Kheda News: ખેડા જીલ્લાના માતરના વારૂકાંસ નજીક ગત શુક્રવારે રાત્રે પુરપાટે જતી કારે રિક્ષાને  ધડકાભેર ટક્કર મારતાં ગમખ્વાર અકસ્માત સર્જાયો હતો.  આ અકસ્માતમાં એક વૃધ્ધા સહિત રિક્ષાચાલકનું ઘટનાસ્થળે, જ્યારે પૌત્રનુ સારવાર વખતે મોત થઈ ગયું હતુ. જ્યારે 4 જેટલાં લોકોને ગંભીર ઈજાઓ પહોંચી હતી. જાણવા મળી રહ્યું છે સીંજીવાડાનો પરિવાર લગ્નમાં છઠ્ઠા માઈલ જઈ રહ્યો હતો.

પ્રાપ્ત માહિતી અનુસાર માતર તાલુકાના સીંજીવાડા ગામના મલેક ફળીયાની મસ્જિદ પાછળ રહેતા હૈદરમીયા અહેમદમીયા કુરેશી (ઉં.વ.33) પરિવાર  રહે છે. તેમના પરિવારના લોકો  તા. 9 મે ના રોજ છઠ્ઠા માઇલમાં રહેતાં માસા ઇસુબમીયા અલ્લાઉદ્દીનમીયા ચૌહાણની દીકરીના લગ્ન હતા.

જેથી શનિવારે સાંજના 7:00 વાગ્યાના સમયમાં મોટાભાઈ ઇરશાદમીયાની રિક્ષામાં પત્ની નફીશાબાનુ, ભત્રીજીઓ ફીઝાબાનુ અને સાનિયાબાનુ, ભત્રીજા અયાન (ઉં.વ.14) અને ફરહાન તેમજ માતા ઝહીરનબીબી લગ્નમાં જવા નીકળ્યા હતા.  આ દરમિયાન એક ઈકો કારે સામેથી રોંગ સાઈડ આવી રિક્ષાને જોરદાર ટક્કર મારી દીધી હતી.

 જેથી રિક્ષામાં સવાર સાતેય વ્યક્તિઓને શરીરે ઇજાઓ પહોંચી હતી. જેમાં ઝહીરનબીબી (ઉં.વ.57) અને રીક્ષા ચાલક ઇરશાદ (ઉં.વ.37) શરીરે ગંભીર ઇજા થતાં ઘટનાસ્થળે મોત થયું હતું. અન્ય ઘવાયેલા વ્યક્તિને તાત્કાલિક સારવાર અર્થે ખેડા સિવિલ હોસ્પિટલે ખસેડાયા હતા. સારવાર દરમિયાન અયાન (ઉં.વ.14)નું મોત થયું હતું. આ ઘટના બાદ પરિવારમાં ભારે આક્રંદ છવાઈ  ગયો છે. કાર ચાલકની બેદરકારીને કારણે પરિવાર જીવ ગુમાવ્યો છે.