• ICC ચેમ્પિયન ટ્રોફી વચ્ચે પાકિસ્તાનમાં બીજો મોટો બોમ્બ વિસ્ફોટ; 9 લોકોના મોત

પાકિસ્તાન અને યુએઈમાં સંયુક્ત રીતે ચેમ્પિયન્સ ટ્રોફીની મેચો રમાઈ રહી છે તો બીજી તરફ મુસ્લિમોનો પવિત્ર રમઝાન મહિનો ચાલી રહ્યો છે. તે છતાં કટ્ટરવાદીઓ અશાંતિ ફેલાવવા અને નિર્દોષ લોકોને મોતને ઘાટ ઉતારવા માટે પોતાની નાપાક હરકતો કરી રહ્યા છે. પાકિસ્તાનમાં વધુ એક મોટો આતંકી હુમલો કરવામાં આવ્યો છે. ખૈબર પખ્તૂનખ્વાંમાં બન્નૂ આર્મી કેન્ટોનમેન્ટના બહારના વિસ્તારમાં બે ભીષણ બોમ્બ વિસ્ફોટ થયા બાદ સમગ્ર વિસ્તારમાં ખળભળાટ મચી ગયો છે. સુરક્ષાદળોએ વિસ્તારને ઘેરી લેતા આતંકીઓ સાથે ભારે અથડામણની સ્થિતિ સર્જાઈ છે. આ હુમલો પૂર્વાયોજિત હોવાનું અનુમાન છે.

સ્થાનિક મીડિયાના અહેવાલ અનુસાર સુરક્ષાદળો અને હુમલાખોરો વચ્ચે સર્જાયેલી અથડામણમાં ઓછામાં ઓછા 9 લોકો માર્યા ગયા હતા અને 35 થી વધુ ઈજાગ્રસ્ત થયા હતા. આ આતંકી હુમલા પાછળ જૈશ ઉલ ફુરસાન સંગઠનનો હાથ હોવાની જાણકારી સામે આવી રહી છે. આ સંગઠન પાકિસ્તાની સૈન્યના ગઠબંધન હાફિઝ ઉલ બહાદુરનો હિસ્સો રહે છે અને તાજેતરમાં જ આ સંગઠને ટીટીપી સાથે હાથ મિલાવ્યા હતા.

અહેવાલ અનુસાર આતંકીઓએ બે કાર બોમ્બનો ઉપયોગ કર્યો હતો જેથી સુરક્ષાદળોનું ધ્યાન ભટકાવી શકાય. તેના પછી તાત્કાલિક ટારગેટેડ હુમલા કરવામાં આવ્યા હતા. આ હુમલો રમઝાન મહિનામાં રોઝા ખોલવા માટે ઈફ્તારની તાત્કાલિક બાદ કરવામાં આવ્યા હતા. અહીં આર્મી કેન્ટના સુરક્ષા બેરિયર પર હુમલો કરાયો હતો. આ હુમલામાં 5 થી 6 આતંકીઓ સામેલ હોવાની જાણકારી મળી હતી.