Vadodara News: વડોદરા શહેરમાં કાયદો અને વ્યવસ્થા ખોરવાઈ ગઈ હોય તેવા દ્રશ્યો જોવા મળી રહયા છે પહેલા સોમા તળાવ બ્રિજ નજીક ભરવાડના બે જૂથ વચ્ચે જાહેરમાં લાકડીઓ ઉછળી અને ત્યારબાદ લાલબાગ બ્રિજ નીચેના વિસ્તારમાં એકજ સમાજના બે જૂથો ખુલ્લી તલવાર સાથે ધસી આવી એકબીજા ઉપર તૂટી પડતા ત્રણ વ્યક્તિને તલવારના ઝાટકા લાગતા લોહી લુહાણ હાલતમાં સયાજી હોસ્પિટલમાં લઈ જવાયા હતા.
લાલબાગ બ્રિજ નીચે બે જૂથ વચ્ચે જૂના વિવાદને લઈને માથાકૂટ થતાં બંને પક્ષે તલવાર જેવા ઘાતક શસ્ત્રનો ઉપયોગ થયો હતો અને પથ્થરમારો પણ થતાં સ્થાનિકોમાં નાસભાગ મચી હતી.આ જૂથ અથડામણ અંગેની જાણ થતાં જ પોલીસનો કાફલો તાત્કાલિક સ્થળ પર પહોંચ્યો હતો અને સ્થિતિ કાબુમાં લીધી હતી,ઇજાગ્રસ્તોને સારવાર માટે હોસ્પિટલમાં ખસેડવામાં આવ્યા હતા.
લાલબાગ બ્રિજ નીચે આવેલી સિમેન્ટ ફેક્ટરી નજીક જાહેરમાં એક જ કોમના બે જૂથ રોડ ઉપર તલવારો લઈને ઉતરી આવ્યા હતા અને સામસામે ઝાટકા માર્યા હતા ત્યારબાદ દુરથી પથ્થરમારો કર્યો હતો જેમાં ત્રણ લોકો ગંભીર રીતે ઇજાગ્રસ્ત થયા હતા.ઇજાગ્રસ્તોમાં જસપાલસિંહ અવિસિંહ ટાંક (રહે. અલવાનાકા, માંજલપુર), કાંતિસિંહ સંતોષસિંહ દુધાણી (રહે. વારસિયા) અને અર્જુનસિંહ અવિસિંહ ટાંક (રહે. અલવાનાકા, માંજલપુર)નો સમાવેશ થાય છે.
તલવારથી ઇજા થતાં ત્રણેયને લોહીલુહાણ હાલતમાં તાત્કાલિક 108 એમ્બ્યુલન્સ મારફતે સયાજી હોસ્પિટલમાં ખસેડવામાં આવ્યા હતા.રાવપુરા પોલીસે ઘટનાસ્થળે પહોંચીને સ્થિતિ કાબુમાં લઈ તપાસ શરૂ કરી છે આ ઘટનાને પગલે આ વિસ્તારમાં ભારે તંગદિલી પ્રસરી ગઈ છે.
આ પણ વાંચો:
Police recruitment: ગુજરાત પોલીસમાં ભરતી માટે થઈ જાવ રેડી; PSI-LRDની શારીરિક કસોટીની તારીખો જાહેર!
