NEET UG Paper Leak Arrest: દેશભરના આશરે ૨૩ લાખ વિદ્યાર્થીઓના ભવિષ્ય સાથે જોડાયેલી NEET-UG 2026ની પરીક્ષાના પેપર લીક મામલામાં સેન્ટ્રલ બ્યુરો ઓફ ઇન્વેસ્ટિગેશન (CBI) ને એક બહુ મોટી સફળતા મળી છે. તપાસ એજન્સીએ મહારાષ્ટ્રના પુણેથી પી.વી. કુલકર્ણી નામના શખ્સની ધરપકડ કરી છે. પકડાયેલો આરોપી પી.વી. કુલકર્ણી મૂળ લાતુરનો રહેવાસી છે અને તે પરીક્ષા પ્રક્રિયામાં નેશનલ ટેસ્ટિંગ એજન્સી (NTA) તરફથી કેમિસ્ટ્રી લેક્ચરર તરીકે જોડાયેલો હતો. ઓફિશિયલ હોદ્દાના કારણે કુલકર્ણી પાસે પરીક્ષાના પ્રશ્નપત્રો સુધી સીધી પહોંચ હતી અને તેણે આ જ સત્તાનો દુરુપયોગ કરીને પરીક્ષા પહેલાં જ પ્રશ્નો બહાર વહેતા કરી દીધા હોવાનો પર્દાફાશ થયો છે.
ઘરમાં યોજાયા ‘સ્પેશિયલ ક્લાસ’: બોલી-બોલીને લખાવ્યા પેપરના પ્રશ્નો
CBI દ્વારા બહાર પાડવામાં આવેલી વિગતો અનુસાર, એપ્રિલ 2026ના છેલ્લા અઠવાડિયામાં પી.વી. કુલકર્ણીએ પોતાની સહ-આરોપી મનીષા વાઘમારેની મદદથી કેટલાક પસંદગીના વિદ્યાર્થીઓને એકઠા કર્યા હતા. અત્રે ઉલ્લેખનીય છે કે મનીષા વાઘમારેની ધરપકડ એજન્સી દ્વારા અગાઉ ૧૪ મે 2026ના રોજ કરી લેવામાં આવી છે. આ વિદ્યાર્થીઓને એકઠા કર્યા બાદ પુણે ખાતે આવેલા કુલકર્ણીના અંગત નિવાસસ્થાને એક કથિત “સ્પેશિયલ કોચિંગ સેશન” રાખવામાં આવ્યું હતું. આ ગુપ્ત ક્લાસો દરમિયાન કુલકર્ણી પોતે વિદ્યાર્થીઓને આગામી પરીક્ષામાં આવનારા પ્રશ્નો, તેના ચાર વિકલ્પો અને સાચા જવાબો મોટેથી બોલી-બોલીને નોટબુકમાં હાથથી લખાવતો હતો, જેના બદલામાં વિદ્યાર્થીઓ પાસેથી લાખો રૂપિયા વસૂલવામાં આવ્યા હતા.
વિદ્યાર્થીઓની નોટબુક અને અસલી પ્રશ્નપત્ર હૂબહૂ મેચ થતાં ભાંડો ફૂટ્યો
આ આખા કૌભાંડનો સૌથી મજબૂત અને વણખંડિત પુરાવો ત્યારે મળ્યો જ્યારે CBIએ દરોડા દરમિયાન જપ્ત કરેલી વિદ્યાર્થીઓની નોટબુકનું મિલાન ૩ મે 2026ના રોજ લેવાયેલી વાસ્તવિક NEET-UG પરીક્ષાના પ્રશ્નપત્ર સાથે કર્યું. આ તપાસમાં સામે આવ્યું કે વિદ્યાર્થીઓએ પોતાની નોટબુકમાં હાથેથી લખેલા કેમિસ્ટ્રીના પ્રશ્નો અને અસલી પરીક્ષાના પ્રશ્નો પૂરેપૂરા હૂબહૂ મેચ થતા હતા. આ વૈજ્ઞાનિક પુરાવાએ સ્પષ્ટ કરી દીધું કે પેપર લીકની આ કડી સીધી પરીક્ષાના આયોજન મંડળ એટલે કે NTAની અંદર બેઠેલા ભેજાબાજો સાથે જ જોડાયેલી હતી, જેણે કરોડો વિદ્યાર્થીઓની મહેનત પર પાણી ફેરવવાનું કામ કર્યું.
દેશના વિવિધ રાજ્યોમાંથી અત્યાર સુધીમાં ૭ આરોપીઓ જેલ ભેગા
પેપર લીકના આ આંતરરાજ્ય નેટવર્કને તોડી પાડવા માટે CBI અત્યાર સુધીમાં દેશભરમાંથી કુલ ૭ મુખ્ય આરોપીઓની ધરપકડ કરી ચૂકી છે. આ ધરપકડો જયપુર, ગુરુગ્રામ, નાસિક, પુણે અને અહમદનગર જેવા જુદા જુદા શહેરોમાંથી કરવામાં આવી છે. પકડાયેલા આરોપીઓમાંથી ૫ને સ્થાનિક અદાલતમાં રજૂ કરીને ૭ દિવસના પોલીસ રિમાન્ડ મેળવવામાં આવ્યા છે, જ્યારે પી.વી. કુલકર્ણી સહિત અન્ય બે આરોપીઓને ટ્રાન્ઝિટ રિમાન્ડના આધારે દિલ્હી લાવવાની તજવીજ હાથ ધરવામાં આવી છે. એજન્સીનું કહેવું છે કે કેમિસ્ટ્રી પેપર લીકનો મુખ્ય સ્ત્રોત (Source) અને વિદ્યાર્થીઓ સુધી પેપર પહોંચાડતા વચેટિયાઓની કડીઓ હવે સ્પષ્ટ થઈ ચૂકી છે.
આંતરરાજ્ય કનેક્શન અને નેટવર્કની કડીઓ જોડતી તપાસ એજન્સી
હવે CBI પોતાની તપાસનો વ્યાપ વધારીને આ આખા રેકેટના મૂળ સુધી પહોંચવા મથી રહી છે. લાતુરના રહેવાસી પી.વી. કુલકર્ણીની આકરી પૂછપરછ કરીને એજન્સી એ જાણવાનો પ્રયાસ કરી રહી છે કે આ નેટવર્કના તાર અન્ય કયા કયા રાજ્યો અને મોટા માથાઓ સાથે જોડાયેલા છે. આ પેપર લીક માત્ર કેમિસ્ટ્રી પૂરતું મર્યાદિત હતું કે અન્ય વિષયોના પેપરો પણ આ જ રીતે વેચાયા હતા, તે દિશામાં પણ તપાસ લંબાવવામાં આવી છે. આગામી દિવસોમાં આ મામલે અન્ય કેટલીક મોટી ધરપકડો અને ચોંકાવનારા ખુલાસા થવાની પૂરેપૂરી શક્યતા સેવાઈ રહી છે.
૨૩ લાખ વિદ્યાર્થીઓની રાત-દિવસની મહેનત અને વાલીઓની આજીવનની કમાણી જે પરીક્ષા પાછળ દાવ પર લાગી હોય, તેમાં આવી સુરક્ષા ચૂક કેમ? સૌથી મોટો સવાલ NTAની આંતરિક સુરક્ષા વ્યવસ્થા પર ઉભો થાય છે કે પરીક્ષા પ્રક્રિયા સાથે જોડાયેલા એક લેક્ચરર પાસે એપ્રિલ મહિનાના અંતમાં જ (પરીક્ષાના એક અઠવાડિયા પહેલા) પ્રશ્નપત્રની વિગતો કઈ રીતે પહોંચી ગઈ? શું એજન્સીની અંદર કોઈ મોટું મોનિટરિંગ તંત્ર કામ નહોતું કરતું? દેશની સૌથી પ્રતિષ્ઠિત મેડિકલ પ્રવેશ પરીક્ષામાં દર વર્ષે આવા વિવાદો કેમ સામે આવે છે? સરકારે માત્ર આરોપીઓને પકડવા પૂરતું સીમિત ન રહીને એવી કડક સિસ્ટમ બનાવવી પડશે જેથી ભવિષ્યમાં કોઈ પણ વ્યક્તિ દેશના હોનહાર વિદ્યાર્થીઓના ભવિષ્યનો વેપાર કરવાની હિંમત ન કરી શકે.
આ પણ વાંચો:
