Sabarkantha: ભાવફેર અને સરકારના હસ્તક્ષેપ મુદ્દે દૂધ ઉત્પાદકોનો આક્રોશ, પોલીસકર્મીઓને માથામાં ઈજાઓ

દૂધ ઉત્પાદકોએ ડેરી બહાર આવી સૂત્રોચ્ચાર કરી દેકારો મચાવતાં વાતાવરણ તંગ
સહકારી સંસ્થાઓમાં સરકારનો હસ્તક્ષેપ મૃત્યુ ઘંટ વગાડશે?
આંદોલન રાજકીય પ્રેરિત હોવાની ચર્ચા
બાયડના અપક્ષ ધારાસભ્ય સમર્થન આપવા આવ્યા

Sabarkantha Sabar Dairy News: સાબરકાંઠા-અરવલ્લીના દૂધ ઉત્પાદકો દર વર્ષે સાબરડેરી દ્વારા જૂન અથવા જુલાઈ મહિનામાં ભાવફેર(વધારો) ચૂકવવામાં આવે છે ત્યારે આ વર્ષે કેટલાક કારણોસર દૂધ ઉત્પાદકોને અગાઉ કરતાં ઓછો ભાવફેર ચૂકવાયો હોવાનું માનીને બંને જિલ્લાના દૂધ ઉત્પાદકોમાં કેટલાક રાજકીય લોકોએ બળતામાં ઘી હોમવાનો પ્રયાસ કરીને દૂધ ઉત્પાદકોને સાબર ડેરીના નિયામક મંડળના વિરોધમાં ખોટી ઉશ્કેરણી કરીને આંદોલન કરવા માટે ઉશ્કેરવામાં આવ્યા હતા.

જેના ભાગરૂપે આજે સોમવારે બંને જિલ્લાના અસંખ્ય દૂધ ઉત્પાદકોએ સાબર ડેરી સામે આવીને સૂત્રોચ્ચાર કરીને વાતાવરણ તંગ બનાવી દીધુ હતું. દરમ્યાન કોઈકે કાંકરીચાળો કરીને બંદોબસ્ત માટે રખાયેલા વોટર બાઉઝર પર પથ્થર માર્યો હતો, ત્યારબાદ અન્ય લોકોએ પણ પથ્થરમારો શરૂ કરતાં ત્રણથી પોલીસકર્મીને માથામાં ઈજા થઈ હતી ત્યારબાદ પોલીસે પણ ટોળાને વિખેરવા માટે તરતજ પ૦થી વધુ ટીયર ગેસના સેલ છોડયા હતા. જેથી સાબરડેરીની બહાર એકઠુ થયેલું ટોળું વિખેરાવા માંડયું હતું. એટલુ જ નહીં પણ નેશનલ હાઈવેના ઓવરબ્રિજ નીચે પણ કેટલાક દૂધ ઉત્પાદકોએ સૂત્રોચ્ચાર કરી વાહનોને અવર જવર કરવામાં અડચણ ઉભી કરી હતી. દરમ્યાન પરિસ્થિતનો તાગ મેળવી પોલીસ ટોળાને ભગાડવા માટે લાઠીચાર્જ કર્યો હતો.

Sabarkantha: ભાવફેર અને સરકારના હસ્તક્ષેપ મુદ્દે દૂધ ઉત્પાદકોનો આક્રોશ, પોલીસકર્મીઓને માથામાં ઈજાઓ#Sabarkantha #sabardairy #gujarat #milk #thegujaratreport pic.twitter.com/rr4XJCR7PL
— The Gujarat Report (@TGujarat_Report) July 14, 2025

આ અંગે સૂત્રોમાંથી મળતી માહિતી મુજબ સાબર ડેરીના નિયામક મંડળએ બંને જિલ્લાના દૂધ ઉત્પાદકોને ભાવફેરની રકમ ગત તા.11 જુલાઈના રોજ સ્થાનિક મંડળીઓ મારફતે દૂધ ઉત્પાદકોને ચૂકવાઈ હતી પરંતુ અનેક દૂધ ઉત્પાદકોની આશા અને અપેક્ષા મુજબ ગત વર્ષની સરખામણીમાં આ વર્ષે ચૂકવાયેલા ભાવફેરની રકમ ઓછી હોવાની લાગણી પ્રવર્તી હતી.

