Sabarkantha: આજના આધુનિક યુગમાં પણ લોકો હજુ અંધશ્રદ્ધામાંથી બહાર આવી શક્યા નથી ખાસ કરીને ગ્રામ્ય વિસ્તારોમાં અંધશ્રદ્ધાના સૌથી વધુ કિસ્સા સામે આવતા હોય છે.ગુજરાતમાં અંધશ્રદ્ધાને કારણે લોકો સાથે બનતી ઘટનાઓને અટકાવવા માટે સરકારે અંધશ્રદ્ધા વિરોધી કાયદો પસાર કર્યો પરંતુ આવી ઘટનાઓ અટકી નથી રહી. 21મી સદીમાં હજુ પણ અનેક લોકો અંધ શ્રદ્ધાના અને વગર મહેનતે પૈસાદાર થવાની લાલચ રાખે છે અને આખરે છેતરપિંડીનો ભોગ બનતા હોય છે. ત્યારે આવો જ એક અંધશ્રદ્ધાનો કિસ્સો સાબરકાંઠામાંથી સામે આવ્યો છે જેમાં સાબરકાંઠા જિલ્લાના રાઓલ ગામમાં કાળો જાદુ બતાવી રૂપિયાનો વરસાદ કરતાં તાંત્રિક ઝડપાયો છે અલગ અલગ લોકો સાથે રૂપિયાની છેતરપિંડી કરતા જાદર પોલીસે ગુનો નોંધી તાંત્રિકની અટકાયત કરી કાર્યવાહી હાથ ધરી છે.
કાળો જાદુ બતાવી લોકો સાથે છેતરપિંડી કરતા તાંત્રિકની પોલીસે કરી ધરપકડ
મળતી માહિતી મુજબ સાબરકાંઠા જિલ્લામાં જાદર પોલીસ સ્ટેશનની હદમાં આવેલા રાઓલ ગામમાં કાળો જાદુ બતાવી લોકો સાથે છેતરપિંડી કરતા તાંત્રિકની જાદર પોલીસે ધરપકડ કરી છે આ મામલે ભોગ બનનાર પાણપુર ગામનો વ્યક્તિ તોફિક સારોલીયા દ્વારા જાદર પોલીસ મથકમાં ફરિયાદ નોંધાવવામાં આવી હતી અને ત્યારબાદ પોલીસે તપાસ હાથ ધરી હતી. જોકે જાદર પોલીસે વધુ તપાસ કરતાં અન્ય ભોગ બનનાર પણ સામે આવ્યા હતા જેના પણ અત્યારે હાલ જાદર પોલીસે નિવેદન નોંધવાની કાર્યવાહી હાથ ધરી છે જોકે તાંત્રિક અલ્પેશ ઠાકોરની પોલીસે ધરપકડ કરી છે.
1 લાખ રૂપિયાની કરી છેતરપિંડી
જાણકારી મુજબ અંધશ્રદ્ધાના નામે લોકો સાથે છેતરપિંડી કરતો અલ્પેશ ઠાકોર તાજેતરમાં જ રાઓલ ગામના સરપંચ તરીકે ચૂંટાઈ આવ્યો છે જોકે તોફિક સારોલીયા પાસેથી તાંત્રિક વિધિ કરી અને રૂપિયાનો વરસાદ કરાવવાની લાલચ આપી 11 લાખ રૂપિયાની છેતરપિંડી કરી છે આ સાથે જ વડાલીના સગર સમાજના અન્ય બે લોકો પણ આ લાલચનો ભોગ બન્યા છે અને આ તાંત્રિક અલ્પેશ ઠાકોરે બંને વ્યક્તિઓ પાસેથી અલગ અલગ નાણા પડાવી લીધા છે એટલું જ નહીં પરંતુ ભોગ બનનાર લક્ષ્મણ સઘરે પોતાની જમીન વેચી સાથોસાથ બેન અને મમ્મીના દાગીના વેચીને આ તાંત્રિક અલ્પેશ ઠાકોરને રૂપિયા ધીર્યા હતા જોકે અલ્પેશ ઠાકોરે કરોડપતિ બનવાના સપના બતાવ્યા હતા તે સપના ઉપર પાણી ફરી ઉઠ્યું હતું તો અન્ય વડાલીના જ રહેવાસી રાજેન્દ્ર સગર પણ આવી જ રીતે લોભામણી લાલચોનો ભોગ બની 32 લાખ રૂપિયા જેટલા નાણા આ અલ્પેશ ઠાકોરને આપી છેતરાયા હતા.
સરપંચનો ચાર્જ સંભાળે તે પહેલા જ અલ્પેશ ઠાકોરની ધરપકડ
જોકે આ તમામ વ્યક્તિઓ હાલતો જાદર પોલીસ મથકે પહોંચ્યા છે અને અલ્પેશ ઠાકોર વિરુદ્ધ ફરિયાદ આપવા માટે તૈયાર થયા છે જોકે હાલ તો જાદર પોલીસે અલ્પેશ ઠાકોર વિરુદ્ધ ફરિયાદ દાખલ કરી અલ્પેશ ઠાકોરની ધરપકડ કરી લીધી છે. મહત્વનું છે કે, સરપંચ તરીકે ચૂંટાયેલા આ તાંત્રિક અલ્પેશ ઠાકોર હજુ તો ગ્રામ પંચાયતના સરપંચ તરીકેનો ચાર્જ પણ સંભાળ્યો નથી તેવામાં જ પોલીસે તેની ધરપકડ કરી લીધી છે તાંત્રિક વિધિના નામે લોકો સાથે છેતરપિંડી આચરી હોવાની ફરિયાદના આધારે પોલીસે હાલ તો ગુનો દાખલ કરી તપાસનો ધમધમાટ શરૂ કર્યો છે જોકે આ તાંત્રિક દ્વારા હજુ કેટલા લોકો સાથે છેતરપિંડી આચરી છે તે દિશામાં પણ તપાસ હાથ ધરી છે.
અહેવાલ : ઉમંગ રાવલ
