Dahod: મનરેગા કૌભાંડનો રેલો મંત્રી પુત્ર સુધી પહોંચ્યો ખરો, બચુ ખાબડના પુત્ર બળવંત ખાબડને પોલીસે ઝડપ્યો

Dahod MNREGA scam: દાહોદના ચકચારી મનરેગા કૌભાંડ મામલે મોટા સમાસાર સામે આવ્યા છે. આ કૌભાડમાં મંત્રી બચુ ખાબડના પુત્રની ધરપકડ કરવામાં આવી છે. આ સાથે તત્કાલીન ટીડીઓ દર્શન પટેલની પણ ધરપકડ કરવામા આવી છે.

દાહોદમાં મનરેગા કૌભાંડમાં આખરે મંત્રી પુત્રની ધરપકડ

મળતી માહિતી મુજબ દાહોદ જિલ્લાના ડીઆરડીએ પોલીસમાં મનરેગા હેઠળ રૂપિયા 71 કરોડની ગેરરીતિ થઈ હોવાની ફરિયાદ નોંધાવી હતી જેમા મંત્રી બચુ ખાબડના પુત્ર બળવંત ખાબડ અને કિરણ ખાબડની સંડોવણી હોવાનું બહાર આવ્યું હતું. દાહોદ પોલીસે મોડી રાત્રે મંત્રી બચુ ખાબડના પુત્ર બળવંત ખાબડની ધરપકડ કરી હતી.

કેવી રીતે આચરવામાં આવ્યું સમગ્ર કૌભાંડ ?

ઉલ્લેખનીય છે કે, દાહોદ જિલ્લાના દેવગઢ બારિયા અને ધાનપુર તાલુકાના માત્ર ત્રણ ગામોમાં મનરેગા યોજનાનું કૌભાંડ સામે આવ્યું હતું. જેમાં વર્ષ 2021થી 2024 સુધી મનરેગા યોજનામાં એલ 1 તરીકે અધિકૃત ન હોય તેવી એજન્સીઓને છેલ્લા ત્રણ વર્ષમાં 70 કરોડ રૂપિયાનું ચૂકવણું કરી દેવામાં આવ્યુ હોવાનો ખુલાસો થયો હતો. આ કૌભાંડ સરકારી અધિકારી, કરાર આધારિત કર્મચારીઓ અને એજન્સીઓની મિલિભગતથી આચરવામાં આવ્યું હતું. કૌભાંડી એજન્સીઓ સાથે મંત્રીના પુત્રોના તાર જોડાયેલા છે. આ મામલે જિલ્લા ગ્રામ વિકાસ એજન્સીના નિયામક બી. એમ. પટેલે ફરિયાદ નોંધાવી, જે બાદ પોલીસે તપાસ શરૂ કરવામાં આવી હતી.

FIRમાં નામ નોંધાય તે કરી હતી આગોતરા જામીન અરજી

આ મામલે જ્યારે તેમનું નામ સામે આવ્યું હતુ ત્યારે FIRમાં નામ નોંધાય તે પહેલા જ બચુ ખાબડના પુત્રોએ કોર્ટમાં આગોતરા જામીન અરજી કરી હતી. અગાઉ આ મામલે પોલીસે ચાર વ્યક્તિની ધરપકડ કરી હતી.