WTC Final 2O25 : WTC ફાઇનલમાં ટીમ ઇન્ડિયાનો રેકોર્ડ તૂટ્યો, દક્ષિણ આફ્રિકાએ ઓસ્ટ્રેલિયાને હરાવીને રચ્યો નવો ઇતિહાસ

WTC Final 2O25 : દક્ષિણ આફ્રિકાએ વર્લ્ડ ટેસ્ટ ચેમ્પિયનશિપ (WTC)નો ખિતાબ જીતીને ક્રિકેટ ઇતિહાસમાં એક નવો અધ્યાય ઉમેર્યો છે. લોર્ડ્સના ઐતિહાસિક મેદાન પર રમાયેલી WTC ફાઇનલ 2025માં, દક્ષિણ આફ્રિકાની ટીમે જોરદાર પ્રદર્શન કર્યું અને ઓસ્ટ્રેલિયાને 5 વિકેટથી હરાવ્યું. આ જીત સાથે, દક્ષિણ આફ્રિકાએ 27 વર્ષ પછી ICC ટાઇટલ જીત્યું. અગાઉ, ટીમે 1998માં પ્રથમ વખત ICC ટાઇટલ ચેમ્પિયન્સ ટ્રોફી જીતી હતી. દક્ષિણ આફ્રિકા WTC ટાઇટલ જીતનાર ત્રીજી ટીમ બની છે. આ પહેલા ન્યુઝીલેન્ડ (2021) અને ઓસ્ટ્રેલિયા (2023) એ આ ટાઇટલ જીત્યું હતું.

WTC ફાઇનલમાં ટીમ ઇન્ડિયાનો રેકોર્ડ તૂટ્યો

ઓસ્ટ્રેલિયાએ દક્ષિણ આફ્રિકા માટે 282 રનનો મજબૂત લક્ષ્યાંક રાખ્યો હતો. જવાબમાં, આફ્રિકન બેટ્સમેનોએ શાનદાર બેટિંગ કરી અને મેચના ચોથા દિવસના પહેલા સત્રમાં 5 વિકેટ ગુમાવીને આ લક્ષ્યાંક હાંસલ કર્યો. ખાસ વાત એ છે કે લોર્ડ્સના 141 વર્ષ જૂના ટેસ્ટ ઇતિહાસમાં આ બીજો સૌથી મોટો સફળ રન ચેઝ છે. આ પહેલા આટલા મોટા લક્ષ્યનો પીછો કરીને જીત નોંધાવવાની સિદ્ધિ ફક્ત એક જ વાર બની હતી.

લોર્ડ્સમાં સૌથી વધુ સફળ રન-ચેઝ

342- વેસ્ટ ઈન્ડિઝ વિરુદ્ધ ઈંગ્લેન્ડ, 1984
282 – દક્ષિણ આફ્રિકા વિરુદ્ધ ઓસ્ટ્રેલિયા, 2025
282 – ઇંગ્લેન્ડ વિરુદ્ધ ન્યુઝીલેન્ડ, 2004
277 – ઈંગ્લેન્ડ વિરુદ્ધ ન્યુઝીલેન્ડ, 2022
216 – ઇંગ્લેન્ડ વિરુદ્ધ ન્યુઝીલેન્ડ, 1965

ભારતનો રેકોર્ડ પણ તૂટ્યો

આ યાદગાર જીત સાથે, દક્ષિણ આફ્રિકાએ ભારતીય ક્રિકેટ ટીમનો 14 વર્ષ જૂનો રેકોર્ડ પણ તોડી નાખ્યો. હકીકતમાં, ICC ફાઇનલમાં સૌથી મોટા લક્ષ્યનો પીછો કરવાનો રેકોર્ડ અત્યાર સુધી ટીમ ઇન્ડિયાના નામે હતો. 2011 ODI વર્લ્ડ કપની ફાઇનલમાં, ભારતે શ્રીલંકા સામે 275 રનનો લક્ષ્યાંક હાંસલ કર્યો હતો. હવે દક્ષિણ આફ્રિકાએ 282 રનનો પીછો કરીને આ સિદ્ધિ હાંસલ કરી છે અને ICC ફાઇનલમાં સૌથી મોટા લક્ષ્યનો પીછો કરનાર અને જીત મેળવનાર ટીમ બની ગઈ છે.

ICC ફાઇનલમાં પ્રાપ્ત થયેલા સૌથી મોટા લક્ષ્યો

282 – SA vs AUS, લોર્ડ્સ, (ICC WTC ફાઇનલ 2025)
275 – ભારત વિરુદ્ધ શ્રીલંકા, મુંબઈ, (આઈસીસી વનડે વર્લ્ડકપ 2011)
265 – ન્યૂઝીલેન્ડ વિરુદ્ધ ભારત, નૈરોબી, (આઈસીસી સીટી 2000)
252 – ભારત વિરુદ્ધ ન્યુઝીલેન્ડ, દુબઈ, (આઈસીસી સીટી2025)
246 – SA vs WI, ઢાકા, (ICC CT 1998)