- દેશભરમાં ફેલાયેલું છે મહિલાઓના અંગત વીડિયો વેચવાનું નેટવર્ક; જાણો કેવી રીતે ચાલે છે સોફ્ટ પોર્નનો ધંધો
રાજકોટ પાયલ મેટરનિટી હોસ્પિટલના લીક થયેલા વીડિયો સામે આવ્યા પછી પોલીસની તપાસમાં ચોંકાવનારા ખુલાસા થયા છે. મહાકુંભમાં શ્રદ્ધાની ડૂબકી લગાવવા જતી મહિલાઓના વીડિયો અને ફોટા હજારો રૂપિયામાં ઓનલાઈન વેચાઈ રહ્યાનો ખુલાસો ખરેખર ખુબ જ ગંભીર છે. પરંતુ આ સોફ્ટ પોર્નનો વીડિયો વેચવાનું નેટવર્ક દેશભરમાં ફેલાયેલું છે. વિવિધ રીતે વીડિયો મેળવીને તેમને વેચીને લાખો રૂપિયાની કમાણી કરીને એક અલગ જ ધંધો ઉભો કરી દીધો છે.
મહિલાઓના ઔચિત્ય ઉપર કુઠારાઘાત કરતાં ફૂટેજ વેચવાના કેસમાં હોસ્પિટલોના સર્વર હેક કરાયાંના તારણ ઉપર તો સાયબર ક્રાઈમ બ્રાન્ચ આવી ચૂકી છે. પરંતુ સૌથી મોટો સવાલ એ છે કે મેરેજ હોલ, બસ સ્ટેશન, મોલના ડ્રેસિંગ રૂમ કે પાર્લરમાંથી પણ મહિલાઓના ફૂટેજ મેળવીને વેચવામાં આવતાં હતાં. શરૂઆતમાં મફત ક્લિપ મોકલી બાદમાં પૈસા પૈસા વસુલી સબસ્ક્રીપ્શન આપીને માત્ર ફૂટેજ નહીં લાઈવ ટેલિકાસ્ટ કરાતાં હતાં.
સલામતીના ઉપયોગ માટે સીસીટીવી લગાવાયેલાં ન હોય તેવા જાહેર સ્થળોના ફૂટેજ હિડન કેમેરા મુકીને મેળવવામાં આવતાં હોવાનો ઘટસ્ફોટ થયો છે. દેશભરમાંથી આ પ્રકારે અલગ અલગ કેટેગરીમાંથી મેળવાયેલા ફૂટેજમાં સંડોવાયેલી ટોળકીના અનેક લોકોનો પર્દાફાશ કરવા અન્ય રાજ્યોની પોલીસ સાથે મળી તપાસ દેશવ્યાપી બનાવી સાયબર ક્રાઈમ બ્રાન્ચ ટૂંક સમયમાં ઘટસ્ફોટ કરશે.
પ્રવિત્ર મહાકુંભને પણ ન છોડ્યું
એક વીડિયોમાં એક મહિલા ગંગામાં સ્નાન કરી રહી છે અને કોઈ તેનું ગુપ્ત રીતે રેકોર્ડિંગ કરી રહ્યું છે. કેમેરાને જાણી જોઈને મહિલાના શરીરના ભાગો પર ઝૂમ ઇન અને આઉટ કરવામાં આવે છે. કોઈ જાણી જોઈને આવા વીડિયો બનાવી રહ્યું છે તે સ્પષ્ટપણે દેખાઇ રહ્યું છે.
આ કેસની તપાસ સાથે સંકળાયેલા એક સૂત્રના જણાવ્યા અનુસાર, મહાકુંભના વીડિયો મોબાઈલ ફોનનો ઉપયોગ કરીને ગુપ્ત રીતે શૂટ કરવામાં આવ્યા હતા. બધા વીડિયોનું વિશ્લેષણ કર્યા પછી આ વાત પ્રકાશમાં આવી છે. વીડિયો બનાવનાર ગેંગ મહાકુંભના સ્નાનઘાટ પર સક્રિય હતી, જ્યાં મહિલાઓ સ્નાન કરે છે અથવા કપડાં બદલે છે.
સાંજના સમયે મોટા ભાગના વીડિયો બનાવવામાં આવ્યા છે જેથી મોબાઈલને દેખી શકાય નહીં. આ બધા વીડિયો મહાકુંભ મેળા વિસ્તારના વિવિધ સ્થળોના છે. તેથી, એ પણ શક્ય છે કે કોઈ ખાસ ગેંગ વીડિયો બનાવવા માટે કામ કરી રહી હોય.
ઘાટ પર ભીડની સરખામણીમાં ચેન્જિંગ રૂમ ખૂબ જ મર્યાદિત છે, તેથી સ્ત્રીઓ કોઈક રીતે ચેન્જિંગ રૂમની નજીક પોતાના કપડાં બદલી નાખે છે. આ રેકેટના લોકો આ સ્થળ પર પણ નજર રાખે છે અને જ્યારે પણ તક મળે છે ત્યારે વીડિયો બનાવે છે.
