AMCA Fighter Jet Project Shift: તમિલનાડુના રાજકારણમાં તાજેતરમાં જ મોટો ઉલટફેર જોવા મળ્યો છે, જ્યાં લોકપ્રિય અભિનેતા સી જોસેફ વિજય (થલપતિ વિજય) ની નવીનતમ પાર્ટી ‘તમિલગા વેત્રી કષગમ’ (TVK) ૨૩૪ સદસ્યીય વિધાનસભા ચૂંટણીમાં ૧૦૮ બેઠકો જીતીને સૌથી મોટા પક્ષ તરીકે ઉભરી આવી હતી. આ અણધાર્યા પરિણામો બાદ થલપતિ વિજયે કોંગ્રેસ અને અન્ય પ્રાદેશિક પક્ષો સાથે મળીને ગઠબંધન સરકાર રચી અને ૧૦ મે, ૨૦૨૬ના રોજ તમિલનાડુના નવા મુખ્યમંત્રી તરીકે પદ અને ગોપનીયતાના શપથ લીધા હતા. પરંતુ વિજય સરકારના સત્તા સંભાળતાની સાથે જ કેન્દ્ર સરકાર તરફથી રાજ્યને મોટો આર્થિક અને વ્યૂહાત્મક ઝટકો લાગ્યો છે. ભારતની અતિ મહત્વકાંક્ષી પાંચમી પેઢીના અદ્યતન મધ્યમ લડાકુ વિમાન (AMCA) ના ઉડાન પરીક્ષણ અને ઇન્ટિગ્રેશન હબ પ્રોજેક્ટને તમિલનાડુમાંથી હટાવીને આંધ્ર પ્રદેશને સોંપી દેવામાં આવ્યો છે, જેનાથી તમિલનાડુની નવી સરકાર માટે મુશ્કેલ સ્થિતિ સર્જાઈ છે.
રૂ. ૧૫,૦૦૦ કરોડનો ડિફેન્સ એરોસ્પેસ પ્રોજેક્ટ પુટ્ટપર્થીના ફાળે, રાજનાથ સિંહ અને નાયડુએ રાખ્યો પાયો
ભારતની સૈન્ય શક્તિને નવી ઊંચાઈએ લઈ જનારો આશરે ૧૫,૦૦૦ કરોડ રૂપિયાનો આ હાઈ-ટેક AMCA ડિફેન્સ હબ પ્રોજેક્ટ હવે આંધ્ર પ્રદેશના પુટ્ટપર્થીમાં આકાર લેશે. રક્ષા મંત્રી રાજનાથ સિંહ અને આંધ્ર પ્રદેશના મુખ્યમંત્રી એન ચંદ્રાબાબુ નાયડુએ સંયુક્ત રીતે વિતેલા શુક્રવારે આ પરિયોજનાનો સત્તાવાર શિલાન્યાસ કર્યો હતો. મીડિયા અહેવાલો અનુસાર, પુટ્ટપર્થીમાં સ્થિત ‘શ્રી સત્ય સાઈ સેન્ટ્રલ ટ્રસ્ટ’ ની માલિકીની જમીન પર આ મિશનને આગળ વધારવા માટે સંરક્ષણ સંશોધન અને વિકાસ સંસ્થા (DRDO) ને આંતરિક નિર્દેશો આપવામાં આવ્યા હતા. ચોંકાવનારી બાબત એ છે કે તમિલનાડુ પાસે ટેકનિકલ અને ભૌગોલિક દ્રષ્ટિએ વધુ બહેતર અને સજ્જ માળખાકીય સુવિધાઓ હોવા છતાં પણ કેન્દ્ર સરકારે આ મેગા પ્રોજેક્ટ રાતોરાત આંધ્ર પ્રદેશને ટ્રાન્સફર કરી દીધો છે. આ સાઇટ બદલવા પાછળ DRDO એ હજી સુધી કોઈ સત્તાવાર કે તાર્કિક કારણ જાહેર કર્યું નથી, જેના લીધે અનેક સવાલો ઊભા થઈ રહ્યા છે.
Attended the Ground Breaking ceremony and Foundation Stone laying ceremonies for a range of strategic aerospace and defence projects at Puttaparthi in Andhra Pradesh.