ત્યારબાદ ગામે ગામ આ મામલે દૂધ ઉત્પાદકોમાં અસંતોષ વ્યાપ્યો હતો. તો બીજી તરફ દૂધ ઉત્પાદકોને ઉશ્કેરવા માટે કેટલાક રાજકીય નેતાઓ કે જેઓ સહકારી સંસ્થાઓમાં પદ મેળવવા માટે અથવા તો પોતાનો અંગત સ્વાર્થ સિધ્ધ થાય તે માટે બે દિવસ અગાઉ સોશ્યલ મીડીયાના માધ્યમથી બંને જિલ્લાના દૂધ ઉત્પાદકોને સાબરડેરી વિરૂધ્ધ આંદોલન કરવા માટે ઉશ્કેરણી કરી હતી.

જેના ભાગરૂપે સોમવારે સવારે 10 વાગ્યાથી અનેક દૂધ ઉત્પાદકો આંદોલનમાં જોડાવવાના આશયથી સાબરડેરી બહાર આવી ગયા હતા. જોકે પરિસ્થિતીને પારખી લઈને ડેરીના સત્તાવાળાઓ દ્વારા અગાઉથી જ પોલીસ બંદોબસ્તની માંગણી કરીને કુમુક બોલાવી દીધી હતી. જયાં ડેરીમાં પ્રવેશવાના દરવાજા પર બેરીકેટ સહિત પોલીસનો લોખંડી બંદોબસ્ત ગોઠવી દેવામાં આવ્યો હતો. દરમ્યાન લગભગ બપોરના સુમારે દૂધ ઉત્પાદકોએ સૂત્રોચ્ચાર કરીને ડેરીમાં પ્રવેશ કરવાનો પ્રયાસ કર્યો હતો.

જેથી બંદોબસ્તમાં હાજર પોલીસે તેમને સમજાવીને બહાર કાઢવા માટે પ્રયાસ કર્યો હતો. દરમ્યાન બહાર ઉભેલ ટોળામાંથી કોઈકે કાંકરીચાળો કરીને સલામતીના ભાગરૂપે રખાયેલ વોટર બાઉઝર પર પથ્થર ફેંકતાં વાહનનો કાચ તૂટી ગયો હતો. ત્યારબાદ અન્ય લોકોએ પથ્થરમારો કરતાં વાતાવરણ ગરમાયું હતું. જેમાં ત્રણથી વધુ પોલીસકર્મી ઈજા થઈ હતી. ત્યારબાદ પોલીસે પણ પરિસ્થિતીને પારખી જઈને ટીયર ગેસના સાત વધુ સેલ છોડતાં ડેરીના બહાર ઉભેલું ટોળુ વિખેરાઈ ગયું હતું.

તો બીજી તરફ બંને જિલ્લાના કેટલાક સમજુ નાગરિકોનું કહેવું છે કે જયારથી પક્ષ દ્વારા સહકારી ક્ષેત્રમાં હસ્તક્ષેપ કરી વહીવટમાં દખલગીરી કરવાનું ચાલુ કર્યું છે ત્યારથી એકલા દૂધ ઉત્પાદકો નહીં પણ સમજુ નાગરિકો સરકારના આ હસ્તક્ષેપથી નારાજ છે. કેટલાકનું કહેવું છે કે જો સરકારનો હસ્તક્ષેપ વધુ ચાલુ રહેશે તો સહકારી સંસ્થાઓનો મૃત્યુ ઘંટ વાગે તો તેવી શકયતાને નકારી શકાય નહી. આજ કાલ સહકારી સંસ્થાઓના ચુંટાયેલા ડીરેકટરો સ્વતંત્ર રીતે વહીવટ કરી શકતા નથી અને નિર્ણય લેતાં પહેલા સરકારની પરવાનગી લેવી પડે છે તેવું એક સહકારી અગ્રણીએ નામ ન આપવાની શરતે જણાવ્યું હતું.

દૂધ ઉત્પાદકો શું માંગે છે ?

બંને જિલ્લાના દૂધ ઉત્પાદકોનું કહેવું છે કે અમને વધારે નહીં પણ ગત વર્ષે ચુકવવામાં આવેલ ભાવફેરની રકમ મળવી જોઈએ, ઓછી નહીં.

સાબરડેરીના એમડી શું કહે છે ?

સાબરડેરીના એમડી સુભાષ પટેલે રવિવારે સોશ્યલ મીડીયાના માધ્યમથી દૂધ ઉત્પાદકોને એવો સંદેશો આપ્યો હતો કે જો કોઈપણ દૂધ ઉત્પાદકને ભાવફેરના મુદ્દે વધુ જાણકારી જોઈતી હોય તો રૂબરૂ આવીને મેળવી શકશે.

ટોળામાં દેખાયેલા સ્વાર્થી લોકોને ઓળખો

સોમવારે થયેલા આંદોલનમાં કેટલાક સ્વાર્થી લોકોએ અગાઉ પણ દૂધ ઉત્પાદકોને ગેરમાર્ગે દોરવાનો પ્રયાસ કર્યો હતો. તથા બાયડના ધારાસભ્ય ધવલસિંહ ઝાલા અગાઉ દૂધ ઉત્પાદકોના સમર્થનમાં ટેકો જાહેર કર્યો હતો અને તેઓ સોમવારે સાબરડેરી આવ્યા હતા.

સાબરડેરીનો ગેટ તૂટ્યો

સોમવારે દેખાવો કરવા આવેલ દૂધ ઉત્પાદકો પૈકી કેટલાક દૂધ ઉત્પાદકોએ ઉશ્કેરાઈને સાબરડેરીના મુખ્ય દરવાજે જોરદાર ધસારો કરતાં લોખંડના ગેટને નુકશાન થયું હતું. ત્યારબાદ વાતાવરણ પણ ઉશ્કેરાટ ભર્યું બની ગયું હતું.

સાબરડેરીની સાધારણ સભા કયારે યોજાશે

ડેરીના એમડીએ સોશ્યલ મીડીયામાં જણાવ્યું હતું કે સાબરડેરીની સાધારણ સભા આગામી સપ્ટેમ્બર મહિનાના અંત સુધીમાં યોજવાની જોગવાઈ છે હજુ સુધી સાધારણ સભા યોજાઈ નથી જયારે પણ યોજાશે ત્યારે ઓડીટ રીપોર્ટના આધારે ડેરીનું નિયામક મંડળ અંતિમ નિર્ણય કરશે.

કેટલો પોલીસ બંદોબસ્ત ગોઠવાયો

સાબરડેરી આગળ સોમવારે દૂધ ઉત્પાદકો આંદોલન કરવાના હોવાથી કાયદો અને સલામતી જોખમાય નહીં તે આશયથી જિલ્લા પોલીસ તંત્ર દ્વારા વહેલી સવારથી જ એક ડીવાયએસપી, ચાર પીઆઈ, આઠ પીએસઆઈ, ૮૦ પોલીસ કર્મીઓ તથા વોટર બાઉઝર ઉપલબ્ધ કરી દેવાયું હતું.

સમગ્ર આંદોલન પૂર્વ યોજીત હોવાની આશંકા

સાબરડેરી આગળ એકત્ર થયેલા દૂધ ઉત્પાદકોએ જાણે કે અગાઉથી કોઈકના આડકતરા ઈશારાને લઈને સાબરડેરીના મુખ્ય ગેટ પર લગાવાયેલ બેરીકેટને બળજબરીથી હટાવી અંદર ઘુસવાનો જે પ્રયાસ કર્યો હતો તેથી અન્ય લોકોને કે જેઓ સ્થળ પર હાજર ન હતા તેમનો એવો અભિપ્રયા હતો કે સમગ્ર ઘટના પૂર્વ યોજીત હોઈ શકે છે.

એસપી વિજય પટેલે શું કહ્યું?

સાબરડેરીની બહાર બનેલી ઘટના અંગે ફરજ પરના એસપી વિજય પટેલે જણાવ્યું હતું કે સાબરડેરીએ અગાઉથી પોલીસ તંત્રને જાણ કરી હોવાથી સોમવારે સવારથી જ બંદોબસ્ત ગોઠવી દેવામાં આવ્યો હતો. જયાં અચાનક કેટલાકે પથ્થરમારો કરતાં ત્રણથી વધુ પોલીસકર્મીઓને ઈજા થતાં તેમને સારવાર માટે ખસેડાયા છે. તથા પોલીસે ર૦થી વધુ લોકોને ઓળખી કાઢયા છે જયાં જરૂર પડે કાયદેસરની કાર્યવાહી હાથ ધરાશે.

સર્વિસ રોડ પરના ઓવરબ્રિજ નીચેથી ટોળાને ભગાડી દેવાયું

સાબરડેરી પાસેથી પસાર થતા નેશનલ હાઈવે પરના ઓવરબ્રિજ નીચે અને સાબરડેરી તરફ જવાના રોડ પર બંને બાજુ કેટલાક લોકોએ ટોળા સ્વરૂપે ભેગા થઈને વાતાવરણ બગાડવાનો પ્રયાસ કરતાં પોલીસે ટીયર ગેસના સેલ છોડી તેમને ભગાડી દેવામાં આવ્યા હતા.