Vadodara: વડોદરામાં શાળાઓને ઉડાવવાની ધમકીનો સિલસિલો યથાવત્ જોવા મળી રહ્યો છે. આજે સવારે હરણીની સિગ્નસ સ્કૂલને ધમકી મળી હતી ત્યાર બાદ હવે અકોટા વિસ્તારમાં આવેલી ડી.આર.અમીન સ્કૂલને RDX થી ઉડાવવાની ધમકીનો ઇ-મેલ મળતાં ખળભળાટ મચી ગયો છે. આ ધમકીને પગલે પોલીસની ટીમો ઘટનાસ્થળે પહોંચી ગઈ છે. આ અંગે DCP ઝોન 2 ના જણાવ્ય મુજબ આ ઈ-મેલમાં પણ કન્ટેન્ટ અગાઉ મોકલેલા ધમકીભર્યા ઈ-મેલ જેવું જ છે.
વડોદરામાં શાળાઓમાં ધમકીઓનો સિલસિલો યથાવત
આજે સવારે હરણી વિસ્તારમાં આવેલી સિગ્નસ સ્કૂલને બોમ્બથી ઉડાવી દેવાની ધમકી મળી હતી જે બાદ પોલીસ તંત્ર તાત્કાલિક એલર્ટ થઈ ગયું હતુ અને બોમ્બ ડિસ્પોઝલ સ્ક્વોડ તેમજ ડોગ સ્ક્વોડ સાથે ઉચ્ચ પોલીસ અધિકારીઓ ઘટનાસ્થળે પહોંચી ગયા હતા. સ્કૂલના પરિસરમાં વ્યાપક તપાસ અને સર્ચ ઓપરેશન શરૂ કરવામાં આવ્યું હતુ શાળાના ખૂણે-ખૂણાની ઝીણવટભરી તપાસ કરવામાં આવી હતી જો કે આ તપાસમાં કોઈ શંકાસ્પદ વસ્તુ મળી ન હતી.
વાલીઓમાં ચિંતાનો માહોલ
મહત્વનું છે કે, વડોદરા શહેરમાં એક બાદ એક શાળાઓને બોમ્બથી ઉડાવી દેવાની ધમકીઓ મળી રહી છે જેને વડોદરાના શૈક્ષણિક વાતાવરણમાં ચિંતા વધારી છે. વાલીઓ સવારે બાળકોને શાળાએ મોકલે છે અને શાળામાં ધમકી મળતા તેઓ પોતાના બાળકોને લેવા માટે દોડે છે બાળકો શાંતિથી ભણી શકતા નથી. વારંવાર ધમકીઓ મળવાને કારણે વાલીઓમાં ચિંતાનો માહોલ છવાયો છે.
હાલ તો શહેરમાં પોલીસ અને સુરક્ષા એજન્સીઓ દ્વારા સઘન તપાસ ચાલુ છે, અને આવી ધમકીઓનું પુનરાવર્તન રોકવા માટે કડક કાર્યવાહીની માંગ વાલીઓ દ્વારા ઉઠી રહી છે.
