BJP on Cockroach Janta Party: મે ૨૦૨૬ના ત્રીજા અઠવાડિયામાં અચાનક અસ્તિત્વમાં આવીને સોશિયલ મીડિયાના તમામ પ્લેટફોર્મ પર ધૂમ મચાવનારી ‘કોકરોચ જનતા પાર્ટી’ (CJP) હવે ગંભીર રાજકીય વિવાદોના ઘેરામાં આવી ગઈ છે. ભારતીય જનતા યુવા મોરચાના રાષ્ટ્રીય સચિવ અને ભાજપના ફાયરબ્રાન્ડ નેતા તેજિંદર પાલ સિંહ બગ્ગાએ આ વર્ચ્યુઅલ પાર્ટી પર જોરદાર પ્રહાર કરતા તેને ‘પાકિસ્તાન જનતા પાર્ટી’ તરીકે કરાર આપી દીધી છે. બગ્ગાએ દાવો કર્યો છે કે સોશિયલ મીડિયા પર રાતોરાત લાખો ફોલોઅર્સ મેળવનારી આ સંગઠનના તાર પડોશી દેશ પાકિસ્તાન સાથે જોડાયેલા છે, કારણ કે ઇન્સ્ટાગ્રામ પર આ પેજને ફોલો કરનારા મોટાભાગના લોકો પાકિસ્તાની નાગરિકો છે.
વિશ્વભરમાં ફેલાયેલું નેટવર્ક: પાકિસ્તાન મોખરે, અમેરિકા અને બાંગ્લાદેશ બીજા ક્રમે
બીજેપી નેતા તેજિંદર બગ્ગાએ પોતાના સત્તાવાર સોશિયલ મીડિયા એકાઉન્ટ ‘એક્સ’ (X) પર આ અંગેનું એક વિગતવાર ગ્રાફિક શેર કર્યું છે. આ ગ્રાફિકના આંકડા અનુસાર, કોકરોચ જનતા પાર્ટીના કુલ ફોલોઅર્સમાંથી સૌથી વધુ એટલે કે ૪૯ ટકા ફોલોઅર્સ એકલા પાકિસ્તાનમાંથી છે. જો કે, બગ્ગાએ આ ચોંકાવનારો ડેટા કયા સોર્સ કે ટૂલમાંથી મેળવ્યો છે તેનો કોઈ સ્પષ્ટ ઉલ્લેખ કર્યો નથી. આ ડેટા ગ્રાફિક દર્શાવે છે કે પાકિસ્તાન પછી અમેરિકા અને બાંગ્લાદેશ અનુક્રમે ૧૪-૧૪ ટકા ફોલોઅર્સ સાથે બીજા ક્રમે છે. આ સિવાય, આ ડિજિટલ પાર્ટીને ભારતમાં ૯ ટકા અને બ્રિટન, ઓસ્ટ્રેલિયા તેમજ સાઉદી અરેબિયા જેવા દેશોમાં સરખા ભાગે ૩-૩ ટકા ફોલોઅર્સ મળેલા છે.
Pakistan Janta Party pic.twitter.com/Abdlqm0AsL
— Tajinder Bagga (@TajinderBagga) May 21, 2026
કેન્દ્ર સરકાર એક્શનમાં: મુખ્ય ‘એક્સ’ એકાઉન્ટ પર પ્રતિબંધ
આ વિવાદ અને રાષ્ટ્રીય સુરક્ષાની ચિંતાઓ વચ્ચે, કેન્દ્ર સરકારના નિર્દેશ પર ગુરુવારે કોકરોચ જનતા પાર્ટીના સત્તાવાર ‘એક્સ’ (ટ્વિટર) એકાઉન્ટને ભારતમાં સસ્પેન્ડ (બ્લોક) કરી દેવામાં આવ્યું હતું. જો કે, ડિજિટલ સ્પેસમાં સક્રિય આ ગ્રુપે આ સરકારી કાર્યવાહી સામે તુરંત જ વળતો પ્રહાર કર્યો હતો. મુખ્ય એકાઉન્ટ બંધ થયાની થોડી જ ક્ષણોમાં તેમણે ‘કોકરોચ ઇઝ બેક’ (@CockroachIsBack) નામે એક નવું વૈકલ્પિક હેન્ડલ શરૂ કરી દીધું હતું. આ સસ્પેન્શન પર પ્રતિક્રિયા આપતા પાર્ટીના સ્થાપક અભિજીત દીપકેએ જણાવ્યું હતું કે, “અમને આવી સરકારી કાર્યવાહીની આશા પહેલેથી જ હતી, કારણ કે ગઈકાલથી જ અમારા એકાઉન્ટને હેક અને સેન્સર કરવાના સતત પ્રયાસો થઈ રહ્યા હતા. પરંતુ આઈટી સેલ અને સરકારનો આ દાવ હવે ઊંધો પડી ગયો છે.” આ નવું એકાઉન્ટ શરૂ થયાના માંડ એકાદ કલાકમાં, બપોરે ૩:૪૦ વાગ્યા સુધીમાં તો તેના ફોલોઅર્સની સંખ્યા ૧૬,૮૦૦ ને પાર પહોંચી ગઈ હતી.