The commencement of these projects is significant as Aatmanirbharta in defence manufacturing is a critical… pic.twitter.com/2811cJcEGi
— Rajnath Singh (@rajnathsingh) May 15, 2026
ડૉ. ટીઆરબી રાજાનો કેન્દ્ર પર આક્રોશ: ‘સહકારી સંઘવાદને ઊંડો આઘાત અને ઘોર અન્યાય’
આ વિવાદાસ્પદ નિર્ણય સામે દેશના ઉદ્યોગ અને રક્ષા ક્ષેત્રના એક્સપર્ટોએ સખત નારાજગી વ્યક્ત કરી છે. વિષયના નિષ્ણાત ડૉ. ટીઆરબી રાજાએ સોશિયલ મીડિયા પ્લેટફોર્મ એક્સ (X) પર કેન્દ્ર સરકારની નીતિઓની આકરી આલોચના કરતા સવાલ ઉઠાવ્યો છે કે રાષ્ટ્રીય સુરક્ષા સાથે જોડાયેલા આવા વ્યુહાત્મક રોકાણોના નિર્ણયો માત્ર રાજકીય વહાલા-દવાલાના આધારે કેવી રીતે લઈ શકાય? તેમણે આક્રોશ ઠાલવતા કહ્યું કે, “આ ફેરફાર તમિલનાડુના લોકો સાથે ઘોર અન્યાય છે અને દેશના સહકારી સંઘવાદ (Cooperative Federalism) ની વિશ્વસનીયતા પર મોટો પ્રહાર છે. તમિલનાડુની અગાઉની ડીએમકેની એમકે સ્ટાલિન સરકારની ટીમે પાછલા ૩ વર્ષોમાં આ પ્રોજેક્ટને હોસુરમાં લાવવા માટે રાત-દિવસ મહેનત કરી હતી અને અસંખ્ય હાઈ-લેવલ બેઠકો યોજી હતી. આટલી મહેનત બાદ પ્રોજેક્ટ બીજા રાજ્યમાં જતો જોવો એ વ્યક્તિગત રીતે અત્યંત દુઃખદાયક છે.” તેમણે આશા વ્યક્ત કરી કે તમિલનાડુની નીતિગત નિરંતરતાને જાળવી રાખવા નવી સરકાર પણ લડત આપશે.
What we feared is happening !
And we MUST NOT allow it !
Tamil Nadu has reportedly lost the AMCA flight testing and integration project despite offering what the story itself describes as technically superior infrastructure conditions.
The report clearly states that the… pic.twitter.com/H9W1d5rpLr
— Dr. T R B Rajaa (@TRBRajaa) May 16, 2026
૩.૫ કિલોમીટર લાંબો રનવે અને ૧૦૦ એકર મફત જમીનની ઓફર છતાં તમિલનાડુ અવગણાયું
તમિલનાડુ સરકાર આ પરિયોજના માટે હોસુર (Hosur) ખાતે તમામ જરૂરી સુવિધાઓ તૈયાર કરી રહી હતી. તેમના સત્તાવાર પ્રસ્તાવ મુજબ, AMCA ફ્લાઇટ ટેસ્ટિંગ પરિસર પ્રસ્તાવિત હોસુર એરપોર્ટની બિલકુલ બાજુમાં બનાવવાનું નક્કી થયું હતું, જેમાં એક તરફ મુસાફર ટર્મિનલ અને બીજી તરફ એરફોર્સની ટેસ્ટિંગ ફેસિલિટી રાખવાની શાનદાર યોજના હતી. આ પ્રોજેક્ટ માટે સામાન્ય રીતે ૩.૫ કિલોમીટર લાંબા રનવેની જરૂરિયાત હોય છે, જે હોસુરમાં પહેલેથી જ પ્રસ્તાવિત હતો. એટલું જ નહીં, તમિલનાડુ સરકારે DRDO ને આ પ્રોજેક્ટ માટે રનવે ઉપરાંત વધારાની ૧૦૦ એકર જમીન તદ્દન મફત આપવાની સત્તાવાર ઓફર પણ આપી હતી. હોસુરની ભૌગોલિક સ્થિતિ એટલી અનુકૂળ હતી કે તે બેંગલુરુના વિમાનપુરામાં આવેલા વૈમાનિકી વિકાસ એજન્સી (ADA) ના મુખ્યાલયની સાવ નજીક થાત, જે ભારતના હળવા લડાકુ વિમાનો (LCA) ના ડિઝાઇન અને વિકાસ માટેની મુખ્ય નોડલ એજન્સી છે.
