પ્રજાસત્તાક દિવસ(Republic Day)ના દિવસે તિરંગાનું અપમાન કરનાર ખાલિસ્તાની સમર્થકોને તેમની ભાષામાં જવાબ આપ્યોછે. લંડનમાં પ્રજાસત્તાક દિવસની ઉજવણી દરમિયાન ભારત વિરુદ્ધ સૂત્રોચ્ચાર કરી રહેલા ખાલિસ્તાન સમર્થકોની ભારતીય સમુદાય સાથે અથડામણ થઈ હતી.
સમાચાર એજન્સી ANI સાથે વાત કરતા, ભારતીય સમુદાયના એક વ્યક્તિએ કહ્યું, અમે 76મા પ્રજાસત્તાક દિવસની ઉજવણી માટે હાઇ કમિશન ખાતે ભેગા થયા હતા. ત્યારે અમે ખાલિસ્તાન સમર્થકોને ભારત વિરુધ્ધ નારા લગાવતાં જોયા હતા. આ પછી એકત્રિત થઈ વિરોધનો જવાબ આપ્યો હતો.
ખાલિસ્તાન સમર્થકોએ ત્રિરંગા ધ્વજનું અપમાન કર્યું
જ્યારે બીજા એક વ્યક્તિએ કહ્યું કે, અમે પ્રજાસત્તાક દિવસ નિમિત્તે ભારતીય ઉચ્ચાયોગમાં ધ્વજ ફરકાવવા આવ્યા હતા. અમે જોયું કે કેટલાક ખાલિસ્તાની સમર્થકો હાઈ કમિશનની બહાર ભેગા થયા હતા અને આપણા ભારતીય રાષ્ટ્રધ્વજનું અપમાન કરી રહ્યા હતા. હું કહેવા માંગુ છું કે આ પ્રવૃતિઓથી આપણા દેશને કોઈ ફરક પડતો નથી. ભલે આપણી સંખ્યા ઓછી હોય, પણ આપણી હિંમત તેમના કરતા વધારે છે. અમે અમારા છેલ્લા શ્વાસ સુધી લડીશું.
ANI દ્વારા શેર કરાયેલા વીડિયોમાં જોઈ શકાય છે કે બંને પક્ષો એકબીજા વિરુદ્ધ સૂત્રોચ્ચાર કરી રહ્યા છે. પરિસ્થિતિને કાબુમાં લેવા માટે પોલીસ પણ સ્થળ પર હાજર છે.
ખાલિસ્તાન સમર્થકોએ ફિલ્મ ઈમરજન્સીનો વિરોધ કર્યો
તાજેતરમાં, બ્રિટનમાં ઘણી જગ્યાએ ખાલિસ્તાન સમર્થકોએ ફિલ્મ ઇમરજન્સી વિરુદ્ધ રમખાણો કર્યા હતા. ભારતે પણ બદમાશોની આ કાર્યવાહી પર ચિંતા વ્યક્ત કરી હતી. વિદેશ મંત્રાલયના પ્રવક્તા રણધીર જયસ્વાલે કહ્યું કે ભારતને આશા છે કે ફિલ્મના પ્રદર્શનમાં ખલેલ પહોંચાડનારાઓને જવાબદાર ઠેરવવામાં આવશે.
આ પણ વાંચોઃ ઉત્તરાખંડમાં આજથી UCC લાગુ?, લગ્ન અને લિવ-ઇન માટે શું છે નિયમ?
