Mexico: મેક્સિકન સેનાએ દેશના સૌથી મોટા ડ્રગ કાર્ટેલના લીડરને ઠાર મારતા તોફાનો ફાટી નીકળ્યા છે,નેમેસિયો રુબન ઓસેગુએરા સર્વેન્ટેસ ઉર્ફે અલ મેન્ચો જલિસ્કો ન્યૂ જનરેશન કાર્ટેલ (CJNG)નો લીડર હતો અને દુનિયાના મોસ્ટ વોન્ટેડ ગુનેગારો પૈકીનો એક હતો,સંરક્ષણ મંત્રાલય અનુસાર, જલિસ્કોમાં સેનાની કાર્યવાહી દરમિયાન તે ઘાયલ થયો હતો જેથી તેને એરલિફ્ટ કરીને મેક્સિકો ખાતે લઈ જવામાં આવી રહ્યો હતો ત્યારે તેનું રસ્તામાં જ મોત થઈ ગયું હતું.
મેક્સિકોના રક્ષા મંત્રાલયના સૂત્રોના જણાવ્યા અનુસાર, અલ મેન્ચોને પશ્ચિમી દરિયાકાંઠાના રાજ્ય જલિસ્કોના તપલપા શહેરમાંથી પકડી લેવામાં આવ્યો હતો,આ શહેર લગભગ 20,000 વસ્તી ધરાવે છે, જ્યાં તેનું કાર્ટેલ શરૂ થયું હતું અને સક્રિય હતું. સૈનિકો સાથેની અથડામણમાં અલ મેન્ચો ઘાયલ થયો અને સારવાર માટે મેક્સિકો સિટી લઈ જતી વખતે રસ્તામાં તેનું મૃત્યુ થયુ હતું.
ડ્રગ્સ ડોન મેન્ચોના મોત બાદ જલિસ્કો સહિતના રાજ્યોમાં અલ મેન્ચોના સમર્થકો દ્વારા હિંસક તોફાનો ફાટી નીકળ્યા હતા. કેટલીક જગ્યાએ વાહનોમાં આગચંપી થતા હાઈવે ઉપર ટ્રાફિક જામના દ્રશ્યો સામે આવ્યા હતા, આ કાર્ટેલને સિનાલોઆ કાર્ટેલ જેટલું જ શક્તિશાળી માનવામાં આવે છે, જે મેક્સિકોના સૌથી બદનામ ક્રિમિનલ ગ્રુપમાંથી એક છે. તેની હાજરી અમેરિકાના 50 રાજ્યોમાં છે,ઉલ્લેખનીય છે કે અમેરિકી સરકારે અલ મેન્ચો ઉપર 136 કરોડ રૂપિયાનું ઇનામ રાખ્યું હતું.
■ નાગરિકોની સુરક્ષા માટે ભારતીય દૂતાવાસે માર્ગદર્શિકા જાહેર કરી છે.
ભારતીય દૂતાવાસે નાગરિકોને સતર્ક રહેવા અને સ્થાનિક વહીવટીતંત્રના સંપર્કમાં રહી મીડિયાના અહેવાલોનું અપડેટ મેળવતા રહેવા અપીલ કરી છે. ઉપરાંત કટોકટીના સમયે સ્થાનિક હેલ્પલાઈન નંબર 911 અથવા ભારતીય દૂતાવાસના ખાસ નંબર +52 55 4847 7539 પર સંપર્ક કરવા જણાવાયું છે. આ ઉપરાંત, પ્રવાસીઓને પોતાની સુરક્ષા અંગેની જાણકારી પરિવાર અને મિત્રોને સોશિયલ મીડિયા કે ફોન દ્વારા સતત આપતા રહેવા સૂચન કરવામાં આવ્યું છે. મેક્સિકોમાં હાલ જે રીતે સુરક્ષા અભિયાનો ચાલી રહ્યા છે, તેને જોતા બિનજરૂરી અવરજવર ટાળવા સલાહ અપાઈ છે.
