Israel-Iran War: ઈરાને ઈઝરાયલ સામે યુદ્ધની જાહેરાત કરી દીધી છે. જેથી ટ્રમ્પની મહેનત પર પાણી ફરી ગયું છે. ભારત-પાકિસ્તાનનો સંઘર્ષ રોકાવી શકતાં ટ્રમ્પ ઈઝરાયલ-ઈરાનને સમજાવી શક્યા નથી. ઈરાનના સુપ્રીમ લીડર આયતુલ્લાહ અલી ખામેનીએ બુધવારે X પર પોસ્ટ કરીને કહ્યું – ‘મહાન હૈદરના નામે યુદ્ધ શરૂ થઈ ગયું છે.’ ખામેનીએ X પર ઈઝરાયલને ચેતવણી આપતા કહ્યું, “આપણે આતંકવાદી યહૂદી શાસનને કડક જવાબ આપવો પડશે. અમે તેમના પર કોઈ દયા નહીં બતાવીએ.”

ટ્રમ્પની ધમકીઓના ફિયાસ્કો

અગાઉ યુએસ રાષ્ટ્રપતિ ડોનાલ્ડ ટ્રમ્પે ઈરાનના સુપ્રીમ લીડર ખામેનીને બિનશરતી શરણાગતિ સ્વીકારવાનું કહ્યું હતું. ટ્રમ્પે કહ્યું છે કે અમે સારી રીતે જાણીએ છીએ કે ‘સર્વોચ્ચ નેતા’ ક્યાં છુપાયેલા છે. તેમણે કહ્યું હતુ કે ખામેનીએ બિનશરતી શરણાગતિ સ્વીકારવી જોઈએ. જો કે હવે ખામેનીએ એકાએક યુધ્ધની ઘોષણા કરી દેતાં ટ્રમ્પની ધમકીઓના ફિયાસ્કો થઈ ગયો છે. ઈરાને કોઈ પણ સંબંધોની પરવાહ કર્યા વગર ઈરાન સામે યુધ્ધની જાહેરાત કરી દીધી છે.

ઉલ્લેખનીય છે કે ઇઝરાયલ અને ઈરાન વચ્ચેનો સંઘર્ષનો આ છઠ્ઠો દિવસ છે અને બંને દેશોએ એકબીજા પર મિસાઇલોથી હુમલા કરી રહ્યા છે. મેહર ન્યૂઝ એજન્સીના જણાવ્યા મુજબ ઈરાને આજે બુધવારે(18 જૂન, 2025) વહેલી સવારે ઇઝરાયલ પર ફત્તાહ મિસાઇલો છોડી હતી. ફત્તાહ મિસાઇલ એક હાઇપરસોનિક મિસાઇલ છે જે અવાજની ગતિ કરતા પાંચ ગણી વધુ ઝડપે દોડે છે. બીજી બાજુ ન્યૂઝ એજન્સી રોઇટર્સના જણાવ્યા અનુસાર અમેરિકા મધ્ય પૂર્વમાં વધુ ફાઇટર પ્લેન તૈનાત કરી રહ્યું છે.

ઈરાનના રાજ્ય મીડિયાએ કહ્યું છે કે ઈઝરાયલી સેનાએ ઈરાનની રાજધાની તેહરાનમાં ખોજીર મિસાઈલ ઉત્પાદન સુવિધાને નિશાન બનાવી છે. આ ઉત્પાદન સુવિધા ઈરાન માટે મહત્વપૂર્ણ છે કારણ કે તેમાં બેલિસ્ટિક મિસાઈલ સંબંધિત ઈન્ફ્રાસ્ટ્રક્ચર છે. ઈઝરાયલે ઓક્ટોબર 2024 માં પણ અહીં હુમલો કર્યો હતો.

વોલ સ્ટ્રીટના શેરમાં ઘટાડો

ઈરાન અને ઈઝરાયલ વચ્ચેના સંઘર્ષ અંગે રાષ્ટ્રપતિ ડોનાલ્ડ ટ્રમ્પે નિવેદન આપ્યા બાદ વોલ સ્ટ્રીટના શેરોમાં ઘટાડો થયો હતો. ઈઝરાયલ અને ઈરાન વચ્ચે વધતા લશ્કરી સંઘર્ષ વચ્ચે અમેરિકાએ કહ્યું છે કે તે શુક્રવાર સુધી જેરુસલેમમાં પોતાનું દૂતાવાસ બંધ રાખશે.

રશિયાના વિદેશ મંત્રાલયે મંગળવારે ઈરાન પર સતત ઇઝરાયલી હુમલાઓને ગેરકાયદેસર ગણાવીને વખોડી કાઢ્યા હતા અને કહ્યું હતું કે તેહરાનના પરમાણુ કાર્યક્રમનો ઉકેલ ફક્ત રાજદ્વારી દ્વારા જ આવી શકે છે.