બાંગ્લાદેશના પૂર્વ વડાપ્રધાન Sheikh Hasina ની મુશ્કેલી વધી, ધરપકડ વોરંટ ઈશ્યૂ

Sheikh Hasina arrest warrant issue: બાંગ્લાદેશના પૂર્વ વડા પ્રધાન શેખ હસીનાની મુશ્કેલીઓ હવે વધવાની છે. બાંગ્લાદેશના આંતરરાષ્ટ્રીય ગુના ટ્રિબ્યુનલ (ICT) એ રવિવારે શેખ હસીના અને અન્ય બે લોકો પર ગયા વર્ષે વિદ્યાર્થીઓની આગેવાની હેઠળના વિરોધ પ્રદર્શનોના હિંસક દમન બદલ સામૂહિક હત્યા સહિત અનેક આરોપો હેઠળ આરોપ મૂક્યો હતો. રવિવારની કાર્યવાહી બાદ એવું નક્કી કરવામાં આવ્યું છે કે હસીના વિરુદ્ધ ટ્રાયલ તેમની ગેરહાજરીમાં શરૂ કરવામાં આવશે.

બાંગ્લાદેશમાં આ પ્રક્રિયા એવા સમયે શરૂ થઈ છે જ્યારે હસીના સરકારને સત્તા પરથી દૂર કર્યાને લગભગ 10 મહિના વીતી ગયા છે. આ કેસમાં ત્રણ સભ્યોની ટ્રિબ્યુનલ બેન્ચે ફરિયાદ પક્ષ દ્વારા હસીના વિરુદ્ધ વિરોધ પ્રદર્શનોને નિર્દયતાથી કચડી નાખવાના ઔપચારિક આરોપો દાખલ કર્યા. સાથે સાથે ટ્રિબ્યુનલે શેખ હસીના અને તત્કાલીન ગૃહમંત્રી અસદુઝમાન ખાન કમાલ વિરુદ્ધ નવું ધરપકડ વોરંટ પણ જારી કર્યું છે. ત્રીજા આરોપી, તત્કાલીન પોલીસ મહાનિરીક્ષક ચૌધરી અબ્દુલ્લા અલ-મામુન, હાલમાં કસ્ટડીમાં છે, અને તેમની સામે ટ્રાયલ તેમની હાજરીમાં હાથ ધરવામાં આવશે.

ટ્રિબ્યુનલની કાર્યવાહીનું જીવંત પ્રસારણ કેમ કરવામાં આવ્યું?

બાંગ્લાદેશના ઇતિહાસમાં આ પહેલીવાર છે જ્યારે કોઈ ટ્રિબ્યુનલની કાર્યવાહીનું ટેલિવિઝન પર જીવંત પ્રસારણ કરવામાં આવ્યું છે. એવું કહેવામાં આવી રહ્યું છે કે આનો હેતુ ભારતમાં આશ્રય લઈ રહેલી શેખ હસીનાને સીધો સંદેશ આપવાનો છે. જેથી તે ગભરાઈ જાય. ઉલ્લેખનીય છે કે વિદ્યાર્થીઓના વિરોધ પ્રદર્શન બાદ ગયા વર્ષે 5 ઓગસ્ટે શેખ હસીનાની સરકારને સત્તા પરથી હાંકી કાઢવામાં આવી હતી. ત્યારથી, તેની સામે અનેક ફોજદારી કેસ દાખલ કરવામાં આવી રહ્યા છે.

અગાઉ પણ વચગાળાની સરકારે હસીનાના પ્રત્યાર્પણ માટે ભારતને રાજદ્વારી નોંધ મોકલી હતી, જેના પછી આઇસીટીએ હસીના સામે ધરપકડ વોરંટ જારી કર્યું હતું. ભારતે આ નોંધ મળી હોવાની પુષ્ટિ કરી છે, જોકે તેણે તેના પર કોઈ જાહેર ટિપ્પણી કરી નથી.