MLA Umesh Makwana: બોટાદના ધારાસભ્ય ઉમેશ મકવાણાએ ગુજરાતની સરકારી શાળાઓમાં શિક્ષકોની ઘટને લઈને મુખ્યમંત્રી ભૂપેન્દ્ર પટેલ અને શિક્ષણમંત્રી કુબેર ડિંડોરને ભાવી શિક્ષકો સાથે મુલાકાત કરી રજૂઆત કરી. તેમણે માંગણી કરી કે સરકારે શિક્ષકોની ખાલી જગ્યાઓ ભરવા માટે તાત્કાલિક ભરતીનો રાઉન્ડ બહાર પાડવો જોઈએ. ખાસ કરીને, છેલ્લા 15 વર્ષથી વ્યાયામ, સંગીત, ચિત્રકામ અને કમ્પ્યુટર જેવા વિષયોના શિક્ષકોની ભરતી ન થઈ હોવાથી આ ખાલી જગ્યાઓ પણ કાયમી ધોરણે ભરવામાં આવે, એવી રજૂઆત કરી હતી.
આપના સસ્પેન્ડેડ ધારાસભ્ય મુખ્યમંત્રીને મળ્યા
ઉમેશ મકવાણાએ જણાવ્યું કે, સરકારી શાળાઓમાં મોટાભાગે પછાત વર્ગ, SC, ST, OBC અને EWS સમાજના બાળકો અભ્યાસ કરે છે. શિક્ષકોની ઘટને કારણે આ વિદ્યાર્થીઓના શિક્ષણ પર ગંભીર અસર થઈ રહી છે. તેમણે સવાલ ઉઠાવ્યો કે, “જો શિક્ષકો જ નહીં હોય તો વિદ્યાર્થીઓ કેવી રીતે અભ્યાસ કરશે?” તેમણે સરકારના ‘બેટી બચાવો, બેટી પઢાવો’ અભિયાન પર પણ ટિપ્પણી કરી, કે શાળાઓમાં શિક્ષકોની અછત હોય તો આવા સૂત્રોનો શું અર્થ રહે છે?
ઉમેશ મકવાણાએ કેમ આપી ધરણાની ચીમકી?
આ મુદ્દે કડક વલણ અપનાવતા ઉમેશ મકવાણાએ ચેતવણી આપી કે, જો શિક્ષકોની ભરતી માટે તાત્કાલિક પગલાં નહીં લેવાય, તો તેઓ શિક્ષક દિવસના રોજ ભાવી શિક્ષકો સાથે ધરણા પર બેસશે.
ઉમેશ મકવાણાએ આપ્યું હતું રાજીનામું
ઉમેશ મકવાણાનું આ પગલું રાજકીય રીતે પણ ચર્ચામાં છે, કારણ કે તેઓ અગાઉ આમ આદમી પાર્ટી (AAP)ના ગુજરાત વિધાનસભાના દંડક (વ્હીપ) અને રાષ્ટ્રીય જોઈન્ટ સેક્રેટરી પદેથી રાજીનામું આપી ચૂક્યા છે. આ રાજીનામાંથી AAPમાં નેતૃત્વ, ખાસ કરીને પ્રદેશ પ્રમુખ ઇસુદાન ગઢવી સામે નારાજગી વ્યક્ત કરી હતી. તેમણે આરોપ લગાવ્યો હતો કે AAP પછાત સમાજની ઉપેક્ષા કરે છે અને સવર્ણોને પ્રાધાન્ય આપે છે. આ રાજીનામા બાદ AAPએ તેમને પાર્ટી વિરોધી પ્રવૃત્તિઓના આરોપે 5 વર્ષ માટે સસ્પેન્ડ કર્યા હતા.
ઉમેશ મકવાણાની ભાજપમાં જોડાવાની અટકળો
જોકે, ઉમેશ મકવાણાએ ધારાસભ્ય પદેથી રાજીનામું આપવાનો ઇનકાર કર્યો હતો અને જણાવ્યું હતું કે તેઓ બોટાદની જનતાની સલાહથી આગળનો નિર્ણય લેશે. તેમણે એમ પણ કહ્યું હતું કે જો રાજીનામું આપશે તો અપક્ષ ઉમેદવાર તરીકે ચૂંટણી લડશે અથવા નવી પાર્ટી બનાવશે. આ દરમિયાન, તેમના ભાજપમાં જોડાવાની અટકળો પણ ચાલી હતી, જેનું તેમણે ગાંધીનગરમાં પત્રકાર પરિષદ યોજીને ખંડન કર્યું હતું. તેમણે આવી અફવાઓ ફેલાવનારાઓ સામે કાયદેસર કાર્યવાહીની ચેતવણી પણ આપી હતી.
શિક્ષકોના મુદ્દે સક્રિયતા કે રાજકીય ચાલ?
લાંબા સમયથી રાજકીય રીતે નિષ્ક્રિય રહેલા ઉમેશ મકવાણા હવે શિક્ષકોની ભરતીના મુદ્દે સક્રિય થયા છે. આ મુદ્દે તેમની ધરણાની ચેતવણીએ રાજકીય ચર્ચાઓને જન્મ આપ્યો છે. કેટલાકનું માનવું છે કે આ ભાવી શિક્ષકોના હિતમાં ઉઠાવેલું પગલું છે, જ્યારે કેટલાક એવું માને છે કે આ તેમની રાજકીય સક્રિયતા અને પ્રભાવ પુનઃસ્થાપિત કરવાનો પ્રયાસ હોઈ શકે છે. બોટાદની જનતા અને રાજકીય વર્તુળોમાં આ મુદ્દે ચર્ચા ગરમ છે કે ઉમેશ મકવાણાનું આ પગલું શિક્ષણની ચિંતા છે કે રાજકીય લાભનો એક ભાગ છે.
આ ઘટનાઓથી સ્પષ્ટ છે કે ઉમેશ મકવાણા ફરી એકવાર રાજ્યના રાજકીય અને સામાજિક પટલ પર સક્રિય થયા છે, અને આગામી દિવસોમાં તેમના પગલાં ગુજરાતના રાજકારણમાં નવો વળાંક લાવી શકે છે.
આ પણ વાંચો:
Jharkhand: ચોરીની શંકામાં મહિલા સાથે દુરવ્યવહાર, સેન્ડલની માળા પહેરાવી ગામમાં ફેરવી
Uttarakhand: હાઈકોર્ટ જતા અધિકારીઓની કાર પર પડ્યો મોટો પથ્થર, માત્ર 1 સેકન્ડ જીવ લઈ લેત
Japanese Protest: ‘જાપાનમાંથી ગેરકાયદેસર રહેતાં લોકોને બહાર કાઢો!’, મસ્કે આપ્યો ટેકો
