Tariff Threat: અમેરિકાના રાષ્ટ્રપતિ ડોનાલ્ડ ટ્રમ્પે હવે દુનિયાના તમામ દેશોને આદેશ આપી દીધો છે કે ઈરાન સાથે કોઈ પણ દેશોએ વેપાર કરવાનો નથી, અને મારા આદેશ બાદ પણ કોઈ દેશ ઈરાન સાથે વેપાર કરશેતો 25 ટકા વધુ ટેરીફ ચૂકવવો પડશે.ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ પર પોસ્ટ કરીને કહ્યું કે, ‘ઈરાન સાથે વેપાર કરતા કોઈપણ દેશે તાત્કાલિક અસરથી અમેરિકા સાથે કરવામાં આવતા તમામ પ્રકારના વેપાર પર 25 ટકા ટેરિફ ચૂકવવો પડશે.’
ડોનાલ્ડ ટ્રમ્પે પોતાના આદેશને અંતિમ અને નિર્ણાયક ગણાવ્યો.ટ્રમ્પના નિર્ણયથી ઈરાન પર દબાણ વધવાની ધારણા છે. નોંધનીય છે કે ઈરાનમાં છેલ્લા 15 દિવસથી દેશવ્યાપી વિરોધ પ્રદર્શનો થઈ રહ્યા છે.ટ્રમ્પે પોતાની પોસ્ટમાં સ્પષ્ટતા કરી હતી કે આ ટેરિફ તાત્કાલિક અમલમાં આવશે.અગાઉ, વ્હાઇટ હાઉસના પ્રેસ સેક્રેટરી કેરોલિન લેવિટે પણ ઈરાનને પરોક્ષ ચેતવણી આપી હતી.
● વ્હાઇટ હાઉસે કઈ ચેતવણી આપી?
અમેરિકા અને ઈરાન વચ્ચે વધી રહેલા તણાવને ધ્યાનમાં રાખીને, કેરોલિન લેવિટે કહ્યું, “રાષ્ટ્રપતિ ટ્રમ્પ હંમેશા બધા વિકલ્પો ખુલ્લા રાખે છે.રાજદ્વારી તેમની પહેલી પસંદગી છે, પરંતુ જો જરૂરી હોય તો લશ્કરી કાર્યવાહી, હવાઈ હુમલા પણ વિકલ્પો છે.” લેવિટે કહ્યું કે રાષ્ટ્રપતિ ટ્રમ્પ પરિસ્થિતિ પર નજીકથી નજર રાખી રહ્યા છે. તેમણે સમજાવ્યું કે ઈરાની શાસન જાહેર મંચો પર જે નિવેદનો આપી રહ્યું છે તે યુએસ વહીવટીતંત્રને આંતરિક ચેનલો દ્વારા મળી રહેલા ખાનગી સંદેશાઓથી અલગ છે.
તેમણે કહ્યું કે ટ્રમ્પ આ ખાનગી સંદેશાઓની ગંભીરતાથી તપાસ કરવા માંગે છે અને જોવા માંગે છે કે શું વાતચીત માટે કોઈ વાસ્તવિક અવકાશ છે.ઉલ્લેખનીય છે કે ઈરાને કહ્યું હતું કે વાતચીતનો માર્ગ ખુલ્લો છે. જોકે, ઈરાન સતત અમેરિકા વિરુદ્ધ નિવેદનો આપી રહ્યું છે. ઈરાન ઈઝરાયલ અને અમેરિકા પર દેશને અસ્થિર કરવાનો આરોપ લગાવી રહ્યું છે.
● ટ્રમ્પ કડક પગલાં લેતા અચકાશે નહીં: કેરોલિન લેવિટ
વ્હાઇટ હાઉસના પ્રવક્તાએ કહ્યું, “ટ્રમ્પ હંમેશા વાતચીત અને રાજદ્વારી કાર્યવાહીને પ્રાથમિકતા આપે છે.તેમનું માનવું છે કે કોઈપણ મુકાબલો પહેલાં બધા શાંતિપૂર્ણ વિકલ્પોનો ઉપયોગ કરી લેવો જોઈએ.” જોકે, તેમણે સ્પષ્ટતા કરી કે જો અમેરિકન સુરક્ષા અથવા હિતોને જોખમમાં મૂકવામાં આવે છે, તો રાષ્ટ્રપતિ કડક નિર્ણયો લેતા અચકાશે નહીં.
આ પણ વાંચો:
Police recruitment: ગુજરાત પોલીસમાં ભરતી માટે થઈ જાવ રેડી; PSI-LRDની શારીરિક કસોટીની તારીખો જાહેર!
