Rahul Gandhi: કોંગ્રેસ સાંસદ અને લોકસભામાં વિરોધ પક્ષના નેતા રાહુલ ગાંધીએ તાજેતરમાં ‘ભારતીય રાજ્ય સામે લડાઈ’નું નિવેદન આપ્યું હતું. તેમના આ નિવેદન પર ઘણો હોબાળો મચી ગયો હતો. હવે આ મામલે રાહુલ ગાંધીની મુશ્કેલીઓ વધી ગઈ છે. ઉત્તર પ્રદેશની સંભલ જિલ્લા કોર્ટના ન્યાયાધીશે રાહુલ ગાંધીને તેમના નિવેદન અંગે નોટિસ ફટકારી છે. કોર્ટે રાહુલ ગાંધીને તેમની સામે દાખલ કરવામાં આવેલી ફરિયાદ પર જવાબ આપવા અથવા કોર્ટમાં હાજર રહેવા કહ્યું છે.

શું છે આખી ઘટના?

મામલો એવો છે કે રાહુલ ગાંધીએ 15 જાન્યુઆરી 2025ના રોજ એક નિવેદન આપ્યું હતું કે ‘અમે હવે ભાજપ, આરએસએસ અને ભારતીય રાજ્ય સામે લડી રહ્યા છીએ’. રાહુલના નિવેદન સામે સાંસદ/ધારાસભ્ય કોર્ટમાં કેસ દાખલ કરાયો હતો. રાહુલ ગાંધીના નિવેદન સાથે સંબંધિત મામલા અંગે એડવોકેટ સચિન ગોયલે કહ્યું – “કોર્ટે ફરિયાદ સ્વીકારી છે અને રાહુલ ગાંધીને નોટિસ આપી છે, જેમાં તેમને 4 એપ્રિલે કોર્ટમાં હાજર રહેવા અથવા જવાબ દાખલ કરવાનો નિર્દેશ આપવામાં આવ્યો છે.”

કોર્ટે 4 એપ્રિલે સમન્સ મોકલ્યા

‘ભારતીય રાજ્ય સામે લડાઈ’ના નિવેદનના મામલે રાહુલ ગાંધીને મોકલવામાં આવેલી નોટિસ પર એડવોકેટ સચિન ગોયલે કહ્યું  “અમે સમીક્ષા અરજી દાખલ કરી હતી અને સંભલની જિલ્લા ન્યાયાધીશ કોર્ટે રાહુલ ગાંધીને 4 એપ્રિલે કોર્ટમાં હાજર રહેવા માટે સમન્સ જારી કર્યું છે.”

રાહુલ ગાંધી કયા સંદર્ભમાં કરી હતી વાત?

15 જાન્યુઆરીના રોજ, કોંગ્રેસ પાર્ટીના નવા મુખ્યાલય ‘ઇન્દિરા ભવન’નું ઉદ્ઘાટન કરવામાં આવ્યું હતુ. આ વખતે રાહુલ ગાંધીએ ભાજપને આડે હાથ લેતાં કહ્યું હતુ કે “કોંગ્રેસ અને અન્ય વિપક્ષી પક્ષો માત્ર ભાજપ સામે જ નહીં પરંતુ ભારતીય રાજ્ય સામે લડી રહ્યા છે.” રાહુલે કહ્યું હતું કે- “એવું ન વિચારો કે આપણે ન્યાયી લડાઈ લડી રહ્યા છીએ. આમાં કોઈ ન્યાયી નથી. જો તમે માનતા હોવ કે આપણે ભાજપ અથવા આરએસએસ નામના રાજકીય સંગઠન સામે લડી રહ્યા છીએ, તો તમે સમજી શક્યા નથી કે શું થઈ રહ્યું છે. ભાજપ અને આરએસએસએ આપણા દેશની દરેક સંસ્થા પર કબજો કરી લીધો છે. હવે આપણે ભાજપ, આરએસએસ અને ભારતીય રાજ્ય સામે લડી રહ્યા છીએ.”