Alpesh Kathiria: સુરતમાં ભાજપના બે જૂથ વચ્ચે ઉત્તરાયણ ઉપર ‘હોળી’ સર્જાતા ઉત્તરાયણ ઉપર પતંગ ખરીદવા આવેલા લોકોએ મફતમાં મનોરંજન માણ્યું હતું જેમાં પોલીસ કર્મીઓ પણ સામેલ હોવાનું કહેવાય રહ્યું છે કારણ કે બબાલ સમયે પોલીસ પણ સ્થળ ઉપર હાજર હતી તેવું ફરિયાદીએ નિવેદન આપ્યું છે.
વિગતો મુજબ ભાજપના નેતા અલ્પેશ કથીરિયાના ભાઈએ ઉત્તરાયણ પર્વ ઉપર સરથાણા ખાતે કિરણ ચોકમાં ‘પાટીદાર પાઘડીવાળા’ નામે પતંગનો સ્ટોલ નાખ્યો હતો જ્યાં આ બબાલ થઈ હતી જેમાં સામસામે ફરિયાદ નોધાઈ છે.
ભાજપ નેતા અલ્પેશ કથીરિયા ના ભાઈના આ સ્ટોલ ઉપર રાતના સમયે ભાજપના પૂર્વ કોર્પોરેટર કૈલાશબેન ભાલીયાનો પુત્ર ચંદ્રેશ ભાલિયા (ઉં.વ. 27, રહે. ભરત નગર,વરાછા) પોતાના બે મિત્રો સાગર ચૌહાણ અને અશ્વિન બારૈયા સાથે પતંગની ખરીદી કરવા ગયો ત્યારે પતંગના ભાવતાલ મુદ્દે ચંદ્રેશ ભાલિયાની અલ્પેશ કથીરિયાના ભાઈ સાથે બોલાચાલી થઈ હતી,જે બાદમાં ઉગ્ર સ્વરૂપ ધારણ કરતાં સ્ટોલના સંચાલકે પોતાના ભાઈ અને ભાજપના અગ્રણી એવા પાટીદાર નેતા અલ્પેશ કથીરિયાને ફોન કરતા અલ્પેશ કથીરિયા તાત્કાલિક સ્ટોલ પર ધસી ગયા હતા અને બબાલમાં જોડાયા હતા.
આ દરમિયાન ચંદ્રેશના જણાવ્યા મુજબ માઈકમાં ગાળો બોલી રહયા હોય મેં બજરંગ દળ અને RSSનો કાર્યકર હોવાથી ગાળો બોલવાની ના પાડી હતી અને રિકવેસ્ટ કરી હતી કે અહીં મહિલાઓ પણ હોય અભદ્ર શબ્દો ન બોલો” પણ અલ્પેશ અને તેનો ભાઈ દાદાગીરી ઉપર ઉતરી આવ્યા હતા ત્યારબાદ અલ્પેશ કથીરિયા સહિત ત્રણેયએ ભેગા મળીને ચંદ્રેશ ભાલિયા અને તેના બે મિત્રોને માર માર્યો હતો આ અંગે ચંદ્રેશ ભાલિયાએ પોલીસ અલ્પેશ સહિત ત્રણ સામે ફરિયાદ નોંધાવી હતી.
ચંદ્રેશ ભાલિયાએ આરોપ લગાવ્યો કે અલ્પેશ કથીરિયા અને તેના ભાઈ દ્વારા જ્યારે પોતાને અને તેના મિત્રોને માર મારવામાં આવી રહ્યો હતો તે દરમિયાન ત્યાં પોલીસ પણ હાજર હતી પરંતુ પોલીસે માત્ર તમાશો જોયો હતો અને તેઓને બચાવવાનો કોઈ પ્રયાસ કર્યો ન હતો.
બાદમાં જેમતેમ કરી સરથાણા પોલીસ મથકે પહોંચ્યા બાદ ચંદ્રેશ ભાલિયાએ અલ્પેશ કથિરીયા સહિત 3 જણા વિરુદ્ધ ફરિયાદ નોંધાવતા પોલીસે ગુનો દાખલ કરીને આગળની કાયદેસરની કાર્યવાહી હાથ ધરી છે.
જ્યારે બીજી તરફપાટીદાર પાઘડીવાળા પતંગના દુકાનના માલિક અંકિત ખંભાળ દ્વારા પણ ભાજપના પૂર્વ કોર્પોરેટર કૈલાશબેન ભાલિયાના પુત્ર ચંદ્રેશ ભાલિયા સહિત ચાર સામે સરથાણા પોલીસ સ્ટેશનમાં વળતી ફરિયાદ નોંધાવવામાં આવતા સામસામી ફરિયાદ થઈ છે.
આમ,ઉત્તરાયણ પર્વ ઉપર સુરતમાં ભાજપનાજ નેતાઓના બે ગ્રુપ વચ્ચે ‘હોળી’ ખેલાતા મામલો ભારે ચર્ચાસ્પદ બન્યો છે.
આ પણ વાંચો:
Police recruitment: ગુજરાત પોલીસમાં ભરતી માટે થઈ જાવ રેડી; PSI-LRDની શારીરિક કસોટીની તારીખો જાહેર!
