ભાગેડુ Nirav Modi ને વધુ એક ઝટકો, લંડનની કોર્ટે 10 મી વખત જામીન ફગાવી દીધા

Nirav Modi: પંજાબ નેશનલ બેંકના 6498.20 કરોડ રૂપિયાના છેતરપિંડી કેસના મુખ્ય આરોપી નીરવ મોદી (Nirav Modi) હજુ પણ યુકેની જેલમાં રહેશે. લંડનની હાઈકોર્ટ નીરવ મોદીની દસમી વખત દાખલ કરાયેલી જામીન અરજી ફગાવી દીધી છે. ભારત સરકારે એવી આશંકા વ્યક્ત કર્યો હતો કે જો તેમને જામીન આપવામાં આવશે તો તેઓ ફરી એકવાર ફરાર થઈ શકે છે. કોર્ટે આ દલીલને ગંભીરતાથી લીધી અને જામીન અરજી ફગાવી દીધી.

ભાગેડુ નીરવ મોદીની 10 મી વખત જામીન અરજી ફગાવાઈ

આ મહત્વપૂર્ણ સુનાવણી દરમિયાન, ક્રાઉન પ્રોસિક્યુશન સર્વિસ દ્વારા જામીનનો સખત વિરોધ કરવામાં આવ્યો હતો, જેને ભારતની તપાસ એજન્સી CBI તરફથી મજબૂત સમર્થન મળ્યું હતું. ભારત વતી લંડન પહોંચેલી તપાસ અને કાનૂની અધિકારીઓની ટીમે કોર્ટમાં નક્કર દલીલો અને પુરાવા રજૂ કર્યા હતા.સીબીઆઈએ કોર્ટને જણાવ્યું હતું કે નીરવ મોદીને જામીન આપવાથી માત્ર ન્યાયિક પ્રક્રિયા પર અસર પડશે નહીં પરંતુ ભવિષ્યમાં તેના ફરીથી ભાગી જવાની શક્યતા પણ વધી શકે છે. કોર્ટે આ દલીલોને પૂરતા ગણ્યા અને જામીન નામંજૂર કર્યા છે.

નીરવ મોદી 2019 થી યુકેની જેલમાં છે બંધ

નીરવ મોદી19 માર્ચ, 2019 થી લંડનની જેલમાં બંધ છે. ભારતમાં CBI દ્વારા તેને ભાગેડુ આર્થિક ગુનેગાર જાહેર કરવામાં આવ્યો છે. પંજાબ નેશનલ બેંક (PNB) કૌભાંડમાં તેમની ભૂમિકા બદલ ભારતે તેમના પ્રત્યાર્પણની પ્રક્રિયા શરૂ કરી હતી, જેના માટે યુકેની અદાલત પહેલાથી જ સંમત થઈ ગઈ હતી. હવે મામલો અંતિમ ઔપચારિકતાઓ તરફ આગળ વધી રહ્યો છે.

મેહુલ ચોક્સીનું શું થયું ?

આ કૌભાંડમાં બીજું એક મોટું નામ, મેહુલ ચોક્સી, પણ સમાચારમાં છે. તાજેતરમાં જ બેલ્જિયમની એક હોસ્પિટલમાંથી તેની ધરપકડ કરવામાં આવી હતી. ભારતીય એજન્સીઓ સીબીઆઈ અને ઈડીએ ચોક્સીના પ્રત્યાર્પણની પ્રક્રિયા શરૂ કરી દીધી છે અને તેને ટૂંક સમયમાં ભારત લાવવામાં આવે તેવી શક્યતા છે. મેહુલ ચોક્સી પર બેંક કૌભાંડમાં મુખ્ય ભૂમિકા ભજવવાનો પણ આરોપ છે, અને તેની ધરપકડને ભારત માટે બીજી મોટી રાજદ્વારી અને કાનૂની સફળતા માનવામાં આવી રહી છે.