Donald Trump: વેનેઝુએલા ઉપર કબ્જો જમાવ્યા બાદ અમેરિકાના પ્રમુખ ડોનાલ્ડ ટ્રમ્પે તરતજ ગ્રીનલેન્ડ પણ જોઈતું હતું પણ યુરોપિયન દેશોએ વિરોધ કરતા ત્યાં ટ્રમ્પની દાળ ગળી ન હતી અને હવે ટ્રમ્પે ક્યુબા ઉપર કબ્જો કરવાની વાત છેડી છે અને વેનેઝુએલા બાદ ક્યુબા ઉપર પણ કબ્જો કરી શકે છે,ટ્રમ્પે સંકેત આપ્યો છે કે ટૂંક સમયમાં અમેરિકા ક્યુબાને ‘ફ્રેન્ડલી ટેકઓવર’ કરી શકે છે. શુક્રવારે પત્રકારો સાથે વાતચીત કરતા ટ્રમ્પે આ વાત કહી હતી.
પ્રમુખ ટ્રમ્પે કહ્યું કે અમેરિકાના વિદેશ મંત્રી માર્કો રુબિયો ક્યુબાના વહીવટકર્તાઓ સાથે વાતચીત કરી રહ્યા છે,ટ્રમ્પે જણાવ્યું કે હાલમાં ક્યુબાની આર્થિક સ્થિતિ ખૂબજ નબળી છે,ક્યુબા સરકાર પાસે દેશ ચલાવવા પૈસા નથી જેથી અમેરિકા મદદ કરશે અને બદલામાં ક્યુબાનો ફ્રેન્ડલી ટેકઓવર કરી શકે છે.
●વેનેઝુએલા ઉપર અમેરિકાએ કબ્જો કર્યા બાદ ક્યુબા લાચાર
જાન્યુઆરીમાં વેનેઝુએલા ઉપર હુમલો કરી અમેરિકાએ પ્રમુખ નિકોલસ માદુરોને સત્તા પરથી હટાવ્યા બાદ ક્યુબાની હાલત વધુ કફોડી બની છે. અગાઉ વેનેઝુએલા તરફથી મળતો સબસિડી વાળો ઓઈલ સપ્લાય (રોજના 1 લાખ બેરલથી વધુ) હવે બંધ થઈ ગયો પરિણામે ક્યુબામાં વીજળી અને અન્ય આવશ્યક સેવાઓ ખોરવાઈ ગઈ છે. ટ્રમ્પના મતે, હવે ક્યુબા પર સૈન્ય કાર્યવાહીની જરૂર નથી કારણ કે તેની અર્થવ્યવસ્થા પહેલેથી જ ભાંગી પડી છે પરિણામે આસનીથી અમેરિકા સાથે જોડાઈ જશે.
અત્રે નોંધનીય છે કે બે દિવસ પહેલા જ ક્યુબાના દરિયાકાંઠે એક અમેરિકન રજિસ્ટર્ડ સ્પીડબોટ અને ક્યુબન દળો વચ્ચે અથડામણ થઈ હતી. આ ફાયરિંગમાં ચાર સશસ્ત્ર ક્યુબન માર્યા ગયા હતા. આ ઘટના બાદ બંને દેશો વચ્ચેના સંબંધો વધુ સંવેદનશીલ બન્યા છે અને લાંબા સમયથી ચાલી રહેલા ટ્રેડ એમ્બાર્ગો (વેપાર પ્રતિબંધ) વચ્ચે ‘ટેકઓવર’ની વાત સામે આવી છે જેનાથી વિશ્વભરમાં ટ્રમ્પની ખતરનાક નીતિ ખુલ્લી પડી છે.
