Narmada Dam : ગુજરાતમાં ચોમાસાની શરૂઆતથી જ ભારે વરસાદે રાજ્યના અનેક વિસ્તારોને આવરી લીધા છે. ઉપરવાસમાં પડેલા ભારે વરસાદને કારણે ગુજરાતનો સૌથી મોટો સરદાર સરોવર ડેમ હાલ 131 મીટરની જળસપાટીને પાર કરી ગયો છે, જે તેની સંપૂર્ણ ક્ષમતા 138.68 મીટરથી માત્ર 7 મીટર દૂર છે. આ સ્થિતિને નિયંત્રિત કરવા માટે ડેમના 5 દરવાજા ખોલવામાં આવ્યા છે અને 50,000 ક્યુસેક પાણી નર્મદા નદીમાં છોડવામાં આવ્યું છે.

ડેમની સ્થિતિ અને પાણીનો પ્રવાહ

સરદાર સરોવર ડેમમાં ભારે વરસાદને કારણે પ્રતિ સેકન્ડ 4,10,000 ક્યુસેક પાણીની આવક નોંધાઈ રહી છે. આ વધતા જળસ્તરને નિયંત્રણમાં રાખવા માટે ડેમના દરવાજા ખોલવાનો નિર્ણય લેવામાં આવ્યો છે. 2017માં ડેમના લોકાર્પણ બાદ આ છઠ્ઠી વખત છે જ્યારે દરવાજા ખોલવામાં આવ્યા છે. આ પહેલાં 15 સપ્ટેમ્બર 2019ના રોજ ડેમનું જળસ્તર 138.68 મીટરની સંપૂર્ણ ક્ષમતાએ પહોંચ્યું હતું, જે ઐતિહાસિક ઘટના હતી. 17 સપ્ટેમ્બર 2019ના રોજ પ્રધાનમંત્રી નરેન્દ્ર મોદીએ આ ઘટનાને નિહાળી હતી.

નજીકના વિસ્તારોને ચેતવણી

ડેમમાંથી 50,000 ક્યુસેક પાણી નર્મદા નદીમાં છોડવામાં આવતાં નદી બે કાંઠે વહી રહી છે. આને કારણે નર્મદા નદીના કાંઠે આવેલા ગામો અને વિસ્તારોને એલર્ટ જાહેર કરવામાં આવ્યું છે. વધતા પાણીના પ્રવાહને કારણે પૂરની સંભાવનાને ધ્યાનમાં રાખીને નજીકના વિસ્તારોમાં સાવચેતીના પગલાં લેવામાં આવી રહ્યાં છે.

ક્યાંક ખુશી ક્યાંક ગમનો માહોલ 

ભારે વરસાદે કેટલાક વિસ્તારોમાં ખુશી લાવી છે, પરંતુ ઘણા વિસ્તારોમાં પૂરની સ્થિતિ, ઘરોને નુકસાન અને જીવન જરૂરિયાતના સામાનની અછત જેવી મુશ્કેલીઓ પણ સર્જી છે. સરદાર સરોવર ડેમનું વધતું જળસ્તર ગુજરાતના પાણીના સંગ્રહ માટે સારા સમાચાર છે, પરંતુ નર્મદા નદીના કાંઠે રહેતા લોકો માટે સાવધાની રાખવી જરૂરી છે. ડેમના દરવાજા ખોલવાથી પાણીનો પ્રવાહ નિયંત્રિત રાખવાનો પ્રયાસ કરવામાં આવ્યો છે, પરંતુ નજીકના વિસ્તારોમાં એલર્ટ જાહેર કરીને સ્થાનિક વહીવટીતંત્ર દ્વારા સતર્કતા જાળવવામાં આવી રહી છે.

આ પણ વાંચો:

Junagadh: માછીમારો અને પોલીસ વચ્ચે છુટ્ટાહાથની મારામારી, માછીમારો કેમ પોલીસ તૂટી પડ્યા?