Vadodara News: હવે ગુજરાતમાં ખંડણીખોર પત્રકારનો રાફડો ફાટ્યો હોય તેમ વારંવાર પકડાઈ રહ્યા છે. તાજેતરમાં જ દિવ્ય ભાસ્કરના પત્રકાર દિર્ઘાયુ વ્યાસ સામે કાર્યવાહી હાથ ધરાઈ છે. ત્યારે હવે વડોદરામાંથી વધુ એક ખંડણીખોર પત્રકાર સામે પોલીસે કાર્યવાહી હાથ ધરી છે. વડોદરાના મકરપુરા GIDCમાં પેકેજિંગ ફેક્ટરી ધરાવતા ઉદ્યોગપતિને GST રેડના નામે બદનામ કરીને મીડિયા ટ્રાયલ ચલાવવાની ધમકી આપી 5 લાખ રૂપિયાની ખંડણી વસૂલવાનો કિસ્સો સામે આવ્યો છે. આ ઘટનાની ફરિયાદમાં એક ન્યૂઝ ચેનલના ચીફ મેનેજિંગ ડિરેક્ટર (CMD) તરીકે ઓળખાવતા ગિરીશ નાનજીભાઇ સોલંકીનું નામ આવ્યું છે.
ગિરીશ સોલંકી ગુજરાત હેડલાઈનમાં કામ કરે છે!
ફરિયાદી અનુપસિંહ પ્રિતમસિંહ ઠાકુરે અટલાદરા પોલીસ સ્ટેશનમાં આ ગુનો નોંધાવ્યો છે, જેમાં આરોપીએ ફરિયાદીના પુત્રનું અપહરણ કરવાની, બંદૂકથી જાનથી મારી નાખવાની અને ફેક્ટરીને બંધ કરાવી દેવાની ગંભીર ધમકીઓ આપી હોવાનું જણાવાયું છે. આ કેસમાં પોલીસ તપાસ શરૂ કરી દીધી છે, જે ન્યૂઝ મીડિયાના દુરુપયોગ અને ખંડણીના નેટવર્કને ઉજાગર કરવાની તરફ નિર્દેશ કરે છે. આ ખંડણીખોર પત્રકાર ગિરીશ સોલંકી ‘ગુજરાત હેડલાઈન’ નામના છાપામાં કામ કરતો હોવાની માહિતી મળી રહી છે. આ છાપાના ગૃપ એડિટર જગદીશ મહેતા છે.
ફેક્ટરી માલિકને વારંવાર ધમકાવતો
ફરિયાદી અનુપસિંહ પ્રિતમસિંહ ઠાકુર કલાલી બ્લુબેઝ ટાવરમાં રહે છે અને તેમની કે.પી.એન્જિનિયર્સ એન્ડ ફેબ્રિકેટર્સ નામની પેકેજિંગ ફેક્ટરી મકરપુરા GIDCમાં સ્થિત છે. તેમના જણાવ્યા મુજબ, આ બધું પાંચ વર્ષ પહેલાંની એક નાની ઘટનાથી શરૂ થયું હતું. તે સમયે ગિરીશ સોલંકી તેમની જ સોસાયટીના વિસેન્ઝા હાઇડેક, મલબરી ટાવરમાં રહેવા આવ્યા હતા. સોલંકીએ પોતાને એક મોટા ન્યૂઝ ચેનલના CMD તરીકે પરિચય આપતા સોસાયટીના અનેક રહીશોને ધમકાવવાનું શરૂ કર્યું હતું.
“અમે તેમને સમજાવવાનો પ્રયત્ન કર્યો, પણ તેમણે ગાળાગાળી કરી અને કહ્યું કે ‘તારા છોકરાને હું ઉઠાવી જઇશ, જીવતો પણ નહીં મળે. તારામાં તાકાત હોય તો મારી ઓફિસે આવ,'” ફરિયાદમાં અનુપસિંહે લખ્યું છે. આ ઘટના પછી તેઓએ સોલંકી સાથે વાત કરવાનું બંધ કરી દીધું હતું, પરંતુ તાજેતરની ઘટનાઓએ જૂની દુશ્મનીને નવી રૂપ આપી દીધી.
