Amreli: વ્યાજખોરોના ત્રાસથી વેપારીએ કર્યો આપઘાત, આરોપી ભાજપ ઉપપ્રમુખની ધરપકડ

Amreli: હાલ ગુજરાત સહિત દેશમાં ભાજપ નેતાઓના નામ વિવાદમાં આવી રહ્યા છે. ભાજપના નેતાઓ ક્યાંક વિવાદાસ્પદ નિવેદનો આપી રહ્યા છે ક્યાંક, હત્યા, દુષ્કર્મ જેવી ઘટનાઓમાં પણ તેમના નામ સામે આવી રહ્યા છે ત્યારે હવે વ્યાજખોર ભાજપ નેતાના કારણે આત્મહત્યાની પણ ઘટના સામે આવી છે જેમાં અમરેલીના સાવરકુંડલામાં ભાજપ નેતા તેમજ અન્ય વ્યાજખોરોના ત્રાસથી ફરસાણના વેપારીએ આત્મહત્યા કરી લીધી હોવાનો મામલો સામે આવ્યો હતો. ત્યારે વેપારીને મરવા માટે મજબૂર કરનાર શહેર ભાજપ ઉપપ્રમુખની ધરપકડ કરી લેવામા આવી છે.

સાવરકુંડલામાં વ્યાજખોરોના ત્રાસથી વેપારીએ કર્યો આપઘાત

મળતી માહિતી મુજબ સાવરકુંડલાની મેઈન બજારમાં શ્યામ શ્રદ્ધા સ્વીટ નામની દુકાન ધરાવતા વેપારી અશોકભાઈ ચૌહાણે થોડા દિવસ પહેલા પોતાના ઘરે ગળેફાંસો ખાઈને આપઘાત કરી લીધો હતો. અન તેમણે જે સ્યૂસાઈડ નોટ લખી હતી તેમાં વેપારીએ ભાજપ નેતા ભાવેશ વીકમા સહિત આઠ જેટલા વ્યાજખોરોના ત્રાસથી આ પગલું ભર્યું હોવાનું જણાવ્યું હતું. આ મામલે વેપારીના પુત્રએ સાવરકુંડલા પોલીસ સ્ટેશનમાં ફરિયાદ નોંધાવતા પોલીસે 8 વ્યાજખોરો સામે ગુનો નોંધી તપાસ હાથ ધરી હતી.

આરોપી ભાજપ ઉપપ્રમુખની ધરપકડ

આ ઘટનામાં અંતે આજે પોલીસે વેપારીને ઉંચા વ્યાજે રૂપિયા આપીને પઠાણી ઉઘરાણી કરી મરવા માટે મજબૂર કરનાર શહેર ભાજપ ઉપ પ્રમુખ એવા વ્યાજખોર આરોપી ભાવેશ વિકમાંને ઝડપી પાડયો છે. આ મામલે અગાઉ 2 વ્યાજખોર આરોપી ઝડપાયા બાદ ત્રીજો ભાજપનો નેતા ભાવેશ વિકમાં પોલીસના સંકજામાં આવ્યો છે. જ્યારે અન્ય પાંચ આરોપીઓને ઝડપી લેવા ચક્રો ગતિમાન કર્યા છે. ત્યારે આ ઘટના સામે આવતા ભાજપે પણ કાર્યવાહી કરી છે. વ્યાજખોરીની ફરિયાદ બાદ ઉપપ્રમુખને પક્ષમાંથી કાઢી મુકવામા આવ્યા છે.