Budget: ગુજરાત સરકાર દ્વારા રજૂ કરવામાં આવેલા વર્ષ 2026-27ના બજેટને ‘ગામડા વિરોધી’ ગણાવી આમ આદમી પાર્ટી દ્વારા વિરોધ પ્રદર્શન કરવામાં આવ્યું હતુ જ્યારે વિરોધ કરી રહેલા કોંગ્રેસના કાર્યકરો ઉપર પાણીનો મારો ચલાવવામાં આવ્યો હતો, આમ આદમી પાર્ટીના જામજોધપુરના ધારાસભ્ય હેમંત ખવા સચિવાલય ખાતે સવારે ટ્રેક્ટર વિધાનસભા પહોંચ્યા હતા જ્યાં તેઓને અટકાવવામાં આવ્યા હતા.
આમ આદમી પાર્ટીના આગેવાનોએ બજેટનો વિરોધ કરતા જણાવ્યું કે રાજ્યમાં 52 ટકા વસ્તી ગામડાઓમાં રહે છે, ત્યારે તેઓ માટે ફક્ત ₹ 14,000 કરોડ રૂપિયા ફાળવવામાં આવ્યા છે. જ્યારે 48 ટકા શહેરી વસ્તી માટે 33,000 કરોડ રૂપિયાની ફાળવણી કરવામાં આવી છે જે ગામડાઓને અન્યાય કરાયો હોવાનું સ્પષ્ટ થાય છે જેથી આ બજેટ ફક્તને ફક્ત ઉદ્યોગપતિઓ અને શહેરી વિકાસને કેન્દ્રમાં રાખીને તૈયાર કરાયું હોવાનું જણાય રહ્યું છે.
આમ આદમી પાર્ટીના ધારાસભ્ય ચૈતર વસાવાએ પણ આ બજેટમાં ખેડૂતો, બેરોજગાર યુવાનો અને મધ્યમ વર્ગના લોકો માટે કોઈ નક્કર જોગવાઈ નહી હોવાનું જણાવી બજેટને નિરાશાજનક ગણાવ્યું છે. તેઓના મતે સરકારે જે ‘અમૃતકાળ’ના બજેટની વાત કરી છે તે સામાન્ય માણસ માટે માત્ર નિરાશા લઈને આવ્યું છે.
દરમિયાન, આજે ગાંધીનગર મહાનગરપાલિકાના વર્ષ 2026-27ના બજેટને મંજૂરી આપવા માટે મેયરના અધ્યક્ષ સ્થાને સામાન્ય સભા યોજાય એ પહેલા ગાંધીનગર કોંગ્રેસના કેટલાક કાર્યકરો દ્વારા બજેટમાં ટેક્સ સહિતના કેટલાક લોકવિરોધી મુદ્દાઓને લઈને વિરોધ પ્રદર્શન કરતા વોટર બાઉઝર વડે તેઓ ઉપર પાણીનો મારો ચલાવવાની ફરજ પડી હતી જેમાં કોંગ્રેસના કેટલાક કાર્યકર પાણીમાં પલળતા રહયા અને સુત્રોચાર કરતા રહયાના દ્રશ્યો જોવા મળ્યા હતા જોકે,કોંગ્રેસના વિરોધ પ્રદર્શન વચ્ચે સામાન્ય સભામાં બજેટ સર્વાનુમતે મંજૂર કરવામાં આવ્યું હતું.
