Plane Crash: બોલિવિયાની રાજધાની લા પાઝ નજીક આવેલા એલ અલ્ટો શહેરમાં શુક્રવારે સાંજે એક મોટી વિમાન દુર્ઘટના સર્જાઈ હતી,બોલિવિયાની એરફોર્સ લોકહીડ સી-130 હર્ક્યુલસ વિમાન ખરાબ હવામાનમાં રનવે પરથી લપસી ગયું અને એક વ્યસ્ત માર્ગ પર ક્રેશ થઈ જતા સર્જાયેલા અકસ્માતમાં ઓછામાં ઓછા 15 લોકો માર્યા ગયા અને 30 થી વધુ ઘાયલ થયા હતા.
વાયુસેનાનું આ હર્ક્યુલસ વિમાન રનવે પરથી લપસી ગયું હતું અને એરપોર્ટની બાઉન્ડ્રી તોડીને સીધું જાહેર રોડ પર આવી પડતા રસ્તા પર ઉભેલા 15 જેટલા વાહનો સાથે ટકરાતા વાહનોમાં ભારે નુકસાન થયું હતું,આ વિમાન દેશની સેન્ટ્રલ બેંકની નવી છાપેલી નોટોથી ભરેલું હતું.
અકસ્માત બાદ વિમાનમાંથી આ નોટો રસ્તા પર ચારેબાજુ વિખરાઈ ગઈ હતી પરિણામે નોટો વીણવા મોટી સંખ્યામાં લોકો એકત્ર થઈ ગયા હતા જેઓને ત્યાંથી હઠાવવા પોલીસે પાણીનો મારો અને ટીયર ગેસનો ઉપયોગ કરવો પડ્યો હતો.
ઘટના બાદ સ્થાનિક પોલીસ અને ફાયર બ્રિગેડ દ્વારા તાત્કાલિક બચાવ કામગીરી હાથ ધરવામાં આવી અને ઇજાગ્રસ્તોને હોસ્પિટલમાં ખસેડવામાં આવ્યા હતા. વિમાન અકસ્માતની ઘટનાને પગલે એલ અલ્ટો એરપોર્ટને કામચલાઉ ધોરણે બંધ કરી દેવામાં આવ્યું હતું.