8 ઓગસ્ટ, 2025ના રોજ સોલંકીએ સોસાયટીના વોટ્સએપ ગ્રૂપમાં એક મેસેજ મોકલ્યો, જેમાં તેમણે અનુપસિંહની ફેક્ટરી વિશે વિગતવાર આરોપો લગાવ્યા. મેસેજમાં કહેવામાં આવ્યું હતું: “આપણી સોસાયટીના રહીશ અને મકરપુરા GIDCમાં ફેક્ટરી ધરાવતા વ્યક્તિને ત્યાં 8 મહિના અગાઉ GSTના દરોડા પડ્યા હતા. સૂત્રો પાસેથી મળતી માહિતી અનુસાર આ ફેક્ટરીના માલિક અને GST અધિકારીએ રૂ. 25 લાખમાં આ કેસ રફા-દફા કરી દીધો છે. આ બંને પર એક્શન લેવડાવીશ, મીડિયા ટ્રાયલ ચાલુ કરાવીશ.” આ મેસેજથી અનુપસિંહને લાગ્યું કે તેમની નોકરી-ધંધો અને પારિવારિક જીવનને જોખમમાં મુકવામાં આવ્યું છે
બ્લેકમેલરની ધમકી
બીજા દિવસે, જ્યારે અનુપસિંહ ઓફિસ જવા માટે નીકળ્યા હતા, ત્યારે એક અજાણ્યા વ્યક્તિએ મોં પર રૂમાલ બાંધીને તેમને અટકાવ્યો. તે વ્યક્તિએ કહ્યું: “તારા કરતૂતો ન્યૂઝ ચેનલમાં જાહેર ના કરવા હોય તો ગિરીશભાઇએ 5 લાખ મંગાવ્યા છે. સાંજ સુધીમાં ઓફિસે પહોંચતા કરી દેજે. નહીંતર તું અને તારી ફેક્ટરી ખોવાઇ જશે.” આ ધમકીથી અનુપસિંહ આઘાતમાં આવી ગયા અને તેમણે તરત જ પોલીસને જાણ કરવાનું વિચાર્યું, પરંતુ પછી તેમણે પૈસા આપવાનો ઇનકાર કર્યો.પૈસા ન મળતાં સોલંકીએ 4 નવેમ્બર, 2025 (મંગળવાર)ના રોજ વોટ્સએપ ગ્રૂપમાં ફરીથી અનુપસિંહ વિશે અપશબ્દો વાપર્યા. તેમણે લખ્યું કે તેમના પાસે અસલ દસ્તાવેજો આપીને બંદૂકનું લાયસન્સ મળ્યું છે અને તે “ફુલ્લી લોડેડ” છે. આ મેસેજમાં તેમણે સ્પષ્ટ ધમકી આપી કે કોઈ પણ વ્યક્તિ તેમની વિરુદ્ધ ફરિયાદ કરે તો તેમના પુત્રને અપહરણ કરીને હત્યા કરી દેશે.
અનુપસિંહે પોલીસને જણાવ્યું, “આવી ધમકીઓથી મારો સમગ્ર પરિવાર ભયભીત બન્યો છે. મારી ફેક્ટરી પર GST રેડની વાત એકદમ ખોટી છે અને તેના દ્વારા મને બદનામ કરવાનો પ્રયાસ કરવામાં આવી રહ્યો છે.
