Surendranagar:  સુરેન્દ્રનગર જિલ્લાના મૂળી તાલુકાના ખાટડી ગામમાં ભારે વરસાદના કારણે પ્રાથમિક શાળા પાણીમાં ગરકાવ થઈ ગઈ છે. શાળાના વર્ગખંડોમાં ગળાડૂબ પાણી ભરાઈ જતાં શાળા પરિસરમાં અફરાતફરીનો માહોલ સર્જાયો હતો. વરસાદી પાણીના નિકાલની યોગ્ય વ્યવસ્થા ન હોવાને કારણે આ પરિસ્થિતિ ઉદ્ભવી હોવાનું જાણવા મળ્યું છે.

ભારે વરસાદથી પ્રાથમિક શાળા પાણીમાં ગરકાવ

અભ્યાસ માટે શાળાએ આવેલા બાળકોની સલામતીને ધ્યાને રાખીને તાત્કાલિક શાળાને રજા આપવામાં આવી હતી. શાળા વહીવટીતંત્ર અને સ્થાનિક અધિકારીઓએ બાળકોને સુરક્ષિત રીતે શાળાની બહાર કાઢીને તેમના ઘર સુધી પહોંચાડવાની વ્યવસ્થા કરી હતી. શાળાના વર્ગખંડોમાં પાણી ભરાઈ જવાથી ફર્નિચર, પુસ્તકો અને અન્ય શૈક્ષણિક સામગ્રીને ભારે નુકસાન થવાની ભીતિ સર્જાઈ છે.

રાજ્યમાં વરસાદની સ્થિતિ

ગુજરાત રાજ્યમાં હાલ મોનસૂન સક્રિય થયું છે અને અનેક વિસ્તારોમાં ભારે વરસાદની આગાહી હવામાન વિભાગ દ્વારા કરવામાં આવી છે. સુરેન્દ્રનગર જિલ્લામાં પણ ગત 24 કલાકમાં ભારે વરસાદ નોંધાયો છે. ચોટીલા તાલુકામાં 7.4 ઇંચ, થાનગઢમાં 6.5 ઇંચ, ચુડામાં 6.3 ઇંચ, દસાડામાં 5.5 ઇંચ, લખતરમાં 5.4 ઇંચ, સાયલામાં 5.2 ઇંચ, વઢવાણમાં 4.4 ઇંચ, મૂળીમાં 4 ઇંચ, લીંબડીમાં 3 ઇંચ અને ધ્રાંગધ્રામાં 2.3 ઇંચ વરસાદ નોંધાયો હતો.

 94 લોકોને સલામત સ્થળે ખસેડવામાં આવ્યા 

ભારે વરસાદને કારણે નીચાણવાળા વિસ્તારોમાં પાણી ભરાવાની સમસ્યા સર્જાઈ છે. સુરેન્દ્રનગર શહેર અને જિલ્લાના અન્ય ભાગોમાંથી 94 લોકોને સલામત સ્થળે ખસેડવામાં આવ્યા છે. ભોગવો નદીમાં પૂરની સ્થિતિ સર્જાતાં 22 લોકોનું રેસ્ક્યૂ કરવામાં આવ્યું હતું. રાજ્યના અન્ય જિલ્લાઓ જેવા કે અમદાવાદ, રાજકોટ, ભાવનગર અને બોટાદમાં પણ ગાજવીજ સાથે વરસાદની આગાહી જારી કરવામાં આવી છે.

આગામી દિવસોમાં પણ ભારે વરસાદની આગાહી

જિલ્લા વહીવટીતંત્ર દ્વારા નાગરિકોની સલામતી માટે અગમચેતીના પગલાં લેવામાં આવી રહ્યા છે. હવામાન વિભાગે આગામી દિવસોમાં પણ ભારે વરસાદની આગાહી કરી છે, જેને ધ્યાને રાખીને નાગરિકોને સાવચેત રહેવા અને સલામત સ્થળે રહેવાની સૂચના આપવામાં આવી છે.