Rishabh Pant: ભારતીય ટીમના વિકેટકીપર બેટ્સમેન ઋષભ પંતે પહેલી ઇનિંગ્સ બાદ લીડ્સ ટેસ્ટની બીજી ઇનિંગ્સમાં પણ સદી ફટકારી છે. ચોથા દિવસે શરૂઆતમાં જ બેટિંગ માટે આવી ગયા હતા. કેપ્ટન શુભમન ગિલના આઉટ થયા બાદ બેટિંગમાં આવેલા ઋષભ પંતે 130 બોલમાં પોતાની 8મી ટેસ્ટ સદી ફટકારી. તેણે મેચની પહેલી ઇનિંગ્સમાં 134 રન બનાવ્યા હતા. આ ઇંગ્લેન્ડમાં ભારતીય ઉપકેપ્ટનની ચોથી ટેસ્ટ સદી છે.

પંત બંને ઇનિંગ્સમાં સદી ફટકારનારા 7મા ભારતીય

ટેસ્ટ મેચની બંને ઇનિંગ્સમાં સદી ફટકારનારા ઋષભ પંત ભારતના પહેલા વિકેટકીપર અને  7મા બેટ્સમેન છે. તેમની પહેલાં વિજય હઝારે, સુનીલ ગાવસ્કર, રાહુલ દ્રવિડ, વિરાટ કોહલી, અજિંક્ય રહાણે અને રોહિત શર્મા આ કારનામું કરી ચૂક્યા છે. તેઓ ઇંગ્લેન્ડમાં આવું કરનારા પહેલા ભારતીય છે. આ સાથે ઇંગ્લેન્ડ સામે પણ અત્યાર સુધી કોઈ ભારતીય બેટ્સમેન ટેસ્ટ મેચની બંને ઇનિંગ્સમાં સદી ફટકારી શક્યો નહોતો.

ઋષભ પંત પહેલાં ટેસ્ટ ઇતિહાસમાં માત્ર એક જ વિકેટકીપર બેટ્સમેનના નામે બંને ઇનિંગ્સમાં સદી હતી. ઝિમ્બાબ્વેના એન્ડી ફ્લાવરે 2000માં ભારત સામે નાગપુરમાં આ કારનામું કર્યું હતું. 44મી મેચ રમી રહેલા પંતની આ 8મી સદી છે. ટેસ્ટ ક્રિકેટમાં તેઓ 7 વખત નર્વસ નાઇન્ટી પર આઉટ થયા છે.

108 બોલમાં તેઓ 95 રન સુધી પહોંચી ગયા

ઋષભ પંતે ધીમી શરૂઆત કરી હતી. તેમણે 83 બોલમાં પોતાની અડધી સદી પૂર્ણ કરી, પરંતુ ત્યારબાદ તોફાની બેટિંગ શરૂકરી. 108 બોલમાં તેઓ 95 રન સુધી પહોંચી ગયા હતા. જોકે, ત્યારબાદ થોડા ધીમા પડ ગયા. સદી સુધી પહોંચતાં તેમણે 13 ચોક્કા અને બે છગ્ગા ફટકાર્યા.