Rajkot Bali: માતાજીના મઢે પોલીસની રેડ, ભૂવો મુઠ્ઠી વાળીને ભાગ્યો(VIDEO)

Rajkot Bali: રાજકોટ તાલુકાના બેડલા ગામની સીમમાં માતાજીના મઢે પોલીસ સાથે દરોડો પાડતાં ભક્તોમાં નાસભાગ મચી ગઈ હતી. જો કે ભૂવો બકરાની બલીનો પ્રસાદ લઈ નાસી જવામાં સફળ રહ્યો છે. જ્યારે પોલીસે 4 જેટલાં બકરાને બચાવ્યા છે. હાલ પોલીસે આ મામલે વધુ કાર્યવાહી હાથ ધરી છે.

પ્રાપ્ત વિગતો અનુસાર રાજકોટના બેડલા ગામની સીમમાં માતાજીના મઢે બકરાની બલી ચઢતી હોવાની બાતમી એરપોર્ટ પોલીસને મળી હતી. જેથી ગઈકાલે ભારત જન વિજ્ઞાન જાથા સંસ્થાના સ્થાપક જયંત પંડ્યા સાથે મળી સંયુક્ત રીતે બેડલા ગામના માતાજીના મઢે પોલીસે રેડ પાડી હતી. જેથી બકરાઓની બલી ચઢાવતાં ભક્તોમાં નાસભાગ મચી ગઈ હતી. આરોપી ભૂવો બકરાની બલીનો પ્રસાદ લઈ નાસી છૂટ્યો હતો. ભૂવો કારમાં બેસી ફરાર થઈ ગયો હતો. પાંચ બકરામાંથી ભૂવાએ એક બકરાની બલી ચડાવી દીધી હતી. જ્યારે 4 બકરાને પોલીસે બચાવી લીધા છે. હાલ પોલીસે બેડલા ગામની સીમ, રફાળા, ફાળદંગ, રામપરા, પારેવાડા સ્થળોએ તપાસ હાથ ધરી છે.

જાણવા મળી રહ્યુ છે કે ભૂવો દર 15 દિવસે બકરાની બલી ચઢાવી મિજબાની માણતો હતો. લોકોને બાંધા આપતો હતો. જેથી લોકોના રુપિયે ભૂવો બકરાનું માસ ખાતો હતો. બકરાનું મટન ખાવાની ભૂવાને આદત પડી જતાં માતાજીના મઢે દર 15 દિવસે બલીની પરંપરા ઉભી કરી હતી. અહીં 20થી 25 વર્ષથી બકરા બલીની પ્રથા ચાલુ છે. ભૂવો એક જ ગામમાં ચાર-પાંચ સ્થળે પશુબલી ચઢાવતો હોવાનું સામે આવ્યું છે. ભૂવાએ અલગ અલગ ધાર્મિક સ્થળોએ માનતાના નામે પશુબલી કરવી કાનુની અપરાધ કર્યો છે. જો કે ગ્રામજનો આ મામલે કંઈ પણ બોલવા તૈયાર નથી. લોકોને પોતાનું નામ જાહેર ન કરવા ભૂવો ભય બતાવી રહ્યો હોવાના આક્ષેપ થયા છે.

બેડલા ગામને બલીપ્રથાથી મુક્ત કરાવવા પોલીસ અને વિજ્ઞાન જાથા આંદોલન કરશે. પખવાડીયામાં ગામમાં પોલીસ સાથે જાથા જાગૃતિ કેળવશે. આક્ષેપ થયા છે કે પ્રતિ વર્ષ ચૈત્ર નોમ, પુનમ, બીજ અને અમાસના દિવસે સદીઓથી બલી પ્રથા સ્થાનિક તંત્રએ ચાલવા દીધી છે. જેથી લોકોને અંધશ્રધ્ધાનો ભોગ બનાવતાં ભૂવા સામે કાર્યવાહી થયા તેવી માગ ઉઠી છે.