Rajkot: લોધિકાના સરપંચ સુધાબેન વસોયા સસ્પેન્ડ, ગ્રામ પંચાયત જમીન કૌભાંડ મામલે કાર્યવાહી

Rajkot: રાજકોટના લોધિકામાં (Lodhika) ગ્રામ પંચાયતની જમીન કૌભાંડ સામે આવ્યું હતું. આ મામલે હવે મહત્વની અપડેટ સામે આવી છે જેમાં લોધિકાના વિવાદિત મહિલા સરપંચ સુધાબેન વસોયાને સસ્પેન્ડ કરી દેવામાં આવ્યા છે. જમીન કૌભાંડમાં તપાસ બાદ DDO દ્વારા સરપંચને સસ્પેન્ડ કરવામાં આવ્યા હતા.

જમીન કૌભાંડ મામલે લોધિકાના સરપંચને કરાયા સસ્પેન્ડ

લોધિકા ગ્રામ પંચાયતની જમીન સાથે ગેરરીતિઓ અને ભ્રષ્ટાચારના આરોપો લાગ્યા હતા. આમાં પંચાયતની જમીનનો દુરુપયોગ, ખોટા દસ્તાવેજો બનાવવા, અથવા ગેરકાયદેસર રીતે જમીનની ફાળવણી કરવાનો સમાવેશ થાય છે. આ મામલે મોટી કાર્યવાહી હાથ ધરવામાં આવી છે, જેમાં લોધિકાના મહિલા સરપંચને સસ્પેન્ડ કરવામાં આવ્યા છે.આ મામલે તપાસ બાદ, 16 મે, 2025ના રોજ લોધિકાના સરપંચ સુધાબેન વસોયાને કલમ નંબર-57 (1) મુજબ સસ્પેન્ડ કરવામાં આવ્યા છે. સરપંચ સામે આ કાર્યવાહી DDO અનંદુ સુરેશ ગોવિંદ દ્વારા જમીનમાં ગેરરીતિ બદલ કરાવામા આવી છે.

શું છે સમગ્ર મામલો?

ઉલ્લેખનીય છે કે લોધિકાના જૂના તેમજ નવા ગામતળમાં કૂલ 14 પ્લોટ ખુલ્લી હરાજી કર્યા વગર મળતિયાઓને વેચી દેવાના અને 13 પ્લોટના દસ્તાવેજ કરી દેવાની ઘટના સામે આવી હતી. જેમાં સુધા વસોયા પર આરોપ છે કે તેમણે ગ્રામ પંચાયતની જમીનના પ્લોટની ગેરકાયદેસર રીતે હરાજી કરી.આ હરાજીમાં નિયમોનું ઉલ્લંઘન થયું હોવાનું અને અનૈતિક રીતે જમીનની ફાળવણી કરવામાં આવી હોવાનું જણાવાયું છે. સરપંચ સુધાબેન વસોયાએ તાલુકા વિકાસ અધિકારીને જાણ કર્યા વિના તેમજ કોઈ પણ પરવાનગી વિના લોધિકાના જૂના તેમજ નવા ગામતળમાં કુલ 14 પ્લોટની બારોબાર હરાજી કરી નાંખી હતી. આમ સુધા વસોયાએ સત્તાનો દુરુપયોગ કરીને આ કૌભાંડને અંજામ આપવાનો આરોપ છે. આ પહેલા આ કૌભાંડમાં સરપંચનો સાથ આપનાર તલાટી મંત્રી બી.એલ.મકવાણાને ફરજ મોકૂફ કરાયા હતાં.