Protest Against Pollution: દિલ્હીમાં દિનપ્રતિદિન એર પૉલિયુશન વધી રહ્યું છે અને લોકોના સ્વાસ્થ બગડી રહયા છે જે અંગે વારંવાર અહેવાલો સામે આવી રહયા છે તેમછતાં સરકાર પ્રદૂષણનો ઉકેલ લાવવામાં નિષ્ફળ રહેતા લોકો રસ્તા ઉપર ઉતર્યા છે અને પ્રદૂષણનો વિરોધ કરી રહયા છે ત્યારે લોકો દિલ્હીના ઇન્ડિયા ગેટ પર એકત્ર થઈ વિરોધ કરી રહયા હતા અને એર પોલ્યુશનના વિરોધ પ્રદર્શન દરમિયાન ઘૂસી આવેલા કેટલાક યુવાનોએ અચાનક પોલીસ એન્કાઉન્ટરમાં માર્યા ગયેલા નક્સલી કમાન્ડર ‘હિડમા અમર રહો’ના નારા લગાવતા મામલો ગંભીર બની ગયો અને પોલીસ સાથે ઘર્ષણ ઉભું થતા નાસભાગ મચી હતી.
ઇન્ડિયા ગેટ પર આવી ચડેલા કેટલાક યુવા પ્રદર્શનકારીઓએ હિડમાના નામવાળા પ્લેકાર્ડ અને પોસ્ટરો સાથે દેખાવો શરૂ કર્યા હતા અને “હિડમા અમર રહો” ના નારા લગાવી સિસ્ટમ સામે રોષ વ્યકત કરી તેમાં ફેરફારની માંગ કરી રહ્યા હતા.
આ દરમિયાન ઘર્ષણ ઉભું થતાં પ્રદર્શનકારીઓએ પોલીસ ટીમ પર મરચાં છાંટતા ત્રણથી ચાર પોલીસકર્મીઓને ઇજા થતાં તેઓને રામ મનોહર લોહિયા હોસ્પિટલમાં લઈ જવાયા હતા. આ ઘટનામાં પોલીસે 15 પ્રદર્શનકારીઓની અટકાયત કરી છે.
એક વરિષ્ઠ પોલીસ અધિકારીએ જણાવ્યું હતું કે મંગળવારે સાંજે લગભગ 4.30 વાગ્યે કેટલાક પ્રદર્શનકારીઓ ઇન્ડિયા ગેટના સી-હેક્સાગોન ખાતે એકઠા થયા હતા. તેઓ દિલ્હીમાં પ્રદુષણની સમસ્યા સામે વિરોધ કરી રહ્યા હતા અને સારી સ્વચ્છ હવા માટે માંગ કરી રહયા હતા જે શાંત વિરોધ પ્રદર્શન હતું પણ આ દરમિયાન કેટલાક અન્ય પ્રદર્શનકારીઓએ નક્સલી હિડમાના સમર્થનમાં સૂત્રોચ્ચાર કરવાનું શરૂ કર્યું ત્યારે ત્યાં હાજર પોલીસ ટીમે તેમને વિખેરાઈ જવાની સૂચના આપી, પરંતુ તેઓએ પોલીસની સૂચનાનું પાલન ન કર્યું અને સૂત્રોચ્ચાર કરવાનું ચાલુ રાખ્યું.
ત્યારબાદ પોલીસે પ્રદર્શનકારીઓને ઘટનાસ્થળેથી દૂર કરવાનું શરૂ કર્યું. એવો આરોપ છે કે પ્રદર્શનકારીઓએ પોલીસ ટીમ પર પેપર સ્પ્રેનો ઉપયોગ કર્યો હતો, જેના કારણે અરાજકતા સર્જાઈ હતી અને પોલીસ અને પ્રદર્શનકારીઓ વચ્ચે થોડી ઝપાઝપી થઈ હતી. એક પોલીસ અધિકારીએ જણાવ્યું હતું કે પેપર સ્પ્રેથી ત્રણથી ચાર પોલીસકર્મીઓ ઘાયલ થયા હતા. તેમણે આંખોમાં બળતરાની ફરિયાદ કરી હતી. તેમને તાત્કાલિક નજીકની RML હોસ્પિટલમાં દાખલ કરવામાં આવ્યા હતા. તમામ પોલીસકર્મીઓ હોસ્પિટલમાં સારવાર લઈ રહ્યા છે, આ મામલે 15 પ્રદર્શનકારીઓની અટકાયત કરવામાં આવી છે અને તેમની પૂછપરછ કરવામાં આવી રહી છે. હિંસક વર્તન અને પોલીસ દળ પર હુમલા માટે તેમની સામે કડક કલમો હેઠળ ગુનો દાખલ કરવામાં આવશે.
ઘટના બાદ ઇન્ડિયા ગેટ પર સુરક્ષા વધારી દેવામાં આવી છે. આમ,પ્રદુષણ મામલે વિરોધ કરવા જાગૃત લોકો રસ્તા ઉપર ઉતર્યા તે વખતે અન્ય નકસલી હિડમાના સમર્થકો ત્યાં ઘૂસી જતા પ્રદૂષણનો મામલો સાઈડ ઉપર રહી ગયો અને નકસલી મામલે પોલીસ સાથે ઘર્ષણ થતાં નાસભાગ મચી હતી અને ટ્રાફિક જામ થઈ જતા અફરા તફરી મચી હતી.
આ પણ વાંચો:
Rupee Hits Record Low Against Dollar: ભારતના ઇતિહાસમાં પ્રથમવાર રૂપિયો આટલો નબળો પડયો:મોંઘવારી વધશે