આંધ્ર પ્રદેશમાં નાનો રનવે હોવાથી કરોડોનો અતિરિક્ત ખર્ચ અને જમીન સંપાદનની મજબૂરી
બીજી તરફ, આંધ્ર પ્રદેશના પુટ્ટપર્થીમાં જ્યાં આ પ્રોજેક્ટ ખસેડાયો છે, ત્યાંના રનવેની મૂળ લંબાઈ માત્ર ૨.૧ કિલોમીટર જ છે. લડાકુ વિમાનોના હાઈ-સ્પીડ પરીક્ષણ માટે આ લંબાઈ ઘણી ઓછી હોવાથી, હવે આંધ્ર પ્રદેશ સરકારે વધારાની સેંકડો એકર જમીન સંપાદન (Land Acquisition) કરીને આ રનવેને ખેંચીને માંડ ૩ કિલોમીટર સુધી લંબાવવો પડશે. આનાથી સ્પષ્ટ થાય છે કે આંધ્ર પ્રદેશની સાઇટ ટેકનિકલ દ્રષ્ટિએ તમિલનાડુ જેટલી સક્ષમ નથી. એક્સપર્ટોનું કહેવું છે કે મોજૂદા જગ્યા કોઈપણ રીતે હોસુર કરતા ચઢિયાતી ન હોવા છતાં રાજકીય તુષ્ટિકરણના કારણે તમિલનાડુના હાથમાંથી આ આર્થિક સ્ત્રોત છીનવી લેવાયો છે, જે બાબતે કેન્દ્ર સરકારે દેશની જનતાને સ્પષ્ટ જવાબ આપવો પડશે.
નવા સીએમ વિજય માટે કસોટીની ક્ષણ
રાજકીય પંડિતોનું માનવું છે કે તમિલનાડુની નવી સરકાર અને મુખ્યમંત્રી વિજય આ સમયે કોઈ પણ પ્રકારની વહીવટી ઢીલાશ કે સુસ્તી બર્દાસ્ત ન કરી શકે. રાજ્યના આર્થિક અને ઔદ્યોગિક હિતોની રક્ષા કરવા માટે સીએમ વિજયે તાત્કાલિક ધોરણે એક અત્યંત ચુસ્ત, વગદાર અને દૂરંદેશી ધરાવતા ઉદ્યોગ મંત્રીની નિમણૂક કરવી પડશે, જે કેન્દ્ર સરકાર સાથે સીધી વાટાઘાટો કરીને તમિલનાડુમાં આવનારા આવા વ્યૂહાત્મક મોટા રોકાણોને સક્રિય રૂપે બચાવી શકે. જો તમિલનાડુ સરકાર આ બાબતે મૌન રહેશે, તો આગામી સમયમાં અન્ય મોટા પ્રોજેક્ટ્સ પણ પડોશી રાજ્યોના ખાતામાં જતા રહેવાનો ભય રહેશે.
દુશ્મનના રડારને પણ થાપ આપતા ભારતની ૫મી પેઢીના ‘સ્ટીલ્થ’ AMCA વિમાનની અદ્ભુત ખાસિયતો
અદ્યતન મધ્યમ લડાકુ વિમાન (AMCA – Advanced Medium Combat Aircraft) એ ભારતની અત્યાર સુધીની સૌથી પ્રતિષ્ઠિત અને મહત્વકાંક્ષી ડિફેન્સ પરિયોજના છે. તે સિંગલ સીટર (એક પાયલોટ) અને ડબલ એન્જિન ધરાવતું પાંચમી પેઢીનું સુપર ફાઇટર પ્લેન હશે. આ વિમાનની સૌથી મોટી સૈન્ય ખાસિયત તેની ‘સ્ટીલ્થ ટેકનોલોજી’ (Stealth Technology) છે, જેના કારણે આ વિમાન દુશ્મન દેશોના અત્યાધુનિક રડાર નેટવર્કની પકડમાં આવ્યા વિના તેમના ક્ષેત્રમાં ઘૂસીને તબાહી મચાવી શકે છે. આ સિવાય, AMCA માં હવામાં જ અત્યંત વિનાશક હથિયાર પ્રણાલી લોડ કરવાની સુવિધા, અવાજ કરતાં પણ વધુ ઝડપી સુપરસોનિક સ્પીડ, સુપરક્રૂઝ ક્ષમતા અને અત્યાધુનિક ડિજિટલ નેવિગેશન ટેકનિક સામેલ છે, જે ભારતીય વાયુસેનાને ભવિષ્યના યુદ્ધોમાં અજેય બનાવશે.
આ પણ વાંચો:
