Ahmedabad: અમદાવાદના વિશાલા સર્કલ વિસ્તારમાં ગઈકાલે મોડી રાતે એક ભયંકર અકસ્માત સર્જાયો હતો, જેમાં એક પોલીસકર્મી દ્વારા ચલાવવામાં આવતી કારે રિક્ષાને જોરદાર ટક્કર મારી હતી. આ અકસ્માતમાં રિક્ષાચાલક ગંભીર રીતે ઇજાગ્રસ્ત થયો હતો. આ ઘટનાએ શહેરના કાયદા અને વ્યવસ્થાની સ્થિતિ પર અનેક સવાલો ઉભા કર્યા છે, કારણ કે અકસ્માત કરનાર વ્યક્તિ પોલીસકર્મી હોવાનું સામે આવ્યું છે અને તે નશાની હાલતમાં હોવાનો આક્ષેપ લોકોએ કર્યો છે.
ઘટના 17 સપ્ટેમ્બરની મોડી રાતે વિશાલા સર્કલ નજીક સિટીગેટ બિલ્ડિંગની સામે આવેલી બરફની ફેક્ટરી પાસે બની હતી. એક કારચાલકે પૂરપાટ ઝડપે આવીને રિક્ષાને ટક્કર મારી હતી. આ ટક્કર એટલી જોરદાર હતી કે રિક્ષા રસ્તા પર પલટી ખાઈ ગઈ. આ ઘટનામાં રિક્ષાચાલક ગંભીર રીતે ઇજાગ્રસ્ત થયો હતો. આસપાસના લોકો તાત્કાલિક ઘટનાસ્થળે એકઠા થયા અને 108 એમ્બ્યુલન્સની મદદથી રિક્ષાચાલકને સારવાર માટે સિવિલ હોસ્પિટલ ખસેડવામાં આવ્યો.
આ દરમિયાન લોકોએ કારચાલકને ઝડપી લઈને એમ ડિવિઝન ટ્રાફિક પોલીસને સોંપ્યો હતો. સ્થળ પર પહોંચેલી પોલીસે પ્રાથમિક તપાસ હાથ ધરી, જેમાં ચોંકાવનારી વિગતો સામે આવી. અકસ્માત કરનાર વ્યક્તિ વટવા પોલીસ સ્ટેશનમાં ફરજ બજાવતો પોલીસકર્મી પ્રકાશ રબારી હોવાનું બહાર આવ્યું. તેની કારની તપાસમાં પોલીસની વર્દી, બિયરની બોટલ અને કારની નંબરપ્લેટ મળી આવી હતી. સ્થળ પર હાજર લોકોએ આક્ષેપ કર્યો હતો કે પોલીસકર્મી દારૂના નશામાં હતો, જેના કારણે આ અકસ્માત સર્જાયો.
એમ ડિવિઝન ટ્રાફિક પોલીસે આ મામલે પોલીસકર્મી પ્રકાશ રબારી વિરુદ્ધ ગુનો નોંધીને તપાસ શરૂ કરી છે. પોલીસે કારચાલકનો બ્લડ રિપોર્ટ લઈને તે નશાની હાલતમાં હતો કે કેમ તેની તપાસ શરૂ કરી છે. આ ઉપરાંત, અકસ્માતના સ્થળે રસ્તાની સ્થિતિ, વાહનોની ગતિ અને અન્ય પરિબળોની પણ તપાસ કરવામાં આવી રહી છે.
આ ઘટનાએ અમદાવાદમાં વધતા અકસ્માતો અને ગુનાખોરીના મામલાઓ પર ફરી એકવાર પ્રકાશ પાડ્યો છે. ખાસ કરીને, જ્યારે અકસ્માતમાં સામેલ વ્યક્તિ પોલીસકર્મી હોય અને તેના પર નશામાં વાહન ચલાવવાનો આક્ષેપ હોય, ત્યારે શહેરની કાયદો અને વ્યવસ્થાની સ્થિતિ સામે ગંભીર સવાલો ઉભા થાય છે.
આ પણ વાંચો:
મોદીને જન્મદિનની શુભેચ્છા પાઠવવા જતાં ચેસ ચેમ્પિયનનો દાવો ઉધો પડ્યો, જુઓ | MYMODISTORY
Surat: લોકો ના, ના કહેતા રહ્યા, મહિલાએ રાષ્ટ્રધ્વજને સળગાવી દીધો, વીડિયો વાયરલ થતાં….
