Fake Toll Collection: રાજ્યમાં નકલી કોર્ટ,નકલી ઉચ્ચ અધિકારીઓ,નકલી સરકારી કચેરીઓ,વગરે અગાઉ ઘણુંબધું સામે આવી ચૂક્યું છે ત્યારે હવે જાગૃત નાગરિકોની મદદથી નકલી ટોલનાકુ પકડાયું છે કામરેજના ચોર્યાસી ગામ સીમ હદમાં નેશનલ હાઈવેને ગ્રામ્ય વિસ્તાર સાથે જોડતા રસ્તા પર એક નકલી ટોલનાકું ઊભું કરી કેટલાક લોકો વાહન ચાલકો પાસેથી ગેર કાયદે ઉઘરાણુ કરી રહયા હોવાની ચોંકાવનારી વિગતો સામે આવતા પોલીસે તપાસ શરૂ કરી છે.
હાઈવે પરના મુખ્ય ટોલનાકા ઉપર ટેક્સથી બચવા અને તેને બાયપાસ કરવા માટે ઘણા વાહનચાલકો આ રસ્તાનો ઉપયોગ કરતા હતા. આ તકનો ફાયદો ઉઠાવી કેટલાક તત્વોએ અહીં ટોલનાકુ નાખી રોકડી કરવાનું શરૂ કર્યું હતું અને પસાર થતા નાના-મોટા વાહનો પાસેથી રસીદ આપી ગેર કાયદે ટોલ વસુલવાનું શરૂ કર્યું હતુ આ નકલી ટોલનાકા ઉપરથી પસાર થનારા કાર સહિતના નાના વાહન પાસેથી ₹50 અને મોટા વાહનો પાસેથી ₹100 ની વસૂલાત કરવામાં આવતી હતી.
જોકે,આજના ઝડપી અને મોબાઈલ યુગમાં જાગૃત નાગરિકોને શંકા જતા તેઓએ ટોલનાકુ ચલાવનારાઓ પાસે ટોલનાકાની ડિટેઇલ અને મંજૂરી માંગતા તેઓ સંતોષકારક જવાબ આપી શક્યા નહોતા. આ સમગ્ર ગેરરીતિનો વીડિયો સોશિયલ મીડિયા પર વાઈરલ થયા બાદ કામરેજ પોલીસે તપાસ કરવાની ફરજ પડી હતી. ત્યારબાદ જનતામાં હોબાળો થતા પોલીસે આ ગેરકાયદે ટોલનાકું ત્યાંથી હટાવી દીધું હતું.પોલીસે ટોલ ઉઘરાવવામાં આવતી રસીદો પણ કબજે લીધી હતી.
ગેરકાયદે ટોલ વસૂલી કરવાના પ્રકરણમાં સંચાલકોએ ગ્રામ પંચાયતનો ઠરાવ હોવાનો દાવો કર્યો છે. જોકે, પંચાયત આ રીતે રસ્તા પર ટોલ નાખીને નાણાં ઉઘરાવી શકે કે કેમ? તે અંગે તાલુકા વિકાસ અધિકારી (TDO)ને જાણ કરવામાં આવી છે.
જોકે, આ રીતે જાહેરમાં ટોલનાકુ ઉભું કરી જાહેરમાં ગેરકાયદે ટોલ વસૂલ કરવામાં આવતો હોવાછતાં પોલીસ કે વહીવટી તંત્રને આ બાબતની જાણ કેમ ન થઈ? તે એક મોટો સવાલ છે. હાલમાં ટોલનાકું હટાવી દેવાયું છે, પરંતુ સંચાલકો સામે હજુ સુધી કોઈ કડક કાયદેસરની કાર્યવાહી કે ગુનો નોંધવામાં આવ્યો નથી, જેને લઈને લોકોમાં આક્રોશ જોવા મળી રહ્યો છે.
મહત્વનું છે કે આ પહેલા પણ મોરબીના વઘાસીયા પાસે નકલી ટોલનાકુ ઝડપાયું હતું ત્યાં પણ ફોર વ્હીલર – 50 રૂપિયા,મેટાડોર અને આઇસરના – 100 રૂપિયા ટ્રકના 200 રૂપિયા ઉઘરાવવામાં આવતા હતા.
■ અગાઉ નકલી કોર્ટ અને નકલી સરકારી કચેરીનો પણ ભાંડાફોડ થયો હતો.
અત્રે ઉલ્લેખનીય છે કે રાજ્યના પાટનગર ગાંધીનગરમાં જ નકલી કોર્ટ બનાવી ‘જજ’ તરીકે ચુકાદા આપતા મોરિસ સેમ્યુઅલ ક્રિશ્ચિયનની ધરપકડ કરવામાં આવી હતી તે સમયે ભારે હોબાળો થયો હતો.
■નકલી સરકારી કચેરી
છોટાઉદેપુરમાં પણ આખેઆખી નકલી સરકારી કચેરી બની ગઈ હતી,આ નકલી કચેરી “કાર્યપાલક ઇજનેર, સિંચાઈ પ્રોજેક્ટ વિભાગ, બોડેલી” ના નામે ચાલતી હતી.આ કચેરી માત્ર કાગળ પર જ અસ્તિત્વમાં હતી. આરોપીઓએ નકલી લેટરપેડ અને સિક્કા બનાવીને સિંચાઈના વિવિધ કામો મંજૂર કરાવ્યા હતા.
નવાઈની વાત તો એ છે કે આ નકલી કચેરીના નામે સરકારના આદિજાતિ પ્રાયોજના વિભાગમાંથી અંદાજે ₹4.15 કરોડ જેટલી ગ્રાન્ટ મેળવી લીધી હતી આ નકલી સરકારી કચેરીનું કૌભાંડ પણ અગાઉ ખૂબ ગાજ્યું હતું.આમ,નકલી કોર્ટ,નકલી કચેરી,નકલી ટોલ નાકા વગરે સરકારી નકલી વિભાગો ઉભા થઇ જતા હોવાછતાં આપણા દેશી તંત્રને ખબર પડતી નથી અને જાગૃત નાગરિકોની દરમિયાનગિરી બાદ મોડે મોડે ખબર પડે છે ત્યાં સુધીમાં અનેક નાગરિકો લૂંટાઈ ચુક્યા હોય છે.
આ પણ વાંચો:
OIC: “ઇસ્લામિક વર્લ્ડ” એકજ ઝાટકે ખતમ; ઈઝરાયેલ-અમેરિકા સામે 57 દેશોનું સંગઠન “કાગનો વાઘ” સાબિત થયુ!
