ગુજરાતમાં સતત અપરાધની ઘટનાઓમાં વધારો થઈ રહ્યો છે. ત્યારે સુરેન્દ્રનગર જીલ્લાના સાયલાના ડોડિયા ગામના બ્રિજ પાસે ભયંકર મારામારીનો વિડિયો સામે આવ્યો છે. જૂની અદાવતની રીસ રાખી અમદાવાદના એક કારચાલકને સાયલા હાઈવે પર રોકી કારમાં તોડફોડ કરી 3 ઈસમોએ લાકડીથી યુવક પર હુમલો કર્યો છે. યુવક પાસેથી રૂ. 5 લાખની સોનાની ચેન અને રોકડની પણ લૂંટ કરી હતી. આ ઘટના બનતા નેશનલ હાઈવે પર ટ્રાફિકજામનાં પણ દૃશ્યો સર્જાયાં હતાં. આ મામલે કુલ 7 શખ્સો સામે પોલીસ ફરિયાદ નોંધાઈ છે.
ઘરે પરત આવતાં હુમલો થયો
અમદાવાદના થલતેજમાં રહેતા રઘુભાઈ માંગુડા તેમના મિત્રો સાથે દ્વારકા ખાતે દર્શન કરવા ગયા હતા. જ્યાંથી પરત અમદાવાદ આવી રહ્યા હતા. ત્યારે ચોટીલા પાસે ડોળિયા ગામના બ્રિજ નજીક પહોંચ્યા તે વખતે ઉમરડા ગામના વેરશી તરગટા, ગોપાલ તરગટા તેમજ રણછોડ તરગટા અને અજાણ્યા ચારેક લોકોએ એકાએક આવીને રઘુભાઈની ગાડી ઉપર લાકડીઓના ઘા મારી ગાડીના કાચ તોડી નાખ્યા હતા.
સોનાના દાગીના પણ લૂંટી લીધા
એક શખ્સે આવીને રઘુભાઈને જમીન પર પછાડ્યા હતા. જે બાદ ગોપાલ, વેરશી અને રણછોડે આવીને લાકડી લઈ રઘુભાઈ પર તૂટી પડ્યા હતા. જાહેર રોડ પર ઢોરમાર મારી રઘુભાઈના હાથ-પગ તોડી નાખ્યા હતા. તેમજ ગળામાં પહેરેલ સાડા સાત તોલાની સોનાની ચેઈન, સોનાનું પેંડલ તેમજ ખિસ્સામાં રહેલ રોકડ બળજબરીથી કાઢી લઈ તમામ શખ્સો ફરાર થઈ ગયા હતા. જતાં જતાં અપશબ્દો બોલી જાનથી મારી નાખવાની ધમકી પણ આપી હતી. આ સમગ્ર ઘટનામાં યુવકને પગમાં ગંભીર ઈજા પહોંચી હતી. જેથી તેને સારવાર માટે હોસ્પિટલમાં ખસેડવામાં આવ્યો હતો.
12 વર્ષ અગાઉનું વેર આજે વાર્યું
આ બનાવનું કારણ એવું છે કે આજથી બારેક વર્ષ પહેલાં વેરશી તરગટા માલઢોર લઈ આવ્યા હતા. તે સમયે રઘુભાઈને દૂધની ડેરી હોઇ દૂધ ભરવા બાબતે બોલાચાલી અને ઝઘડો થયો હતો. જે બાબતનું મનદુઃખ રાખી અને કાવતરું રચીને માર માર્યો હતો. તેમજ સોનાના દાગીના અને રોકડની લૂંટ ચલાવી હતી.
ડેરીમાં દૂધ ભરવા બાબતે થઈ હતી બબાલ
ફરિયાદી રઘુભાઈ કાનાભાઈ માંગુડાને દૂધની ડેરી છે. રઘુભાઇને દૂધ ભરવા બાબતે આરોપી વેરશીભાઇ શામળાજી તરગટા સાથે બોલાચાલી ઝઘડો થયો હતો. જે બાબતનું મનદુઃખ રાખી વેરશીભાઇ શામળાજી તરગટા દ્વારકા દર્શન કરી પરત અમદાવાદ જતા હતા, તે વખતે વેરશીભાઇ શામળાજી તરગટા, ગોપાલભાઈ વેરશીભાઈ તરગટા અને રણછોડભાઈ શામળાજી તરગટા અને અન્ય ચાર અજાણ્યા શખ્સો મળી કુલ સાત લોકોએ એમની ગાડીની વોચ રાખી ગુનાને અંજામ આપ્યો છે. હાલ ફરિયાદીને ગંભીર ઈજાઓ પહોંચતાં હોસ્પિટલમાં ખસેડાયા છે.
5 લાખથી વધુનો મુદ્દામાલ છીનવ્યો
હુમલાખોરોએ સાડા સાત તોલા વજનની સોનાની ચેઇન કિંમત રૂ. 5,00,000 તથા રોકડા રૂ. 14,000 મળી કુલ રૂ. 5,14,000ની લૂંટ કરી જાનથી મારી નાખવાની ધમકી આપી હતી. સાયલા પોલીસ મથકે સાત શખ્સો સામે પોલીસ ફરિયાદ નોંધવામાં આવતા પોલીસે તપાસ હાથ ધરી છે.
