છે.
બેઠકમાં હાજર રહેલા માનેરના આરજેડી ધારાસભ્ય ભાઈ વીરેન્દ્રએ પણ ચૂંટણી પ્રક્રિયામાં અનિયમિતતાનો આરોપ લગાવ્યો હતો. તેમણે જણાવ્યું હતું કે નવા ચૂંટાયેલા ધારાસભ્યોએ સર્વસંમતિથી તેજસ્વી યાદવને પોતાના નેતા તરીકે ચૂંટ્યા છે અને પાર્ટી તેમના માર્ગદર્શન હેઠળ કામ કરશે. ભાઈ વીરેન્દ્રએ જણાવ્યું હતું કે અમે બેલેટ પેપરથી ચૂંટણી જીતીએ છીએ અને ઇવીએમથી ચૂંટણી હારીએ છીએ. ઇવીએમ સાથે છેડછાડ કરવામાં આવી છે, અને આપણે તેની સામે લડવું જોઈએ.
આરજેડી નેતાઓના આ આરોપોએ રાજકીય ચર્ચાને ફરીથી વેગ આપ્યો છે. પાર્ટી માને છે કે ચૂંટણીમાં ટેકનિકલ ખામીઓએ પરિણામો પર સીધી અસર કરી. બીજી તરફ, ચૂંટણી પંચે વારંવાર કહ્યું છે કે ઇવીએમ સંપૂર્ણપણે સુરક્ષિત છે અને કોઈપણ પ્રકારની હેરાફેરી અશક્ય છે.
જોકે, આરજેડીએ આ દાવાઓ સાથે રણનીતિ બનાવવાનું શરૂ કરી દીધું છે.
પાર્ટીના નેતાઓ કહે છે કે લોકશાહી મૂલ્યોનું રક્ષણ કરવા માટે, ઇવીએમની સમીક્ષા અને બેલેટ પેપર પરત કરવા પર રાષ્ટ્રીય સ્તરની ચર્ચા થવી જોઈએ પરિણામે આગામી દિવસોમાં બિહારના રાજકારણમાં EVM મુદ્દો મુખ્ય મુદ્દો બની શકે છે.
આ પણ વાંચો:
Surat: માતાજીના પંડાલમાં હુક્કાબાર સોંગ્સ પર યુવતીઓનો અશ્લિલ ડાન્સ, વીડિયો વાયરલ થતા વિવાદ
Maharashtra: ઉદ્ધવ ઠાકરેએ સોનમ વાંગચુકની ધરપકડ મામલે કેન્દ્ર સરકારની કાઢી ઝાટકણી
Rajasthan: BJP કાર્યકર્તાઓએ કેન્સરના દર્દીઓને બિસ્કિટ આપ્યા, ફોટા પડાવ્યા અને બિસ્કીટ પાછા લઈ લીધા
