આંધ્ર પ્રદેશથી ગુજરાતના પાટણ જિલ્લામાં 70 કરોડ રૂપિયાનું ચોરી કરેલું રક્તચંદન પહોંચી ગયુ હતુ. ગેરકાયદે ચોરી કરીને રક્તચંદનનો જથ્થો પાટણ પાસેના એક ગોડાઉનમાં સંતાડવામા આવ્યો હતો. આંધ્રપ્રદેશની પોલીસ બાતમીના આધારે પાટણ પહોંચી હતી. પાટણ પોલીસને સાથે રાખીને હાજીપુરના એક શ્રેય વિલાના ગોડાઉન નંબર 70માં કરોડોના રક્તચંદનના 150 ટુકડા પકડી પાડ્યા હતા.
રસપ્રદ વાત તે છે કે, વર્તમાન સમયમાં ચંદન ચોરી પર બનેલી ફિલ્મ પુષ્પા-2 ધૂમ થિયેટરોમાં ધૂમ મચાવી રહી છે. આ ફિલ્મ પણ લાલચંદનની દાણચોરી પર આધારિત છે, જેમાં ફિલ્મનો હીરા-કમ-વિલન પુષ્પરાજ ઉર્ફે પુષ્પા દેશ જ નહીં, વિદેશમાં પણ લાલચંદનની દાણચોરી કરે છે અને પોલીસને પડકાર ફેંકે છે.
ભલે ફિલ્મમાં પોલીસ ચંદન ચોર પુષ્પાને પકડી શકતી નહોય પરંતુ હકિકતમાં તો આંધ્ર પ્રદેશથી ગુજરાતમાં લાવેલા ચોરીના ચંદનના લાકડાને આંધ્ર પ્રદેશની પોલીસે હજારો કિલોમીટર દૂર સંતાડેલો હોવા છતાં શોધી કાઢ્યો છે.
કરોડોના રક્ત ચંદનની ચોરીના બનાવમાં આંધ્રપ્રદેશ પોલીસ તપાસ કરી રહી હતી. પકડાયેલા આરોપીઓએ પાટણ સુધી ચોરીના ચંદનનું વેચાણ કર્યું હોવાનું કબૂલ્યું હતું, જેથી આંધ્રપ્રદેશની પોલીસની ટુકડી સવારે પાટણ પહોંચી હતી અને સ્થાનિક પોલીસની મદદથી હાજીપુરના ગોડાઉનમાંથી ચંદનનાં લાકડાં કબજે કર્યાં હતાં.