ચીફ જસ્ટિસ સૂર્યકાંતની ટિપ્પણીથી થયો જન્મ
આ વિચિત્ર નામ ધરાવતી પાર્ટીના ઉદ્ભવ પાછળ સુપ્રીમ કોર્ટની એક ઘટના જવાબદાર છે. સ્થાપક અભિજીત દીપકેના જણાવ્યા અનુસાર, મુખ્ય એકાઉન્ટ સસ્પેન્ડ થયું તે પહેલાં ‘એક્સ’ પર તેમના ૨,૦૧,૦૦૦ થી વધુ ફોલોઅર્સ થઈ ચૂક્યા હતા. આ પાર્ટી ભારતના મુખ્ય ન્યાયાધીશ (CJI) સૂર્યકાંતની એ વિવાદાસ્પદ ટિપ્પણી બાદ અસ્તિત્વમાં આવી હતી, જેમાં તેમણે વરિષ્ઠતાના મુદ્દે સુનાવણી દરમિયાન એક વકીલ અને સિસ્ટમ પર સવાલ ઉઠાવતા તત્વો પ્રત્યે નારાજગી વ્યક્ત કરતા ‘પરજીવી’ (Parasites) અને ‘કોકરોચ’ (વંદા) જેવા આકરા શબ્દોનો પ્રયોગ કર્યો હતો. ૧૫ મેના રોજ ચીફ જસ્ટિસે આ ટિપ્પણી કરી હતી અને તેના બરાબર એક દિવસ પછી એટલે કે ૧૬ મેના રોજ આ કટાક્ષના જવાબમાં ‘કોકરોચ જનતા પાર્ટી’ લોન્ચ કરવામાં આવી હતી, જે યુવાનોમાં તુરંત જ વાયરલ થઈ ગઈ હતી.
સીજીઆઈ (CJI) નું સ્પષ્ટીકરણ: ‘મારા નિવેદનનો ખોટો અર્થ કઢાયો’
સમગ્ર દેશના સોશિયલ મીડિયા પર આ મુદ્દે ભારે હોબાળો મચતા અને યુવાનોનો આક્રોશ જોઈને મુખ્ય ન્યાયાધીશ સૂર્યકાંતે આ મામલે સત્તાવાર સ્પષ્ટીકરણ આપવું પડ્યું હતું. તેમણે સ્પષ્ટ કર્યું હતું કે સોશિયલ મીડિયા પર તેમની ટિપ્પણીનો સંદર્ભની બહાર જઈને ખોટો અર્થ નીકાળવામાં આવ્યો છે. દેશના પ્રગતિશીલ યુવા ધન પ્રત્યે તેમને પૂર્ણ સન્માન છે. તેમનું નિવેદન વિશેષ રૂપે માત્ર એવા તત્વો પર કેન્દ્રિત હતું જેઓ નકલી અને બોગસ ડિગ્રીઓના આધારે વકાલાતના પવિત્ર વ્યવસાયમાં ઘૂસી જાય છે અને સોશિયલ મીડિયા કે આરટીઆઈ (RTI) ના નામે સિસ્ટમ પર હુમલા કરે છે.
ઇન્સ્ટાગ્રામ પર મચી ધૂમ: ૧.૪૩ કરોડ ફોલોઅર્સ સાથે શાસક પક્ષ ભાજપને પણ પાછળ છોડ્યો
જો કે, ‘એક્સ’ એકાઉન્ટ પર પ્રતિબંધ મુકાયા છતાં, કોકરોચ જનતા પાર્ટીનું ઇન્સ્ટાગ્રામ પેજ અત્યંત મજબૂતીથી સક્રિય છે અને તેના ગ્રાફમાં અભૂતપૂર્વ ઉછાળો જોવા મળી રહ્યો છે. હાલમાં આ પેજ આશરે ૧.૪૩ કરોડ (14.3 Million) ફોલોઅર્સની વિશાળ સંખ્યા સાથે સોશિયલ મીડિયા પર ધૂમ મચાવી રહ્યું છે. ઇન્સ્ટાગ્રામ પર મૂકવામાં આવેલી એક લોકપ્રિય પોસ્ટમાં સીજેપીએ પોતાની સરખામણી દેશના સૌથી મોટા સત્તાધારી પક્ષ ભારતીય જનતા પાર્ટી (BJP) ના સત્તાવાર ઇન્સ્ટાગ્રામ હેન્ડલ સાથે કરી છે. ઉલ્લેખનીય છે કે, ભાજપના સત્તાવાર એકાઉન્ટના ફોલોઅર્સની સંખ્યા તે સમયે ૮૮ લાખની આસપાસ હતી, જેની સામે માત્ર પાંચ-છ દિવસ જૂની આ કટાક્ષ આધારિત ‘કોકરોચ પાર્ટી’ના ફોલોઅર્સ કરોડોમાં પહોંચી જતા દેશના રાજકીય અને ટેકનિકલ વર્તુળોમાં ભારે આશ્ચર્ય ફેલાયું છે.
આ પણ વાંચો:
Gujarat Chemist Strike: ગુજરાતમાં દવાની દુકાનો બંધ, હડતાલ પાછળનું કારણ સમજો – thegujaratreport.com
