Bardoli: કેરી ચોરીની શંકા રાખી મજૂરની હત્યા, બારોબાર વેચી મારવાનો આરોપ, 5ની ધરપકડ

Bardoli: સુરત જીલ્લાના બારડોલી તાલુકાના અકોટી ગામમાં કેરીચોરીના આરોપે એક ચોંકાવનારી હત્યાની ઘટના સામે આવી છે. મૂળ ઉત્તરપ્રદેશના 48 વર્ષીય સુરેશ રામમનોરથ વર્માને પાંચ શખ્સોએ આંબાના વૃક્ષ સાથે બાંધીને નિર્દયતાથી માર માર્યો હતો, જેના કારણે તેમનું મોત નીપજ્યું. આરોપીઓએ મૃતક પાસેથી 50,000 રૂપિયાની માગણી પણ કરી હતી. પોલીસે આ ઘટનાના 5 આરોપીઓની ધરપકડ કરી છે.

અકોટી ગામે ખેડૂત રાકેશભાઈ કાંતિલાલ પટેલની આંબાવાડીમાં કેરીનો વેપાર કરવા 6 વેપારીઓ રોકાયેલા હતા. જેમાંથી સુરેશ વર્મા (રહે. અકોટી, મૂળ રહે. પૂરેના ગામ, જુડારા, હનુમાનગંજ, ઉત્તરપ્રદેશ) પર આરોપીઓએ કેરીઓ ચોરીને બારોબાર વેચી હોવાનો આક્ષેપ કર્યો હતો.

આરોપીઓ આસ્ફાક અબ્દુલ રઉફ રાયન, મોહંમદ ઉમર જિયાઉદ્દીન મનિહાર, યાકુબ અબ્દુલ ગફાર, વિનોદકુમાર ફૂલચંદ અગ્રવાલ અને દશરથ ચુનીલાલ મૌર્યએ સુરેશને આંબાના વૃક્ષ સાથે બાંધીને ઢોરમાર માર્યો હતો. મારથી સુરેશનું ઘટનાસ્થળે જ મોત નીપજ્યું. આરોપીઓએ મૃતદેહને ગાડીમાં ભરીને શામપુરા ગામની નહેરમાં ફેંકી દીધો હતો.

આરોપીઓની ધરપકડ

સુરેશના પુત્ર સૂરજ વર્માની ફરિયાદના આધારે બારડોલી પોલીસે હત્યાનો ગુનો નોંધી, પાંચેય આરોપીઓની ધરપકડ કરી છે. બારડોલી DYSP એચ. એલ. રાઠોડે જણાવ્યું કે, આરોપીઓએ સુરેશની પત્ની પાસે ફોન કરી 50,000 રૂપિયાની માગણી કરી હતી. કોલ ડિટેઈલની તપાસમાંથી આરોપીઓની વિગતો મળી, અને પૂછપરછમાં તેમણે ગુનો કબૂલ્યો છે. પોલીસે જણાવ્યું કે મૃતક આંબાવાડીમાં કામ કરી પરિવારનું ગુજરાન ચલાવતો હતો, અને આરોપીઓ સાથે તેનો અગાઉ કોઈ ઝઘડો નહોતો.

આગળની કાર્યવાહી

પોલીસે આરોપીઓની ધરપકડ કરી, આગળની તપાસ હાથ ધરી છે. આજે સાંજે આરોપીઓને કોર્ટમાં રજૂ કરી રિમાન્ડની માગણી કરવામાં આવશે. આ ઘટનાએ સ્થાનિક વિસ્તારમાં ચકચાર મચાવી છે.

પાંચ આોરપીઓ

આસ્ફાક અબ્દુલ રઉફ રાયન, (બારડોલીના અહેસાન પાર્કમાં રહેતા અને મૂળ યુપીનો)
મોહંમદ ઉમર જિયાઉદ્દીન મનિહાર (રહે. રાયમ ગામ, તા. બારડોલી, ઈશ્વર નરોત્તમ પટેલની વાડીમાં, મૂળ રહે. બહેતી, જિ. સુલતાનપુર, ઉત્તરપ્રદેશ)
યાકુબ અબ્દુલ ગફાર (રહે. રાયમ, મુળ રહે, ફતેપુર)
વિનોદકુમાર ફૂલચંદ અગ્રવાલ (રહે. રાયમ, મૂળ રહે. નગર પંચાલી કોપરીપુર, ઉત્તરપ્રદેશ)
દશરથ ચુનીલાલ મૌર્ય (હાલ રહે. રાયમ, તા. બારડોલી, મૂળ રહે. બહેતી, ઉત્તરપ્રદેશ)