આરોપી સામે 3 કેસ અને સોસાયટીમાંથી હાકલ પટ્ટી
ગિરીશ સોલંકી વિશે પોલીસ રેકોર્ડમાં તાજેતરમાં ખંડણી, હથિયાર બંધીનો ભંગ અને દારૂના ત્રણ કેસ નોંધાયા છે. આ ચોથી ફરિયાદ છે. અગાઉ તેમને સોસાયટીની કમિટીમાં મેમ્બર બનાવવામાં આવ્યા હતા, પરંતુ અન્ય સભ્યો સાથે ઝઘડા, ગાળાગાળી અને ધમકીઓ આપવાના કારણે ચાર વર્ષ પહેલાં એક જનરલ મીટિંગમાં તેમને કમિટીમાંથી હાંકી કાઢવામાં આવ્યા હતા. અનુપસિંહે ફરિયાદમાં ઉલ્લેખ કર્યો છે કે સોલંકી તેમને વારંવાર કહેતા કે, “જેને મારી વિરુદ્ધ ફરિયાદ કરવી હોય તેને છૂટ છે. છેડતી અને બળાત્કારની ફરિયાદ કરવી હોય તો પણ છૂટ છે. કોર્પોરેશનના HOD સહિત ત્રણ ઓફિસરને ઘર ભેગા કરાવી દીધા છે. એ પણ અમારા ન્યૂઝની ઇમ્પેક્ટ છે.” આ વાતોમાંથી સ્પષ્ટ થાય છે કે આરોપી પોતાના મીડિયા પ્લેટફોર્મનો દુરુપયોગ કરીને અધિકારીઓ અને વ્યક્તિઓને ધમકાવે છે.
પોલીસ તપાસ
અટલાદરા પોલીસ સ્ટેશનના પીએસઆઇ (નામ જાહેર નહીં)એ જણાવ્યું કે ફરિયાદ મળ્યા પછી ગુનો નોંધાયો છે. “અમે વોટ્સએપ મેસેજો, સીસીટીવી ફૂટેજ અને સાક્ષીઓના નિવેદનો એકત્ર કરી રહ્યા છીએ. આરોપીના બંદૂક લાયસન્સની તપાસ પણ કરવામાં આવશે. જો આવા કેસમાં મીડિયા ચેનલનો દુરુપયોગ સાબિત થયો તો વધુ કડક કાર્યવાહી કરાશે,” તેમણે કહ્યું. પોલીસે સોલંકીને લોકઅપમાં લેવાની તૈયારીઓ પણ શરૂ કરી દીધી છે.
ઉદ્યોગપતિઓમાં ભયનું વાતાવરણ
આ ઘટનાએ વડોદરાના GIDC વિસ્તારમાં ઉદ્યોગપતિઓમાં ભયનું વાતાવરણ ફેલાવી દીધું છે. એક સ્થાનિક ઉદ્યોગ સંઘના અધિકારીએ નામ ન જણાવતા કહ્યું, “આવા કેસ GST જેવા કાયદાઓના નામે ઉદ્યોગપતિઓને બદનામ કરીને પૈસા વસૂલવાના ગુનેગારોને વધારે શક્તિ આપે છે. મીડિયાનો દુરુપયોગ રોકવા માટે કડક કાયદા જરૂરી છે.” આ કેસ વડોદરા પોલીસ માટે એક પડકારરૂપ છે, કારણ કે તેમાં મીડિયા, ખંડણી અને હથિયારોનું મિશ્રણ છે.આ ઘટના મીડિયા જવાબદારી અને ડિજિટલ પ્લેટફોર્મ પરની ધમકીઓના મુદ્દાને ફરીથી ઉજાગર કરે છે. પોલીસ તપાસના આધારે વધુ વિગતો સામે આવશે.
આ પણ વાંચો:
દિવ્ય ભાસ્કરના ડિજિટલ હેડ મનીષ મહેતા નીચે રેલો?, દીર્ઘાયુ વ્યાસે વટાણા વેરી દીધા? | Dirghayu Vyas
Vote Scam: વોટ ચોરી મામલે ગોલી માર ઠાકુર બાદ “ઉર્જાવીર” ભંડારીએ ભાજપને ભેખડે ભેરવ્યું
