Vadodra: PM મોદીના કાર્યક્રમ દરમિયાન દુઃખદ ઘટના, 1 હોમગાર્ડ જવાન અને ST ડ્રાઈવરનું હાર્ટ એટેકથી મોત

Vadodra: વડોદરામાં PM મોદીના કાર્યક્રમ દરમિયાન દુઃખદ ઘટના બની છે પીએમ મોદીના રોડ શો અને કાર્યક્રમ દરમિયાન બંદોબસ્તમાં ફરજ બજાવતા એક હોમગાર્ડ જવાન અને એક ST ડ્રાઈવરનું હાર્ટ એટેકથી દુઃખદ મોત નીપજ્યું છે. આ ઉપરાંત, બે મહિલાઓ આ કાર્યક્રમ દરમિયાન બેભાન થઈ હોવાની ઘટના પણ સામે આવી છે.

હોમગાર્ડ જવાનનું મોત

મળતી માહિતી મુજબ વડોદરામાં 29 વર્ષીય હોમગાર્ડ જવાન નીતેશ જારીયા PM મોદીના રોડ શો દરમિયાન બંદોબસ્તમાં ફરજ બજાવતા હતા. જાણવા મળી રહ્યું છે કે, રવિવારે આખો દિવસ, રાત અને આજે સવારે પણ તેઓ ડ્યુટી પર હાજર હતા. આ દરમિયાન તેમને અચાનક હાર્ટ એટેક આવ્યો અને તેઓ બેભાન થઈ ગયા. તેમને તાત્કાલિક સયાજી હોસ્પિટલ ખસેડવામાં આવ્યા, પરંતુ ડોક્ટરોએ તેમને મૃત જાહેર કર્યા. નીતેશના મોતથી તેમનો પરિવાર શોકમાં ડૂબી ગયો છે.

ST ડ્રાઈવરનું પણ હાર્ટ એટેકથી નિધન

આ ઘટના ઉપરાંત, PM મોદીના કાર્યક્રમમાં ફરજ બજાવતા ગુજરાત રાજ્ય માર્ગ પરિવહન નિગમ (GSRTC)ના એક ડ્રાઈવરનું પણ હાર્ટ એટેકથી મોત થયું હોવાની માહિતી સામે આવી છે. આ ડ્રાઈવર મોદીના રોડ શો માટે કાર્યકરોને લઈને આવ્યા હતા. કાર્યકરોને ઉતાર્યા બાદ તેઓ બસમાં બેઠા હતા આ દરમિયાન તેમને અચાનક છાતીમાં દુખાવો ઉપડતા તેમને તાત્કાલિક સયાજી હોસ્પિટલ ખસેડવામાં આવ્યા, જ્યાં તેમને મૃત જાહેર કરવામાં આવ્યા.

બે મહિલાઓ બેભાન

આ જ કાર્યક્રમ દરમિયાન, બે મહિલાઓ અચાનક બેભાન થઈ ગયા હોવાની ઘટના પણ નોંધાઈ છે. આ મહિલાઓ કાર્યક્રમમાં હાજર હતી અથવા ફરજ બજાવતી હતી, તે અંગે હજુ સ્પષ્ટ માહિતી ઉપલબ્ધ નથી. તેમને તાત્કાલિક નજીકની હોસ્પિટલમાં સારવાર માટે ખસેડવામાં આવ્યા હતા, પરંતુ તેમની હાલત અંગે વધુ વિગતો હજુ સામે આવી નથી.

કર્મચારીઓની સુરક્ષા અને કામના દબાણ અંગે ચિંતા

લોકોએ આ અંગે દુઃખ વ્યક્ત કર્યું છે. ઘણા લોકોએ ફરજ દરમિયાન આવી દુર્ઘટનાઓ ટાળવા માટે કર્મચારીઓના આરોગ્ય અને કામના દબાણ પર ધ્યાન આપવાની માંગણી કરી છે. આ ઘટનાઓ અંગે સ્થાનિક પોલીસ અને ગુજરાત સરકારે હજુ સુધી કોઈ સત્તાવાર નિવેદન જારી કર્યું નથી. જોકે, આવી ઘટનાઓ બાદ સામાન્ય રીતે તપાસના આદેશ આપવામાં આવે છે, જેમાં ફરજ દરમિયાન કર્મચારીઓની સ્થિતિ, આરોગ્ય સુવિધાઓ અને કામના દબાણનું મૂલ્યાંકન કરવામાં આવે છે.

ઘટનાઓનું પુનરાવર્તન ન થાય તે માટે યોગ્ય પગલાં લેવા જરુરી

PM મોદીના વડોદરા ખાતેના કાર્યક્રમ દરમિયાન બનેલી આ દુઃખદ ઘટનાઓએ ફરજ બજાવતા કર્મચારીઓની સુરક્ષા અને આરોગ્યના મુદ્દાઓને ફરી ચર્ચામાં લાવ્યા છે. આ ઘટનાઓ એક ચેતવણી છે કે મોટા કાર્યક્રમોમાં સુરક્ષા બંદોબસ્તમાં જોડાયેલા કર્મચારીઓની શારીરિક અને માનસિક સ્થિતિ પર વધુ ધ્યાન આપવું જરૂરી છે. સરકાર અને સ્થાનિક વહીવટીતંત્રે આવી ઘટનાઓનું પુનરાવર્તન ન થાય તે માટે યોગ્ય પગલાં લેવાની અપેક્ષા રાખવામાં આવે છે.