Bhavnagar: ભાવનગર જિલ્લાના તળાજા તાલુકાના ગોપનાથ આર.સી.સી. રોડ પર વરસાદી માહોલમાં વાહનો સ્લીપ થવાની ઘટનાઓએ ચકચાર મચાવી છે. ઉચડી ગામે નવા બનેલા આર.સી.સી. રોડની સપાટી અત્યંત લીસી હોવાને કારણે વરસાદમાં બાઇક, ટેમ્પો, રિક્ષા અને બસ જેવાં વાહનો એક પછી એક સ્લીપ થયા હોવાના દ્રશ્યો સામે આવ્યા છે. આ ઘટનાઓના સી.સી.ટી.વી. ફૂટેજ સોશિયલ મીડિયા પર વાયરલ થયા છે, જેમાં રોડની ખરાબ ડિઝાઇન અને તંત્રની બેદરકારી સ્પષ્ટ જોવા મળે છે.નવા બનેલા આર.સી.સી. રોડની સપાટી એટલી લીસી છે કે, વરસાદમાં તેના પર વાહનો નિયંત્રણ ગુમાવી બેસે છે. જેથી આ રોડની ડિઝાઇન અને બાંધકામમાં ઉપયોગમાં લેવાયેલી સામગ્રીની ગુણવત્તા પર ગંભીર સવાલો ઉભા થયા છે.
ભાવનગરના તળાજામાં નવા આર.સી.સી. રોડ પર વાહનો સ્લીપ થયા
સોશિયલ મીડિયા પર વાયરલ થયેલા વીડિયોમાં બાઇકચાલકો અને રિક્ષા ચાલકો રોડ પર સ્લીપ થઈને નીચે પડતા જોવા મળે છે, જ્યારે બસ અને ટેમ્પો જેવાં ભારે વાહનો પણ નિયંત્રણ ગુમાવતા દેખાય છે. આ ઘટનાઓએ સ્થાનિક રહેવાસીઓમાં ભયનો માહોલ સર્જ્યો છે. ખાસ કરીને, આ રોડ પરથી રોજિંદા મુસાફરી કરતા લોકો અને ખેડૂતો માટે આ સમસ્યા ગંભીર બની રહી છે.
રોડ પર તાત્કાલિક સપાટી પર રફ કરવામાં આવે તેવી માંગ
સ્થાનિક લોકોએ તંત્રને આ રોડની સપાટી પર તાત્કાલિક રફ કરવાની માંગ કરી છે, જેથી વાહનોની સલામતી સુનિશ્ચિત થઈ શકે. ગ્રામજનોએ રોડના બાંધકામમાં થયેલી ગેરરીતિઓની તપાસની પણ માંગ કરી છે. તેમનું કહેવું છે કે, નવા રોડનું બાંધકામ થયું ત્યારે યોગ્ય ધોરણોનું પાલન કરવામાં આવ્યું નથી, જેનું પરિણામ આજે લોકો ભોગવી રહ્યા છે.
સ્થાનિક વહીવટી તંત્ર નક્કર પગલાં લેવામાં નિષ્ફળ
આ ઘટનાએ તળાજા અને ગોપનાથ વિસ્તારના રોડની ગુણવત્તા અને સલામતીના મુદ્દાઓને ચર્ચાના કેન્દ્રમાં લાવી દીધા છે. સ્થાનિક વહીવટી તંત્ર હજુ સુધી આ મામલે કોઈ નક્કર પગલાં લેવામાં નિષ્ફળ રહ્યું હોવાનું જણાય છે. જો તાત્કાલિક પગલાં નહીં લેવાય, તો આવી ઘટનાઓ ગંભીર અકસ્માતોમાં પરિણમી શકે છે. સ્થાનિક લોકો અને વાહનચાલકોએ તંત્રને આ મુદ્દે ઝડપથી કાર્યવાહી કરવા અપીલ કરી છે, જેથી ભવિષ્યમાં આવી ઘટનાઓ ટાળી શકાય અને રોડ પર મુસાફરી સલામત બની રહે.
નીતિન ગોહેલ
આ પણ વાંચોઃ
Gujarat Weather: વરસાદ હજુ ગયો નથી! જાણો હવામાન વિભાગની આગાહી
Sabarkantha: તલોદ શહેરમાં કંકોડા શાકભાજીની શરૂઆત, જાણો તેના ફાયદા
Ajab Gjab: મહિલાએ એકસાથે 5 બાળકોને આપ્યો જન્મ, જાણો ક્યાનો છે આ ચોંકાવનારો કિસ્સો
