Gujarat police:તાજેતરમાં દિલ્હીમાં થયેલા કાર બ્લાસ્ટ તેમજ ગુજરાતમાં પણ આતંકીઓની હાજરી મળવાની ઘટનાઓ બાદ હવે પોલીસે થોડા એડવાન્સ પગલાં ભરવાનું અને પોલીસને એલર્ટ રાખવા કવાયત શરૂ થઈ છે અને તે માટે કુખ્યાત ઇસમોની ગતિવિધિઓ ઉપર નજર રાખવા સૂચના અપાઈ છે એટલુંજ નહિ પણ છેલ્લા 30 વર્ષમાં ગુજરાતના કોઈપણ પોલીસ સ્ટેશનમાં રાષ્ટ્ર વિરોધી પ્રવૃત્તિઓ સંબંધિત કેસ થયેલા હોય તેવા હિસ્ટ્રીસીટરની યાદી તૈયાર કરવા રાજ્યના દરેક પોલીસ કમિશનર અને જિલ્લા પોલીસ વડાને DGPએ આદેશ કર્યો છે.
છેલ્લા ત્રણ દાયકામાં રાષ્ટ્ર વિરોધી પ્રવૃત્તિઓમાં ઝડપાયેલા હિસ્ટ્રીશીટર્સનું આગામી 100 કલાકમાં જ એક ડોઝિયર તૈયાર કરવા રાજ્યના તમામ પોલીસ કમિશનર અને જિલ્લા પોલીસ અધિક્ષકો (SP)ને સૂચના અપાતા રાજ્યના દરેક પોલીસ મથકમાં ભારે દોડધામ મચી છે અને રિપોર્ટ માટે જૂની ફાઈલો શોધી ડેટા કાઢવાની કામગીરી શરૂ કરી દીધી છે.
પોલીસ અધિકારીઓને સૌ પ્રથમ આવા તમામ ઈસમોની પ્રાથમિક સૂચિ તૈયાર કરવાની રહેશે.
ત્યારબાદ તે દરેક ઈસમોની વર્તમાન સ્થિતિ, વર્તમાન પ્રવૃત્તિઓની પુષ્ટિ કરવા માટે વિગતવાર ચકાસણી કરી રિપોર્ટમાં સામેલ કરવાની રહેશે.
ગુજરાતના રાજ્ય પોલીસ વડા વિકાસ સહાયે આદેશ કરતા જણાવ્યું છે કે તમામચકાસણી પ્રક્રિયા સંપૂર્ણ હોવી જોઈએ,જેમાં રેકોર્ડ-ચેકિંગ, ફિલ્ડ પૂછપરછ અથવા કેસ હિસ્ટરીની પુષ્ટિમાં કોઈ કચાશ ચલાવી લેવામાં નહિ આવે.આ ચકાસણી પૂર્ણ થઈ ગયા બાદ પોલીસ યુનિટોએ અંતિમ સંકલિત ડોઝિયર તૈયાર કરવાનું રહેશે જેમાં અપડેટેડ પ્રોફાઇલ્સ, કેસની વિગતો સામેલ હોવી જોઈએ, જે આગામી 100 કલાકમાં રાજ્ય પોલીસ વડાને સુપરત કરવાની રહેશે.
દિલ્હીમાં બનેલા કાર બ્લાસ્ટ બાદ ગુજરાતમાં પણ અગાઉથી ગુનાહિત માનસ ધરાવતા ઇસમોનો રેકોર્ડ તૈયાર કરવા કાર્યવાહી શરૂ થઈ છે જેથી કોઈપણ ગતિવિધિ ઉપર નજર રાખી શકાય.કવાયતનો હેતુ રાષ્ટ્રીય હિતોની વિરૂદ્ધ ગણાતા ગુના સાથે જોડાયેલા વ્યક્તિઓના રાજ્ય-સ્તરના ડેટાબેઝને અપડેટ રાખવાનો તેમજ વિવિધ જિલ્લામાં દેખરેખની પદ્ધતિને મજબૂત બનાવવાનો હોવાનું માનવામાં આવી રહ્યું છે.
આ પણ વાંચો:
Surat: માતાજીના પંડાલમાં હુક્કાબાર સોંગ્સ પર યુવતીઓનો અશ્લિલ ડાન્સ, વીડિયો વાયરલ થતા વિવાદ
Maharashtra: ઉદ્ધવ ઠાકરેએ સોનમ વાંગચુકની ધરપકડ મામલે કેન્દ્ર સરકારની કાઢી ઝાટકણી
Rajasthan: BJP કાર્યકર્તાઓએ કેન્સરના દર્દીઓને બિસ્કિટ આપ્યા, ફોટા પડાવ્યા અને બિસ્કીટ પાછા લઈ લીધા