રાજકોટની પાયલ મેટરનિટી હોસ્પિટલના સીસીટીવી ફુટેજના વીડિયો વાયરલ થવાના મામલે શરૂ કરાયેલી તપાસ આંતરરાષ્ટ્રીય કૌભાંડની દિશામાં સાવચેતીપૂર્વક આગળ ધપાવાઈ રહી છે. અમદાવાદ સાયબર ક્રાઈમ બ્રાન્ચે 80 હોસ્પિટલોના સીસીટીવી ફુટેજવેચાયા હોવાનું શોધી કાઢી ઇન્ફોર્મેશન ટેકનોલોજી એક્ટની કલમ 66 (એફ-2) પણ ઉમેરી છે. હોસ્પિટલના સર્વર હેક કરીને આ ફૂટેજ મેળવીને યુટ્યુબ અને ઈન્સ્ટાગ્રામ જેવા સોશિયલ મીડિયા નેટવર્ક ઉપર વેચવામાં આવતાં હતાં.
હોસ્પિટલોનું નેટવર્ક તો સાયબર ક્રાઈમે ભેદી ત્રણ આરોપીને ઝડપી લીધાં છે. પરંતુ સૌથી મોટો સવાલ તો મેરેજ હોલ, બસ સ્ટેશન, ઓપન બાથ, હિડન બાથ, પાર્લર જેવા વીસ પ્રકારના મેનુ કાર્ડ રાખીને વેચાતા મહિલાઓના ફૂટેજનો છે. લગ્ન, બસ સ્ટેશન, મોલના ચેન્જિંગ રૂમ, જાહેર સ્થળોએ સ્નાન અને પાર્લર સહિતના ખાનગી સ્થળોએ સીસીટીવી હોતા નથી.
જ્યાં સીસીટીવી લગાવાયેલાં ન હોય તેવી જગ્યાઓના ફૂટેજ મેળવવા માટે હિડન કેમેરાનો ઉપયોગ કરવામાં આવતો હોવાનો ઘટસ્ફોટ સાયબર ક્રાઈમ બ્રાન્ચની તપાસમાં થઈ ચૂક્યો છે. આ સંજોગોમાં ફૂટેજ વેચવાનું નેટવર્ક ચલાવતાં પકડાયેલા ત્રણ આરોપીઓ ઉપરાંત હિડન કેમેરાથી ફૂટેજ બનાવનારી ટોળકી દેશભરમાં કાર્યરત હોવાની મજબૂત આશંકા છે.
સાયબર ક્રાઈમ બ્રાન્ચે મહારાષ્ટ્રથી ઝડપાયેલા પ્રજવલ તૈલી, પ્રજ પાટીલ અને ચંદ્રપ્રકાશ નામના સોશિયલ મીડિયા ઉપર ફુટેજવેચતા શખસોને ઝડપી લીધાં છે. નવ દિવસના રિમાન્ડ દરમિયાન સીસીટીવી ન હોય તેવા જાહેર સ્થળોએ હિડન કેમેરા લગાવીને કે અન્ય રીતે ફૂટેજ કઈ રીતે મેળવવામાં આવતા હતા તે દિશામાં તપાસ કરવામાં આવી રહી છે.
નેટવર્કનો માસ્ટર માઈન્ડ કોણ?
મહિલા ઔચિત્ય ભંગના કિસ્સામાં ગંભીર બાબત એ છે કે, ફૂટેજ જોવા માટે 800 રૂપિયાથી 4000 રૂપિયા સુધીની કિંમત વસુલી સબસ્ક્રીપ્શન આપતાં આરોપીઓ 8થી 10 લાખ રૂપિયા કમાયાં હોવાનું સ્વિકારે છે. પરંતુ 40 મિલિયનની કમાણી કરી કરોડપતિ બનવાનું તેમનું સપનું હતું. આ પ્રકારે મહિલાઓના સીસીટીવી ફૂટેજ મેળવવાનો વિચાર ક્યાંથી આવ્યો? વીડિયો મેળવવા માટે સર્વર હેડ કરવા ઉપરાંત હિડન કેમેરાથી વીડિયોગ્રાફી સહિતનું આખું નેટવર્ક ગોઠવવામાં માસ્ટર માઈન્ડ કોણ? તે સૌથી મોટો સવાલ છે.
આ પણ વાંચો-મિત્ર ટ્રમ્પ કેમ બન્યો દુશ્મન? હવે કહ્યું- ભારત ઉઠાવે છે આપણો ફાયદો-મદદ કરવાની જરૂરત નથી
નગ્ન,અશ્લિલ વીડિયો વેચવા માટે મેળવાતાં પૈસા કયા ખાતામાં જતા હતા? વીડિયો જોવા માટેના અલગ અલગ ક્યુઆર કોડ ક્યાં બનાવાતાં અને કોણ બનાવી આપતું હતું તે સહિતના અનેક સવાલો અનુત્તર છે. અમદાવાદ સાયબર ક્રાઈમ બ્રાન્ચે મહિલા ઔચિત્ય મુદ્દે ગોપનિયતા જાળવીને ઉત્કૃષ્ટ કામગીરી કરી બતાવી છે. મહિલાઓમાં સતર્કતા વધે તે માટે આવશ્યક વિગતો જાહેર કરાય તો વિધાનસભામાં સરકારે પીઠ થાબડી તે લેખે લાગી ગણાશે.
