Deepali Tiwari Mohanlal Controversy: ઉત્તર પ્રદેશના મહોબા જિલ્લામાં ભારતીય જનતા પાર્ટીની અંદર આંતરિક વિવાદે એક ગંભીર અને શરમજનક વળાંક લીધો છે. ભાજપના પૂર્વ જિલ્લા મંત્રી દીપાલી તિવારીએ પોતાની જ પાર્ટીના વર્તમાન જિલ્લા અધ્યક્ષ મોહનલાલ કુશવાહા પર અત્યંત ગંભીર આરોપો લગાવ્યા છે. દીપાલીનો આરોપ છે કે જ્યારે તેમણે સંગઠનમાં જિલ્લા ઉપાધ્યક્ષ કે મહામંત્રી જેવું ઉચ્ચ પદ મેળવવા માટે રજૂઆત કરી, ત્યારે તેના બદલામાં જિલ્લા અધ્યક્ષે તેમની પાસે હમબિસ્તર થવાની (શારીરિક સંબંધ બાંધવાની) અનૈતિક માંગણી કરી હતી. આ મામલો અત્યારે આખા ઉત્તર પ્રદેશના રાજકારણમાં ચર્ચાનો વિષય બન્યો છે અને પોલીસ કચેરી સુધી પહોંચી ગયો છે.
ધમકી અને શોષણના ગંભીર આક્ષેપો સાથે એસપી ઓફિસે રજૂઆત
આ મામલામાં ન્યાયની આશા સાથે પૂર્વ જિલ્લા મંત્રી દીપાલી તિવારી એસપી (SP) ઓફિસ પહોંચ્યા હતા અને લેખિત ફરિયાદ આપી હતી. મીડિયા સાથે વાતચીત કરતા તેમણે જણાવ્યું કે મોહનલાલજીએ બધી જ મર્યાદાઓ પાર કરી દીધી છે. દીપાલીના જણાવ્યા મુજબ, જ્યારે તેમણે જિલ્લા અધ્યક્ષની શરત માનવાનો ઇનકાર કર્યો, ત્યારે તેમને ધમકી આપવામાં આવી હતી કે જો તેઓ શાંત નહીં રહે તો તેમના પતિ પર ખોટા કેસ કરીને જેલમાં ધકેલી દેવામાં આવશે. તેમણે વધુમાં ઉમેર્યું કે તેઓ છેલ્લા ૧૦ વર્ષથી પાર્ટી માટે નિષ્ઠાપૂર્વક કામ કરી રહ્યા છે, પરંતુ પદ આપવાના બદલામાં આ પ્રકારનું શોષણ અત્યંત આઘાતજનક છે. તેમણે હવે હાઈકમાન્ડ પાસે મોહનલાલ કુશવાહાને પદ પરથી હટાવવાની માંગ કરી છે.
કોણ છે દીપાલી તિવારી? સ્વાતંત્ર્ય સેનાની પરિવાર સાથેનો સંબંધ
ભાજપના જિલ્લા અધ્યક્ષ સામે બાંયો ચઢાવનાર દીપાલી તિવારી એક પ્રતિષ્ઠિત રાજકીય પૃષ્ઠભૂમિ ધરાવે છે. તેઓ મૂળ ઉત્તર પ્રદેશના કૌશામ્બી જિલ્લાના વતની છે અને તેમના દાદા મંગલા પ્રસાદ તિવારી, જેઓ ‘જર્મન માસ્ટર’ તરીકે જાણીતા હતા, તેઓ એક સ્વાતંત્ર્ય સેનાની અને ચાયલ વિધાનસભા બેઠકના ધારાસભ્ય પણ રહી ચૂક્યા છે. દીપાલી તિવારી પોતે પણ છેલ્લા ૧૦ વર્ષથી ભાજપમાં સક્રિય છે અને ‘બેટી બચાવો, બેટી પઢાવો’ અભિયાનના જિલ્લા સંયોજક તરીકે જવાબદારી નિભાવી ચૂક્યા છે. લગભગ ૯ વર્ષ સુધી જિલ્લા મંત્રી તરીકે સેવા આપ્યા બાદ આ વર્ષની શરૂઆતમાં તેમણે પોતાના પદેથી રાજીનામું આપ્યું હતું.
જિલ્લા અધ્યક્ષનો બચાવ: આરોપોને ગણાવ્યા પાયાવિહોણા
બીજી તરફ, આ ગંભીર આરોપોનો સામનો કરી રહેલા મહોબા ભાજપના જિલ્લા અધ્યક્ષ મોહનલાલ કુશવાહાએ પોતાની સફાઈ રજૂ કરી છે. તેમણે મીડિયા સમક્ષ આ તમામ વાતોનું સખત શબ્દોમાં ખંડન કરતા જણાવ્યું કે આ આરોપો સંપૂર્ણપણે પાયાવિહોણા અને ખોટા છે. કુશવાહાના મતે, આ તેમની રાજકીય છબી ખરાબ કરવાનું એક મોટું કાવતરું છે અને આ વિવાદ સાથે તેમને કોઈ લેવાદેવા નથી. હાલમાં પોલીસ આ મામલે તપાસ કરી રહી છે અને પક્ષના મોવડી મંડળની નજર પણ આ સમગ્ર ઘટનાક્રમ પર છે. જોકે, પોતાની જ પાર્ટીની મહિલા કાર્યકર દ્વારા લગાવવામાં આવેલા આ આરોપોએ ભાજપ માટે સ્થાનિક સ્તરે ક્ષોભજનક સ્થિતિ પેદા કરી છે.
આ પણ વાંચો:
