તૈયારીઓ કરી પણ આવવા ન મળ્યું! મોદીના કાર્યક્રમમાં Bachu Khabad ગેરહાજર

Bachu Khabad: દાહોદ જિલ્લામાં ગરીબ મજૂરોને રોજગારી આપતી મનરેગા યોજનામાં ભ્રષ્ટાચારનો પર્દાફાશ થયો અને મંત્રી બચુ ખાબડના પુત્રોની ધરપકડ કરવામાં આવી પરંતુ આ કૌભાંડ સામે આવ્યો ત્યારથી થોડા સમય માટે મંત્રી બચુ ખાબડ સંપર્ક વિહોણા થયા હતા. જ્યારે આ મામલે સવાલો ઉઠ્યા ત્યારે તેઓ અચાનક પ્રગટ થયા અને કહયું કે, હું મોદીના કાર્યક્રમની તૈયારીઓમાં વ્યસ્ત છું. અને આજે જ્યારે પીએમ મોદી દાહોદમાં છે ત્યારે મોદીના કાર્યક્રમની તૈયારીઓ કરનારા મંત્રી પોતે ગાયબ થઈ ગયા છે. પીએમ મોદીના કાર્યક્રમમાં બચુ ખાબડ દેખાયા જ નહીં.

મોદીના કાર્યક્રમમાં બચુ ખાબડ ગેરહાજર

આજે પીએમ મોદી દાહોદમાં છે ત્યારે દાહોદ ખાતેના પ્રધાનમંત્રીના કાર્યક્રમમાં મંત્રી બચુ ખાબડને સ્થાન અપાયું નહતું. PM મોદીની સભાના મંચ પર ભાજપાના અનેક નેતાઓ અને મંત્રીઓ હતા પરંતુ મંત્રી બચુ ખાબડ ગેરહાજર જોવા મળ્યા હતા. જ્યારે બચુ ખાબડે તો કહ્યું હતું કે હું PM મોદીના કાર્યક્રમની વ્યવસ્થામાં વ્યસ્ત છું. ત્યારે પીએમ મોદી દાહોદમાં આવ્યા છે તો કેમ મંત્રી ગાયબ છે ? શું બચુ ખાબડને આ કાર્યક્રમમાંથી જાણી જોઈને દુર રાખવામાં આવ્યા છે કે તેઓ પોતે આ કાર્યક્રમથી દુર રહ્યા છે ? તેવા સવાલ થઈ રહ્યા છે. કારણ છે કે બચુ ખાબડના બંને સંતાનો ભ્રષ્ટાચારના આરોપોમા પોલીસ ફરિયાદ પછી હાલ જેલ હવાલે થયેલા છે. તેમજ મંત્રી પર પણ આ ભ્રષ્ટાચારના આરોપોના છાંટા ઉડ્યા છે.

મંત્રી પોતે કાર્યક્રમથી દૂર રહ્યા કે રાખવામાં આવ્યા ?

ભ્રષ્ટાચારના આરોપો લાગ્યા બાદ મંત્રીના પુત્રો જેલ હવાલે થયા છે છતા પણ મંત્રીના કહેવા પ્રમાણે તેઓ પીએમ મોદીના કાર્યક્રમ માટે ભીડ એકઠી કરવા જેવી તૈયારીઓ કરી હતી. તો પછી આટલી તૈયારી કર્યા બાદ જ્યારે પીએમ મોદી દાહોદમાં આવ્યા છે તો મંત્રી કેમ ગાયબ થઈ ગયા ? કે પછી તેમને આ કાર્યક્રમથી દુર રાખવામાં આવ્યા ?

શું હવે ભાજપા મંત્રી બચુ ખાબડનું પત્તું કાપશે ?

મહત્વનું છે કે, આ કૌભાંડમાં મંત્રી પુત્રોની ધરપકડ બાદ ભાજપા દ્વારા પણ તેમના પુત્રોને બતાવવાના કોઈ પ્રયાસ કરવામાં નથી આવી રહ્યા તેમજ એવું પણ કહેવામાં આવી રહ્યું છે કે, ભાજપા હવે મંત્રીને વિસ્તરણ સમયે ટાટા બાય બાય કરશે. અત્યારે ભાજપા મંત્રીને કોઈ રીતે સાચવી નથી રહ્યું જેથી સ્પષ્ટ છે કે, હવે મંત્રી બચુ ખાબડનું પત્તું કપાઈ શકે છે…