Surat: ઉડતા સુરત! ગૃહ રાજ્યમંત્રીના હોમ ટાઉનમાં જ ડ્રગ્સના નશેડીઓનો ઉપદ્રવ

Surat : ગુજરાતમાં ડ્રગ્સ પકડાયાના સમાચાર હવે સામાન્ય બની ગયા છે. આમ તો ગુજરાત ડ્રગ્સનું ગેટ વે બની ગયું છે ત્યારે ડ્રગ્સનાં દુષણમાં”ઉડતા પંજાબ”ની છબી ભુલાવી દે તેવું”ઉડતા ગુજરાતનું” મોડેલ BJP નાં શાસનમાં ફળ્યું ફૂલ્યું હોય તેવું લાગી રહ્યું છે . સુરતમાં બેફામ પણે ચાલી રહેલા ડ્રગ્સના કારોબારની પોલ ખોલતો વીડિયો વાયરલ થયો છે. સુરતમાં BRTS માં ડ્રગ્સના નશામાં એક યુવકે ઉત્પાત મચાવીને ગાળાગાળી કરી હોય તેવો વીડિયો સોશિયલ મીડિયામાં વાયરલ થયો છે.

BRTSમાં ડ્રગ્સના નશામાં નસેડીએ મચાવ્યો ઉત્પાત

પ્રાપ્ત માહિતી અનુસાર, અડાજણથી કામરેજ જતી BRTS બસમાં આ નશેડી યુવક ચડ્યો અને નશાની હાલતમાં મુસાફરો સાથે અભદ્ર વર્તન કરવા લાગ્યો. તેણે બસમાં બેઠેલી મહિલાઓને ડ્રગ્સનું પેકેટ અને ઈન્જેક્શન બતાવીને ધમકાવ્યા, જેના કારણે ઘણી મહિલાઓ ડરીને બસમાંથી ઉતરી ગઈ. યુવકે પોતાને “રોયલ કાઠિયાવાડી” ગણાવ્યો અને દાવો કર્યો કે તેની પાસે રૂ. 5,000 નું ડ્રગ્સ પેકેટ, રૂ. 1.5 લાખનો ફોન અને રૂ. 2.5 લાખની ઘડિયાળ છે. આ ઉપરાંત, તેણે કંડક્ટરને ઉતરવાનું કહેતાં તેની સાથે મારપીટ કરી અને અપશબ્દો બોલ્યા, જેનાથી બસમાં હાજર મુસાફરોમાં ગભરાટ ફેલાયો હતો.

આ ઘટનાનો વીડિયો સોશિયલ મીડિયા પર વાયરલ થયો છે જેમાં જોઈ શકાયછે કે, યુવકે બસમાં ચડીને મહિલાઓ અને અન્ય મુસાફરો સમક્ષ કોકેઈન ડ્રગ્સનું પેકેટ અને ઈન્જેક્શનની સિરીંજ બતાવી, અપશબ્દો બોલી અને કંડક્ટર સાથે મારપીટ કરી.

હર્ષ સંઘવીની નશામુક્ત ગુજરાતની હકીકત

આ ઘટના એ સ્પષ્ટ કરે છે કે સુરત, જે ગૃહમંત્રી હર્ષ સંઘવીનું હોમ ટાઉન છે, ત્યાં ડ્રગ્સનું વ્યસન અને માફિયાઓનો ઉપદ્રવ ખુલ્લેઆમ ફેલાઈ રહ્યો છે. હર્ષ સંઘવી દ્વારા વારંવાર નશામુક્ત ગુજરાતની વાતો કરવામાં આવે છે, પરંતુ આવી ઘટનાઓ તેમના દાવાઓને પોકળ સાબિત કરે છે. સુરતમાં ડ્રગ્સની હેરફેર અને વપરાશની ઘટનાઓ સતત વધી રહી છે, છતાં પોલીસ દ્વારા આ બાબતે કોઈ નોંધપાત્ર કાર્યવાહી થતી નથી. આ ઘટનામાં પણ હજુ સુધી કોઈ પોલીસ ફરિયાદ નોંધાઈ નથી, જે પોલીસની નિષ્ક્રિયતા અને ગૃહ વિભાગની નિષ્ફળતા દર્શાવે છે.

ડ્રગ્સનો જીવતો પુરાવો

વાયરલ વીડિયોમાં યુવક ખુલ્લેઆમ ડ્રગ્સનું પેકેટ અને ઈન્જેક્શન બતાવી રહ્યો છે, જે દર્શાવે છે કે સુરતમાં ડ્રગ્સની હેરાફેરી કેટલી સરળતાથી થઈ રહી છે. સૌથી ચોંકાવનારી બાબત એ છે કે આવા નશેડીઓ જાહેર મુસાફરીમાં ખુલ્લેઆમ ઉત્પાત મચાવી રહ્યા છે, અને પોલીસની નશામુક્ત ગુજરાતની ઘોષણાઓ માત્ર કાગળ પર જ દેખાય છે. આ ઘટનાએ સુરતને “ઉડતા પંજાબ”ની જેમ “ઉડતા સુરત” તરીકે ઓળખાવ્યું છે, જે ગૃહમંત્રી હર્ષ સંઘવીના નેતૃત્વ હેઠળના ગૃહ વિભાગની નિષ્ફળતાનો પુરાવો છે.

ડ્રગ્સ ક્યાંથી આવે છે?

આ ઘટનાએ અનેક સવાલો ઉભા કર્યા છે. ડ્રગ્સ આ નશેડીઓ સુધી કેવી રીતે પહોંચે છે? જ્યારે ગૃહમંત્રી હર્ષ સંઘવી નશામુક્ત ગુજરાતના દાવા કરે છે, ત્યારે આવા માફિયાઓ ખુલ્લેઆમ ડ્રગ્સ સાથે ફરે છે અને જાહેર સ્થળોએ આતંક મચાવે છે. આ ઘટના દર્શાવે છે કે ડ્રગ્સનું નેટવર્ક સુરતમાં ઊંડે સુધી ફેલાયેલું છે, અને પોલીસની નશા વિરોધી ઝુંબેશ માત્ર દેખાડો જ લાગે છે.

હર્ષ સંઘવીના નેતૃત્વમાં ગુજરાત પોલીસની નિષ્ફળતા આ ઘટનામાં સ્પષ્ટ દેખાય છે, અને જનતા હવે તેમની જવાબદારી માંગી રહી છે. આ ઘટનાથી સ્પષ્ટ થયું છે કે, સુરતમાં ડ્રગ્સનું વ્યસન અને માફિયાઓનો ઉપદ્રવ નિયંત્રણ બહાર જઈ રહ્યો છે. જો ગૃહમંત્રી હર્ષ સંઘવી ખરેખર નશામુક્ત ગુજરાત ઈચ્છે છે, તો તેમણે આવી ઘટનાઓને રોકવા માટે તાત્કાલિક અને કડક પગલાં લેવા પડશે, નહીં તો “ઉડતા સુરત”ની સ્થિતિ વધુ ખરાબ થશે.

ઉડતા સુરત! BRTSમાં ડ્રગ્સના નશામાં નસેડીએ મચાવ્યો ઉત્પાત#Surat #BRTS #Drugs #viralvideo pic.twitter.com/9FcQ5yMucT
— The Gujarat Report (@TGujarat_Report) June 5, 2025