Bhagwant Mann Alcohol Test Controversy: પંજાબના રાજકારણમાં અત્યારે ભારે હલચલ મચી ગઈ છે. શુક્રવારે ચંદીગઢમાં કોંગ્રેસની પંજાબ ઈકાઈ દ્વારા મુખ્યમંત્રી ભગવંત માન સરકાર વિરુદ્ધ ઉગ્ર વિરોધ પ્રદર્શન કરવામાં આવ્યું હતું. આ પ્રદર્શન દરમિયાન કોંગ્રેસના નેતાઓએ રાજ્યના મુખ્યમંત્રી પર અત્યંત ગંભીર આરોપ લગાવતા કહ્યું કે તેઓ દારૂના નશામાં ચૂર થઈને વિધાનસભાના સત્રમાં હાજરી આપવા પહોંચ્યા હતા. આ ઘટનાને પગલે વિપક્ષી નેતાઓએ સરકારની ગંભીરતા પર સવાલ ઉઠાવ્યા છે અને લોકશાહીના મંદિર સમાન ગણાતી વિધાનસભામાં આવા વર્તનને અયોગ્ય ગણાવ્યું છે.
સ્વાતિ માલીવાલનો આક્રોશ: ‘સીએમનો આલ્કોહોલ ટેસ્ટ કરાવો અને પદ પરથી હટાવો’
આમ આદમી પાર્ટી છોડીને ભાજપમાં જોડાયેલા રાજ્યસભા સાંસદ સ્વાતિ માલીવાલે પણ આ મામલે પક્ષની મુશ્કેલીઓ વધારી દીધી છે. તેમણે સોશિયલ મીડિયા પ્લેટફોર્મ ‘X’ પર પોસ્ટ કરીને માગ કરી છે કે મુખ્યમંત્રી ભગવંત માનનો તાત્કાલિક આલ્કોહોલ ટેસ્ટ થવો જોઈએ. માલીવાલે કડક શબ્દોમાં કહ્યું હતું કે જો તેઓ દોષિત સાબિત થાય, તો તેમને તુરંત મુખ્યમંત્રી પદ પરથી બરતરફ કરી દેવા જોઈએ. તેમણે આ આખી ઘટનાને અત્યંત બેશરમીભરી ગણાવી પંજાબના હિતમાં કડક પગલાં લેવાની હિમાયત કરી છે.
आज फिर से पंजाब CM भगवंत मान लोकतंत्र के मंदिर पंजाब विधानसभा में शराब के नशे में चूर होकर पहुँचे हैं।
ये आदमी गुरुद्वारा साहिब शराब पीकर जाता है, मंदिर शराब पीकर जाता है, लोकसभा शराब पीकर आता था, सरकार की मीटिंग में शराब पीकर जाता है, विदेश में इतनी शराब पीली की प्लेन से उतार… pic.twitter.com/M5VngsZ1sV
— Swati Maliwal (@SwatiJaiHind) May 1, 2026
જૂના કિસ્સાઓની યાદ અપાવી: વિદેશ પ્રવાસ અને પ્લેનમાંથી ઉતારવાની ઘટનાનો ઉલ્લેખ
સ્વાતિ માલીવાલે પોતાના લખાણમાં મુખ્યમંત્રીના ભૂતકાળના વિવાદોને પણ વાગોળ્યા હતા. તેમણે દાવો કર્યો કે ભગવંત માન વારંવાર નશાની હાલતમાં પવિત્ર સ્થળો અને સભાઓમાં જાય છે. તેમણે લખ્યું કે, “આ માણસ ગુરુદ્વારા સાહિબ, મંદિર, લોકસભા અને સરકારની મીટિંગોમાં પણ દારૂ પીને પહોંચે છે”. એટલું જ નહીં, માલીવાલે વિદેશ પ્રવાસનો એક કિસ્સો યાદ અપાવતા કહ્યું હતું કે તેઓ વિદેશમાં એટલા બધા નશામાં હતા કે તેમને પ્લેનમાંથી નીચે ઉતારી દેવા પડ્યા હતા. આ પ્રકારનું વર્તન પંજાબ જેવા સંવેદનશીલ સરહદી રાજ્યના મુખ્યમંત્રીને શોભતું નથી તેવી લાગણી તેમણે વ્યક્ત કરી હતી.
માતાના સોગંધ અને પંજાબની સુરક્ષા પર ઉઠ્યા સવાલો
માલીવાલે ભગવંત માનના એ જૂના વચનનો પણ ઉલ્લેખ કર્યો જેમાં તેમણે દારૂ છોડવાની પ્રતિજ્ઞા લીધી હતી. તેમણે કહ્યું કે ચૂંટણી પહેલા માને પોતાની માતાના માથા પર હાથ રાખીને સોગંધ ખાધા હતા કે તેઓ હવે ક્યારેય દારૂ નહીં પીવે, પરંતુ વાસ્તવિકતા કંઈક અલગ જ દેખાઈ રહી છે. પંજાબ એક સંવેદનશીલ બોર્ડર સ્ટેટ હોવાથી તેની સુરક્ષા અને વહીવટી નિર્ણયો અત્યંત મહત્વના હોય છે. માલીવાલે સવાલ ઉઠાવ્યો કે જે વ્યક્તિ નશામાં ફાઈલો સાઈન કરતી હોય અને માત્ર ઊંઘતી વખતે જ દારૂથી દૂર રહેતી હોય, તે આટલા મહત્વના રાજ્યનો વહીવટ કેવી રીતે ચલાવી શકે?
કોંગ્રેસની આક્રમકતા: વિધાનસભાના વિશેષ સત્રને ગણાવ્યું ‘નાટક’
કોંગ્રેસે માત્ર નશાના મુદ્દે જ નહીં, પરંતુ સરકારના કામકાજ પર પણ પ્રહારો કર્યા હતા. મજૂર દિવસના અવસરે પંજાબ સરકાર દ્વારા વિધાનસભાનું વિશેષ સત્ર બોલાવવામાં આવ્યું હતું, જેને કોંગ્રેસી નેતાઓએ માત્ર એક ‘નાટક’ ગણાવ્યું હતું. પંજાબ કોંગ્રેસના નેતાઓએ દલીલ કરી હતી કે આ સત્રની ખરેખર કોઈ જરૂર નહોતી અને સરકાર જનતાનું ધ્યાન ભટકાવવા માટે આવા આયોજનો કરી રહી છે. આ પ્રદર્શનમાં મોટી સંખ્યામાં કાર્યકર્તાઓ અને નેતાઓ જોડાયા હતા અને ભગવંત માન સરકાર વિરુદ્ધ સૂત્રોચ્ચાર કર્યા હતા.
મજૂરોના અધિકારો અને એલ્કોમીટર ટેસ્ટની વિચિત્ર માગ
વિપક્ષી નેતા અમરિંદર સિંહ રાજા વડિંગે મજૂરોની દૈનિક મજૂરીમાં વધારો કરવાની ઉગ્ર માંગણી કરી હતી. તેમણે મજૂરોની વેદના સરકારના કાને પહોંચાડવા માટે તેમને વિધાનસભા સુધી લઈ જવાની જાહેરાત કરી હતી. બીજી તરફ, કોંગ્રેસના ધારાસભ્ય પ્રતાપ સિંહ બાજવાએ અનોખી રીતે વિરોધ કરતા કહ્યું કે, વિધાનસભાના તમામ દરવાજા બંધ કરાવો અને એલ્કોમીટર મશીન મંગાવો. તેમણે માગ કરી કે મુખ્યમંત્રી સહિત તમામ સભ્યોનો આલ્કોહોલ ટેસ્ટ થવો જોઈએ જેથી સત્ય બહાર આવે. બાજવાએ આક્ષેપ કર્યો હતો કે ગૃહની ગરિમા જાળવવા માટે આ ટેસ્ટ અનિવાર્ય છે.
આ પણ વાંચો:
